Кондак 1

Избранней от всех родов Божией Матери и Царице, Благодатным Небом нами именуемой, телу нашему и душам спасение подающей, благодарственное приносим пение, Богородительнице. Ты же, яко имущая милосердие неизреченное, от всяких нас бед и грехов свободи, да зовем Ти:

Радуйся, Благодатное Небо, радость и спасение нам дарующая.

Икос 1

Ангели и праведных души удивишася, егда предстала еси пред Сыном Твоим и Богом и многим молением ходатайствовала о людех, во гресех пребывающих. Мы же, очима веры толикое Твое благоутробие зряще, со умилением взываем Тебе сице:

Радуйся, молитвы всех христиан приемлющая; радуйся, и самых отчаянных грешников моления не отвергающая.

Радуйся, к Сыну Твоему о них предстательствующая; радуйся, нечаянную радость спасения им подающая.

Радуйся, предстательством Твоим весь мир спасающая; радуйся, вся наша печали утоляющая.

Радуйся, житие наше добре устрояющая; радуйся, избавление от грехов всем человеком принесшая.

Радуйся, Радость всему миру родившая; радуйся, еже како ни единаго же научившая.

Радуйся, Благодатное Небо, радость и спасение нам дарующая.

Кондак 2

Видящи Пречистая люди грешныя, с верою и упованием пред честною Ея иконою долу повергающихся и слезно молящихся о гресех своих, внят молению их, да вси, зряще Матернее Ея милосердие, на небеси и на земли вопиют Богу: Аллилуиа.

Икос 2

Разум человеческий воистину превосходит любовь Твоя к роду христианскому, о немже молишися Сыну Твоему и Богу, мы же, зряще Тя, неотступную Предстательницу за нас грешных, со слезами вопием Ти:

Радуйся, Заступнице усердная рода христианскаго, от Бога нам дарованная; радуйся, Путеводительнице наша, к небесному отечеству нас возводящая.

Радуйся, верных ограждение и прибежище; радуйся, помоще призывающих имя Твое святое.

Радуйся, презренных и отверженных от рова погибели исхищающая; радуйся, тех на путь правый обращающая.

Радуйся, непрестанное уныние и мрак душевный отгоняющая; радуйся, оставленных врачми на Свои всемощнеи руце приемлющая.

Радуйся, Благодатное Небо, радость и спасение нам дарующая.

Кондак 3

Сила благодати преизобилова тамо, идеже умножися грех, да радуются на небеси вси ангели о грешницех кающихся, поюще пред престолом Божиим: Аллилуиа.

Икос 3

Имущи к роду христианскому Матернее милосердие, всем, с верою и упованием прибегающим к Тебе, подаеши руку помощи, Владычице, да вси единым сердцем и единеми усты славословие Тебе приносят сицевое:

Радуйся, яко Тобою к нам нисходит Божие благоволение; радуйся, яко во всех бедах и обстояниих наших приносиши Сыну Твоему усердныя о нас молитвы.

Радуйся, яко наша молитвы приятными Богу соделоваеши; радуйся, яко от видимых врагов нас избавляеши.

Радуйся, яко сердца злых человек умягчаеши; радуйся, яко от клеветы, досаждения и укорения нас изъимаеши.

Радуйся, яко Тобою вся благая желания наша исполняются; радуйся, яко много может молитва Твоя пред Сыном Твоим и Богом.

Радуйся, Благодатное Небо, радость и спасение нам дарующая.

Кондак 4

Пред честною иконою Твоею, Царице Небесная, склоняем колена душ и телес наших и со умилением дерзновенно молимся Ти: спаси нас, о Мати милосердия, да не погибнем до конца во гресех наших; Ты бо еси всем грешником едина надежда и прибежище: преклонися убо на милость, благая Мати, и умоли о нас Сына Твоего и Творца нашего, да непрестанно зовем Ему: Аллилуиа.

Икос 4

Слышавше небожителие, яко молитвами Твоими пред Сыном Твоим прощение грехов и спасение на земли сущим грешником даруются, прославляют Тя, благосердную Царицу небесе и земли. И мы, грешнии, уведевше таковое Твое заступление о нас, грешных, недоумеваем, како благохвалити Тя возможем по достоянию, и от глубины сердца нашего умиленно воспеваем Ти сице:

Радуйся, Споручнице спасения грешных; радуйся, Взыскание погибших.

Радуйся, нечаянная грешных Радосте; радуйся, падших востание.

Радуйся, Предстательнице к Богу, мир от бед спасающая; радуйся, яко гласа молитв Твоих беси трепещут.

Радуйся, яко ангели сему радуются; радуйся, яко и нас, земнородных, сила молитв Твоих веселия исполняет.

Радуйся, яко теми от тины грехов нас изъимаеши; радуйся, яко пламень страстей наших угашаеши.

Радуйся, Благодатное Небо, радость и спасение нам дарующая.

Кондак 5

Боготечную звезду чудотворную икону Матере Твоея показал еси нам, Господи, ибо, взирающе на образ Ея телесныма очима, умом и сердцем к Первообразней возвышаемся, и Ею к Тебе востекаем, поюще: Аллилуиа.

Икос 5

Видевше ангели, хранителие христиан, яко Божия Матерь споспешествует им в наставлении тех, заступлении и спасении, потщашася сице возопити Честнейшей Херувим и Славнейшей без сравнения Серафим:

Радуйся, с Сыном Твоим и Богом вечно царствующая; радуйся, Ему всегда о роде христианском моления приносящая.

Радуйся, в христианстей вере и благочестии Наставнице; радуйся, уповающим на Тя непостыдный конец жизни дарующая.

Радуйся, Матерним Твоим предстательством от вечнаго мучения нас избавляющая; радуйся, ходатайством к Сыну Твоему жизни вечныя сподобляющая.

Радуйся, Благодатное Небо, радость и спасение нам дарующая.

Кондак 6

Дивная дела милосердия Твоего, людем явленная, предаде писмени святитель Димитрий Ростовский в научение и утешение всем верным, да и тии, во гресех, бедах, скорбех и озлоблении суще, на всяк день пред честным Твоим образом, Благодатное Небо именуемым, колена преклоняют и, избывше бед, печалей и напастей, вопиют Богу: Аллилуиа.

Икос 6

Возсия нам, яко пресветлая заря, чудотворная икона Твоя, Богомати, прогоняющи тьму бед и скорбей от всех с любовию вопиющих Ти сице:

Радуйся, Целительнице наша в болезнех телесных; радуйся, благая Утешительнице в печалех наших душевных.

Радуйся, скорбь нашу в радость претворяющая; радуйся, ненадеющихся несумненною надеждою возвеселяющая.

Радуйся, алчущих Питательнице; радуйся, нагих одеяние.

Радуйся, вдов Утешительнице; радуйся, безматерних сирот незримая Воспитательнице.

Радуйся, Благодатное Небо, радость и спасение нам дарующая.

Кондак 7

Хотя Законодавец правосудный Господь Сам быти закона исполнитель и явити милосердия Своего бездну, преклонися на усердное моление Твое, Преблагословенная Мати Дево, о людех во гресех пребывающих и милостей Божиих чающих, глаголя: Закон повелевает, да сын чтит матерь. Аз Сын Твой, Ты же Мати Моя, Аз Тя должен чтити, послушая Твоего моления, буди убо, яко же хощеши. О нихже молишися — прощаются им греси Тебе ради. Мы же, видяще таковую силу молитвы Ходатаицы нашея о прощении согрешений наших, прославим милосердие и неизреченное благоутробие Ея, зовуще: Аллилуиа.

Икос 7

Новое дивное и славное знамение всем верным явися, яко не токмо Матери Твоея, но и пречистому Ея лику, на дске изображенному, силу чудотворения даровал еси, Господи; сему таинству дивящеся, во умилении сердца вопием к Ней таковая:

Радуйся, премудрости и благости Божия откровение; радуйся, веры утверждение.

Радуйся, благодати явление; радуйся, душеполезных знаний дарование.

Радуйся, слово премудрости просящим дарующая; радуйся, несмысленных разумными соделовающая.

Радуйся, Благодатное Небо, радость и спасение нам дарующая.

Кондак 8

Видяще славная дела и многоразличную премудрость Божию в мире и жизни нашей, предстательством Твоим пред Богом над нами совершающаяся, о Небо благодатное, Пречистая Владычице, устранимся земныя суеты и излишних житейских попечений, и ум и сердце наше на небеса возведем, поюще Богу: Аллилуиа.

Икос 8

Вся в вышних пребываеши, и нижних никакоже отступила еси, премилосердная Царице небесе и земли. Аще бо по успении Твоем и взошла еси на небеса с пречистою Твоею плотию, обаче и грешныя земли не оставила еси, являющися причастница промышления Сына Твоего о роде христианском, сего ради Тя по долгу ублажаем:

Радуйся, сиянием пречистыя души Твоея всю землю просветившая; радуйся, чистотою телесе Твоего вся небеса возвеселившая.

Радуйся, о всем мире усердная Предстательнице; радуйся, всех нас при Кресте Сына Твоего усыновившая.

Радуйся, всегда Матернюю любовь к нам являющая; радуйся, в скорбех утешающая.

Радуйся, всех даров духовных и телесных независтная подательнице; радуйся, благ временных и вечных Ходатаице.

Радуйся, двери царствия Христова верным отверзающая; радуйся, и на земли чистаго веселия сердца наша исполняющая.

Радуйся, Благодатное Небо, радость и спасение нам дарующая.

Кондак 9

Все естество ангельское удивися делу Твоего милосердия, Господи, яко толико твердую и теплую Заступницу и Помощницу роду христианскому даровал еси, нам невидимо спребывающу, слышащу же Тебе поющих: Аллилуиа.

Икос 9

Витийство человеческое не возможет по достоянию благохвалити Тя, Пресвятая Богородице, и воспети неисчетная чудеса Твоя, от иконы Твоея являемая, имиже православныя люди от бед, напастей и всякаго зла сохраняеши. Мы же, добре ведуще о многих чудотворных явлениих Твоего честнаго лика бывших и поклонением ему потребная ко временней и вечней жизни приемлюще, с веселием Богородице взываем:

Радуйся, яко от священнаго лика Твоего чудеса деются; радуйся, яко утаися премудрость и благодать сия от мудрых и разумных века сего.

Радуйся, яко открыся та младенцем в вере; радуйся, яко прославляющих Тя прославляеши.

Радуйся, яко отвергающих Тя пред всеми посрамляеши; радуйся, яко от всякаго зла прибегающих к Тебе избавляеши.

Радуйся, яко вся болезни человеческия душевныя и телесныя милостивно врачуеши; радуйся, яко праведный гнев Божий на нас Твоим молением скоро утоляеши.

Радуйся, яко Ты еси тихое пристанище всем с верою к Тебе притекающим; радуйся, кораблю хотящих спастися.

Радуйся, Благодатное Небо, радость и спасение нам дарующая.

Кондак 10

Спасти хотяще души своя от вечныя смерти, мы, недостойная чада Твоя, преклоньше колена своя пред пречистым Твоим образом, молим Тя, Небесная Царице и милосердная Мати спасения нашего: сотвори нас причастники вечнаго блаженства в Небесном Царствии Сына Твоего, поющих Спасителю Богу: Аллилуиа.

Икос 10

Стена необоримая и пристанище небурное Ты еси, Богородице Дево, всем к Тебе притекающим, темже и нас огради и покрый от всех враг видимых и невидимых, да с верою и умилением поклоняющеся пречестней и цельбоносней иконе Твоей, радостно вопием Ти:

Радуйся, сохраняти и спасати всех призывающих Тя обещавшая; радуйся, к Сыну Твоему и Богу молитвы верных приносящая.

Радуйся, и Сама непрестанно у престола Его молящаяся о нас; радуйся, благодать Твоим иконам даровавшая.

Радуйся, всю вселенную лучами тех озаряющая; радуйся, рода христианскаго похвало и непостыдное упование.

Радуйся, Благодатное Небо, радость и спасение нам дарующая.

Кондак 11

Пение всеумиленное приносяще Ти, недостоинии, просим Тебе, Дево Богородице: не презри гласа рабов Твоих, к Тебе бо в напастех и скорбех прибегаем и пред Тобою в бедах наших слезы проливаем, поюще: Аллилуиа.

Икос 11

Светозарная свеща сущим во тьме греха и юдоли плача явися предивная икона Твоя, Пречистая Владычице: всем бо притекающим к ней струи исцелений изливает и чудес зарями сердца верных веселит, подвизающи взывати сице:

Радуйся, Божественный Свет неизреченно родившая; радуйся, тьму смертную рождеством Твоим просветившая.

Радуйся, страны нашея неусыпная Покровительнице; радуйся, верных пастырей Церкве ободряющая и вразумляющая.

Радуйся, людей православных Хранительнице; радуйся, богобоязненных иноков и инокинь присное Утешение.

Радуйся, кающихся пред Богом грешников непостыдная Заступнице; радуйся, радости небесныя всем нам Подательнице.

Радуйся, всех христиан теплая Ходатаице; радуйся, о людех Твоих присная Молитвеннице.

Радуйся, Благодатное Небо, радость и спасение нам дарующая.

Кондак 12

Благодать божественную испроси нам у Сына Твоего и Бога, простри нам руку помощи, отжени от нас всякаго врага и супостата, умири нашу жизнь, да не погибнем люте без покаяния, но приими нас в вечныя кровы, Богородительнице, да радующеся поем Богу, Тобою нас спасающему: Аллилуиа.

Икос 12

Поюще дивная Твоя чудеса, умильно припадаем пред пречистым образом Твоим и, благоговейно лобызающе его, немолчными песньми воспеваем Тя, предивная Царице небесе и земли, и просим Тя, Владычице, услыши наше моление в час сей и благодать Сына Твоего нам низпосли, с любовию вопиющим Тебе:

Радуйся, милостей Сына Твоего и Бога нас сподобляющая; радуйся, десную часть молитвами Твоими нам грешным уготовляющая.

Радуйся, изнемогающих от уныния и печали скорая Утешительнице; радуйся, грешником кающимся спасение подающая.

Радуйся, и нераскаянных грешников к покаянию обращающая; радуйся, всех Помоще, скорбным вдовицам и сирым помогающая.

Радуйся, алчущих и жаждущих правды к Богу приводящая; радуйся, рода христианскаго Заступнице усердная.

Радуйся, Церкве Православныя нерушимая Стено и Небо благодатное; радуйся, страны нашея Покрове и Защищение.

Радуйся, Благодатное Небо, радость и спасение нам дарующая.

Кондак 13

О всепетая Мати, невместимаго Бога во чреве вместившая и Радость всему миру родившая! Нынешнее приемши пение, вся наша печали на радость преложи, от всякия избави напасти всех и будущия изми муки о Тебе вопиющих: Аллилуиа.

Этот кондак читается трижды, затем 1-й икос «Ангели и праведных души …» и 1-й кондак «Избранней от всех родов …».

Молитва

Что Тя наречем, о Благодатная Богомати Богоотроковице, Пренепорочная Марие? Киими песнопении возвеличим Тя, возвеличенную Небом и землею, Ангелами и человеки? Явися бо на Тебе неслышанное от века на земли и несведомое Ангелами на Небеси таинство, паче ума и слова, вочеловечения Бога Слова, рожденнаго съискони от Безначальнаго Отца без матери и воплощеннаго в Твоей утробе и с нетленною печатию девства Твоего родившагося. О, чудо всех древних и новых чудес! Непреложное слово Самаго Бога о победоноснем семени жены исполнися и совершися в Безмужней Деве. О, неизмеримая глубина премудрости и величия Божия! Киими имены наречем Тя, о Невеста Неневестная? Зарею ли наречем Тя восходящаго на небе солнца? Но Ты – самое Небо, из Тебе бо возсия Солнце Правды – Христос Бог наш, Спаситель грешных. Именуем ли Тя вратами, вводящими в потерянный прародителями рай, обиловавший всеми благами? Но Ты Сама еси благодатный рай, произрастившая Цвет нетления, врачующий и отгоняющий смердение греха и зловоние прародительскаго тления. Наречем ли Тя юною Непорочною Девою, не познавшей брака? Но Ты и до старости пребыла Неискусобрачною и девственною до рождения, и в рождении, и по рождении Сына пребыла еси. Наименуем ли Тя Чистою и Святою Мариею, превозшедшею Своею чистотою всех матерей и праматерей? Но Ты не токмо родила Того Младенца Христа, но и носила Его при Своих персех и питала Твоим матеродевственным млеком, Того, Иже питает всякое создание, Емуже со страхом и трепетом предстоят Небесные силы и Его же хвалит всякое дыхание и тварь. О, воистину Ты дивная еси в женах, чудная в девах, неподражаемая в матерех! К Тебе пред Твоим Божественным ликом припадаем и пред Твоими святыми стопами повергаем и слагаем все наши мысли, желания, намерения и чувства. Освяти их Твоим Богоматерним призрением и вознеси их, яко жертву нашего смиреннаго сердца, яко малоценную лепту нашей духовной нищеты, к Престолу Сына Твоего, Спасителя нашего, да имиже весть судьбами управит наш путь ко спасению и наследию Царствия Его, не имущаго конца во веки веков. Аминь.

← к оглавлению

Историческая справка об иконе

Проект службы иконе

Кондак 1

Избранней от всех родов Божией Матери и Владычице Небеси и земли, избавляющей нас от всякия нужды, благодарственное приносим пение. Ты же, Всемилостивая Госпоже Богородице, приими наше усердное моление, сохрани нас от глада и пагубы, даруй земли нашей плодоносие, Питательнице и Спорительнице нив и хлебов наших, да радующеся всегда зовем Ти: Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Икос 1

Ангелов Творец избра Тя, Владычице, к благодатному человеков спасению и дарова Тя Помощницу людем, избавляющую нас от глада и всяких напастей, житие наше добре устрояющую во всяком мире и довольстве. Темже со умилением взываем Ти: Радуйся, благодатное человеков избавление от всякия нужды; Радуйся, достоянию Твоему помощь и заступление. Радуйся, христолюбивыя люди от бед спасающая; Радуйся, алчущих Питательнице. Радуйся, сирых Заступнице; Радуйся, нагих одеяние. Радуйся, израстившая нам Плод Живота; Радуйся, Спаса рождшая душ наших. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 2

Видев Сын Твой, Богомати, великое Твое к людем милосердие, глаголет к Тебе: «Проси, Мати Моя, зане не отвращуся Тебе, но исполню вся прошения Твоя». Мы же, прославляющие сие дивное промышление о роде человеческом, вопием Богу: Аллилуиа.

Икос 2

Разум небесный даровася благочестивому старцу Амвросию, настави его соорудити во обители им созданной, икону Пресвятыя Богородицы и нарещи ю «Спорительнице хлебов», яко Ты, Пресвятая Дево, спасаеши люди Твоя от глада, даруеши земли плодоносие, посылаеши дождь ранний и поздний на нивы и поля наша, защищаеши люди Твоя от смертоноснаго вреда и пагубы. Темже вопием Тебе таковая: Радуйся, Дево, христиан похвало; Радуйся, яко Тя блажат вси роди. Радуйся, яко Ты благословляеши и споряеши хлебы наша; Радуйся, яко Ты избавляеши нас от глада. Радуйся, питающая нас хлебом жизни; Радуйся, млеком питавшы Питателя Вселенныя. Радуйся, Плода Безсмертнаго стяжание; Радуйся, Садителя жизни нашея родшая. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 3

Силою свыше укрепи нас, Благодатная Владычице, во дни глада и пагубы, да не погибнем люте без покаяния во унынии и отчаянии, но утверди и настави нас в терпении и благоугождении Богу, да разумеем в напастех и скорбех волю Его святую, благую и совершенную, непрестанно хваля Бога и взывая Ему: Аллилуиа.

Икос 3

Имея любовь велию к людям, искупленным Честною Кровию Сына Твоего и Бога, Богомати Пречистыя, прияла еси от Него власть устрояти и покрывати род христианский. Ты бо бедствующим Помощнице еси скорая, градом и весем, селам и нивам, и всему миру Покров. Тебе, Милосердной и Боголюбивой Матери нашей, устрояющей и управляющей ко спасению земную жизнь нашу, смиренномудренно глаголем: Радуйся, Благаго Сына Благая Мати; Радуйся, непрестанно молящаяся о спасении и помиловании нас грешных. Радуйся, о всем мире христианстем к Богу Ходатаице; Радуйся, благ всяческих Всеблагая Подательнице. Радуйся, плененных и в темницех заключенных Питательнице; Радуйся, тела моего здравие и души моея спасение. Радуйся, яко рай пищный процветаеши; Радуйся, яко пристанище душам готовиши. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 4

Буря противных ветров, егда найдет на нас внезапно, громы и молнии, град и вода многая устремится на землю, тогда, Госпоже Всемилостивая, ускори на помощь нам безпомощным, защити и избави нас от дождевнаго лияния, егоже сотворихомся достойни грех ради наших, и да будут поля и нивы невредимы от сих, и да не потопит нас буря водная. Тебе бо грешнии имамы Заступницу непостыдную, на Тя упование наше возлагаем и, прославляюше силу молитв Твоих, Рождшемуся от Тебе Спасу мира зовем: Аллилуиа.

Икос 4

Слышаще и видяще Твое сострадание, Владычице, к бедствующим и гибнущим людем, мы, грешнии, прибегаем к Тебе и молимся: О, Пресвятая Дево, услыши нас грешных, и во дни, егда солнце изсушит землю и от сухости зной будет, и прозябения земная начнут увядати, тогда Владычице, росу благодати Твоея низпосли на требующия и просящия милости, возвесели лице земли, нищих ради людей Твоих, младенец, и скотов, и иных всех, иже чают дати им пищу во благо время, и от святыя иконы Твоея «Спорительницы» яви милосердие Твое вопиющим Тебе таковая: Радуйся, Молитвеннице неусыпающая ко Христу Богу, на милость к нам Его преклоняющая; Радуйся, кару Божию за беззакония наша от глав наших отводящая. Радуйся, Матерним покровом Твоим от всяких несчастий нас охраняющая; Радуйся, поля и нивы наша от запаления солнечнаго спасающая. Радуйся, Всемилостивая Услышательнице гласов наших молебных в скорби и обстоянии; Радуйся, жилища наша от огня спасающая. Радуйся, Державная Скоропомощнице наша во дни тяжких испытаний; Радуйся, от всех бед быстрое избавление. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 5

Боготечная звезда, икона Твоя, Богомати, людем, просящим хлеба насущнаго, немерцаемо сияет, покровом бо Твоея милости соблюдаеши поля и нивы наша и плодоносити их устрояеши, подвизая верныя вопити Христу Богу: Аллилуиа.

Икос 5

Видя Тя Сын Твой при Кресте стоящую с возлюбленным учеником, глаголет Тебе: «Жено, се Сын Твой» и ученику: «Се Мати Твоя!» — всыновляя Тебе вся верующия в Него. Мы же, чада Твоя сущия, на Твой покров надеющеся, Тебе, яко Матери нашей, глаголати дерзаем: Радуйся, Судии Праведнаго умоление; Радуйся, грехов наших прощение. Радуйся, Надеждо наша известная; радуйся, упование наше непостыдное. Радуйся, скорбей наших разрешение; Радуйся, печалей наших утоление. Радуйся, пламене страстей изменяющая; Радуйся, всех родов веселие. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 6

Проповедует Церковь Христова чудеса Твоя, Богородительнице, от восток бо до запад хвально Имя Твое, и несть града или страны, идеже не совершашеся Тобою действо Силы Божия, во избавление и спасение, просвещение и исцеление людей христоименитых, наипаче же чрез иконы Твоя святыя обыкла еси чудотворити, изливающи от них струи милостей и щедрот бедствующему и требующему помощи человечеству. Сего ради славословяще Тя, Сыну Твоему и Богу нашему вопием: Аллилуиа.

Икос 6

Возсияла еси от Истиннаго Солнца заря, Дево Богоотроковице, просвещаеши души всех, томимых гладом душевным, рече бо Господь: «Не о хлебе едином жив будет человек, но о всяком глаголе, исходящем из уст Божиих». Но помрачишася очи наша и окаменеша сердца наша, и не видим очима своима и не разумеем сердцем судеб Божиих. Томимыя душевным гладом, к Тебе прибегаем, Пречистая Дево, и просим Словом Жизни утолить глад душевный нас, вопиющих Тебе таковая: Радуйся, от убожества душевнаго нас воздвизающая; Радуйся, Питающая нас Словом Жизни. Радуйся, трапезо Пресвятая, Хлеб Жизни носившая; Радуйся, Пище, манны приемнице. Радуйся, земле Благая, Клас божественный израстившая; Радуйся, ниво, растящая многоплодие щедрот. Радуйся, каменю напоивший жаждущия жизни; Радуйся, милость сугубо нам подающая. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 7

Хотящи жати спасение, яко село сладкое показалася еси Владычице, от Негоже питающеся, имамы пищу вечную и нетленную. Мы же, земнии суще, молим Тя, Пречистая Дево, покажи силу Твою на жатве нив и полей наших, егда приидет время их, и всяк злак да изобилует на утешение нас, поющих Богу: Аллилуиа.

Икос 7

Дивно прославилася еси, Богомати, в защищении людей православных. Возстающии бо на Бога не познают, коль сильна есть молитва Божией Матери. Мы же о Твоем всемощном заступлении, помощи и благословении добре ведуще, сице к Тебе со умилением зовем: Радуйся, чистых руками и сердцем земледельцев благословенными плодами венчающая; Радуйся, бедствующим среди напастей и трудов внезапное вспоможение. Радуйся, безматерних сирот незримая Воспитательнице; Радуйся, Помощнице всех безпомощных. Радуйся, Кормительнице вдов и сирот; Радуйся, подающая силу, пищу и отраду болящим и разслабленным. Радуйся, одеждо нагих дерзновения; Радуйся, многих согрешений прощение. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 8

Якоже древле содействовала еси схождению на землю Спасителя мира, сице и ныне, яко солнце светозарное, восходиши над созревающей нивой, предшествуя приходу Господина с Жателями. Тому и мы со страхом вопием: Аллилуиа.

Икос 8

Все упование наше на Тя возлагаем, Мати Божия, и в скорбех наших ко святей иконе Твоей «Спорительнице» усердно притекаем, чающе получити от Тебе утешение благодатное и вспоможение во оскудении и нищете нашей, взываем Ти: Радуйся, милости превеликия сокровище; Радуйся, пище и утешение к Тебе прибегающих. Радуйся, хлебе неснедаемый алчущих; Радуйся, быстрое нищих услышание. Радуйся, скорбящих от глада и нужды приятное попечение; Радуйся, к Свету Неприступному нас извлачающая. Радуйся, ключу Царствия Христова; Радуйся, Надеждо благ вечных. Радуйся, Благодатная, Господь с Тобою, подаждь и нам недостойным, росу благодати Твоея и яви милосердие Твое.

Кондак 9

Вси людие дивятся величию чудес Твоих, Пресвятая Дево, изливаемых Тобою от святых Твоих икон, яко всем даруеши по коемуждо прошению, устрояеши домы наша, посылаеши благословение земледельцем и даеши людем всякое довольство. Темже вопием Сыну Твоему: Аллилуиа.

Икос 9

Вития многовещанныя не могут воспети чудес Твоих, Богомати Владычице, яко всем концем земли простираеши руку помощи и ниспосылаеши верным земли плодоносие, благорастворение воздухов и всякое изобилие плодов и благ земных. Мы же во смирении своем исповедающе Твое великое заступление о нас грешных и непрестанную помощь в нуждах наших вопием Ти: Радуйся, достойно восхваляемая от Архангел и Ангел; Радуйся, величаемая от всех Небесных Сил. Радуйся, Честнейшая Херувим; Радуйся, Славнейшая без сравнения Серафим. Радуйся, Владычице Неба и земли; Радуйся, Родительнице Вечнаго Царя. Радуйся, верная Рабо Господня; Радуйся, ублажаемая на Небеси и на земли. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 10

Спасительное прибежище в скорбех и напастех Ты еси, Богородице, темже испроси у Сына Твоего и Бога нашего, милости нам грешным, поющим: Аллилуиа.

Икос 10

Стена еси похваляющим чудеса Твоя, Богородице Дево, и всем с верою притекающим и поклоняющимся Тебе и иконе Твоей «Спорительнице хлебов» именуемой и глаголющим: Радуйся, неистощимый источниче милостей и щедрот; Радуйся, любве Божественных проявление. Радуйся, чудес преславных совершение; Радуйся, труждающихся и обремененных сладкий покое. Радуйся, терпеливых страдальцев дарами благодатными ущедряющая; Радуйся, о храмех Божиих попечение имущих духовною радостию утешающая. Радуйся, несумненная наша Надеждо; Радуйся, тихое и доброе Пристанище. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 11

Пение наше не презри, Пресвятая Дево, и сокровище любве Твоея не затвори от нас; щедрую руку Твоея помощи простри нам, да прославляющи милости и чудеса Твоя, поем Триединому Богу: Аллилуиа.

Икос 11

Светлыми лучами чудес Твоих просвещаеши весь мир христианский и заступаеши люди православныя, искупленным кровию Сына Твоего, темже припадающе ко святому образу Твоему, на немже зрим Тя, Богомати, на воздусе над полями и нивами нашими благословляющую собранныя снопы хлеба, молим Тя, Всемилостивая Владычице, род человеческий, осужденный в поте лица снести хлеб, в болезнех родити и в печалех питати чада своя, милостивно пощади и заступи. Даруй нам здравие и благомощие, да питаемии Тобою, от силы в силу возрастати будем и вси исполнимся радости и утешения от щедродательныя десницы любве Твоея, зовуще Тебе: Радуйся, младенцев Млекопитательнице; Радуйся, устнами детей хвалу Богови совершающая. Радуйся, Росо Неботочная в зной трудов сущим; Радуйся, подавающая требующим благоустроение. Радуйся, уготовляющая просящим изобилие; Радуйся, многажды прошения предваряющая. Радуйся, печальных Утешение; радуйся, скорбящих веселие. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 12

Благодатную помощь ниспосли нам, Мати Божия, и егда изыдет сеяй сеяти, да не падут семена при пути или посреде терния, или на камени, но на земли добрей. Сотвори восход их, да произрастит земля плод сторицею, и мы вси в радости сердца благодарными устны вопием Богу: Аллилуиа.

Икос 12

Поюще чудеса Твоя и милости, Владычице Богородице, хвалим Тя вси, яко воистину еси наша Помощнице, Заступнице, Питательнице и Домостроительнице, житие наше ко спасению устрояющая. Темже вопием Ти: Радуйся, богатство нетленное нам подавающая; Радуйся, брашно негиблющее алчущим правды. Радуйся, питие неисчерпаемое жаждущим жизни; Радуйся, яко рай пищный процветаеши. Радуйся, верных спасительное прибежище; Радуйся, Покрове миру ширший облака. Радуйся, ненадежных надеяние; Радуйся, отчаянных спасение. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

Кондак 13

О, Всепетая Мати, рождшая всех святых Святейшее Слово! Нынешнее наше приемши приношение, избави люди, к Тебе прибегающия, от всякия нужды, глада душевнаго и телеснаго, смертоносных болезней и всякаго зла и вечныя изми муки, да с лики ангельскими непрестанно поем Богу: Аллилуиа.

(Этот кондак читается трижды, затем икос 1 и кондак 1)

Молитва к Пресвятой Богородице перед Ея иконой, именуемой «Спорительница хлебов»

О, Пресвятая Дево Богородице, Премилостивая Владычице, Царице Небесе и земли, всякаго дома и семейства христианскаго Благоустроительнице, труждающихся благословение, нуждающихся неистощимое богатство, сирых и вдовиц и всех людей Кормительнице! Питательнице наша, рождшая Питателя Вселенныя и Спорительнице хлебов наших, Ты, Владычице, ниспосылаеши Твое Матернее благословение градом нашим, селам и нивам и коемуждо дому, на Тя упование имущему. Темже с благоговейным трепетом и сокрушенным сердцем смиренно молим Тя: буди и нам, грешным и недостойным рабом Твоим, мудрая Домостроительнице, житие наше добре устрояющая. Всякое же сообщество, всякий дом и семейство во благочестии и православии, единомыслии, послушании и довольстве соблюди. Нищия и неимущия пропитай, старость поддержи, младенцы воспитай, всех вразуми преискренне взывати ко Господу: «Хлеб наш насущный даждь нам днесь». Сохрани, Пречистая Мати, люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Обители нашей (веси), домам и семействам и всякой души христианстей и всей стране нашей исходатайствуй мир и велию милость, да славим Тя, Премилостивую Питательницу и Кормительницу нашу, ныне и присно, и во веки веков. Аминь.

Тропарь Пресвятой Богородице перед Ея иконой, именуемой «Спорительница хлебов»

Тропарь, глас 3

Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения, и подаеши им вся обильно к наслаждению. Спорительнице сущи хлебов им, избавляя их всякия нужды и утеснения, и устрояя им, рабом Твоим сущим, избавление вечныя муки и жизнь вечную.