Празднование: 5 октября (н.ст.) Тропарь, глас 3
Твоего предстательства уверение и милосердия Твоего явление икона Твоя «Услышательница» нам, Владычице, показася, пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли, моления наша скоро услыши и спасение вечное душам нашим, Пречистая, испроси.
Кондак, гл. 3
Днесь, Владычице, преподобный Косма к иконе Твоей с мольбою припаде и Тобою скоро услышан бысть, непрестанно Тебе хвалу воздая. И нам, под священный покров Твой прибегающим, да дарует Господь оставление грехов и велию милость.
Кондак 1
Избранней от всех родов Божией Матери и Царице, непрестанно у Престола Сына Своего молящейся о нас, с любовию благодарственная приносим пения. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Всеблагая Владычице, молений наших скорая Услышательнице.
Икос 1
Ангельский собор на Небеси немолчно воспевает Тя, Владычице, и мы земнороднии, притекающе к иконе Твоей, «Услышательница» именуемой, из глубины сердца взываем Ти:
Радуйся, яко о Тебе радуется Ангельский собор и человеческий род.
Радуйся, яко слава Твоя превосходит похвалы Небесныя и земныя.
Радуйся, милость Свою чрез чудотворныя иконы Твоя нам свыше посылающая.
Радуйся, Всеблагая наша Наставнице, любовию Твоею нас к Себе привлекающая.
Радуйся, источающая великия милости и щедроты любящим Тя.
Радуйся, скоропредстательная Помощнице всем призывающим Тя.
Радуйся, Всеблагая Владычице, молений наших скорая Услышательнице.
Кондак 2
Видящи, Всенепорочная, благое желание преподобнаго Космы, взывающаго к Тебе: «Пресвятая Богородице! Помолись Сыну Твоему и Богу, да наставит мя на путь спасения!», благоволила еси предстательство Свое пред Сыном Своим милостиво ему явити, да Христу воспевает выну: Аллилуиа.
Икос 2
Разумев Промышление Божие о себе преподобный Косма, в дивнем гласе от иконы Твоея, Премилостивая, изшедшем: «Сыне и Боже Мой! Научи раба Твоего Косму, како ему спастися!», возопи к Тебе, благой Услышательнице молений наших, во умилении сердечнем таковая:
Радуйся, Мати Света Невечерняго и Духа Святаго селение.
Радуйся, Неувядаемый Цвете нетления и Ангельских сил ликование.
Радуйся, скорая Услышательнице усердно Тебе молящихся.
Радуйся, непостыдное упование к Тебе притекающих.
Радуйся, безчисленныя щедроты Своя всем милостиво подающая.
Радуйся, Купино, неопально горящая, духовною радостию нас утешающая.
Радуйся, Всеблагая Владычице, молений наших скорая Услышательнице.
Кондак 3
Силою Вышняго и благодатию Твоею, Владычице, укрепленный святый Косма, егда слышаше на моление Твое ответствующий глас Творца своего: «В безмолвии да послужит Ми!», возблагодари Его за благостное попечение о себе песнию: Аллилуиа.
Икос 3
Имуще таковую Попечительницу о спасении нашем и источник неоскудеваемый Небесных дарований, иноцы Святыя Горы Афонския притекающи к пречудному образу Твоему «Услышательница» именуемому, благодарными усты вопиют Ти, Богородице:
Радуйся, Пресвятая Дево, жребием Своим Гору Афонскую наименовавшая.
Радуйся, Пречистая, многими чудесы сию Святую Гору ознаменовавшая.
Радуйся, молитву угодника Твоего Космы скоро услышавшая.
Радуйся, и наша усердная моления не отвергающая.
Радуйся, икону Твою святую верным в помощь даровавшая.
Радуйся, знамении и чудесы сию прославившая.
Радуйся, Всеблагая Владычице, молений наших скорая Услышательнице.
Кондак 4
Бурю внутрь имеяй помышлений сумнительных, преподобный Косма дивяшеся, видев Жену царственныя красоты во обители Ватопедстей, Яже Сама властительно в церкви и трапезе повеления различная всем сказующи. Познав же в Ней Царицу Небесную, о насельницех обители пекущуюся, в веселии сердца возопи Богу: Аллилуиа.
Икос 4
Слышавше о чуде скораго услышания Пречистою Богородицею моления раба Своего, в обители Зографстей бывшем, иноцы Горы Афонския радовахуся, видевше новое явление милосердия Твоего, о Богомати. Сего ради благодарственно вопием Ти сице:
Радуйся, благ временных и вечных усердная нам Ходатаица.
Радуйся, двери Царствия Христова верным отверзающая.
Радуйся, любовию Твоею нас на Небеса возводящая.
Радуйся, благоутробие Сына Своего к нам приклоняющая.
Радуйся, Божия милости и любве преизобильное исполнение.
Радуйся, вопиющих к Тебе скорое услышание.
Радуйся, Всеблагая Владычице, молений наших скорая Услышательнице.
Кондак 5
Боготечная звезда явися нам, Владычице, честная Твоя икона «Услышательница», лучами чудес Твоих мрак печалей и мглу всяческих недугов и скорбей от сердец наших прогоняющая и наставляющая на путь спасения всех с верою к Тебе притекающих и вопиющих Богу: Аллилуиа.
Икос 5
Видяще токи чудес, от святыя иконы Твоея Услышательницы источаемыя, вси иноцы Горы Афонския и окрестных стран стекахуся к ней на поклонение. Ты же, Преблагая, всем дары милости Твоея неоскудно подаеши от чудотворнаго образа Твоего, подвизая с благодарностию вопити Тебе:
Радуйся, радосте наша и утешение.
Радуйся, покров наш и ограждение.
Радуйся, немощи наша душевныя и телесныя врачующая.
Радуйся, сердца наша любовию Твоею умягчающая.
Радуйся, от греховнаго падения нас избавляющая.
Радуйся, ум наш на Небеса возводящая.
Радуйся, Всеблагая Владычице, молений наших скорая Услышательнице.
Кондак 6
Воспеваем дивное милосердие Твое к нам и велие снисхождение, Пресвятая Дево, не престаеши бо молитися о нас, грешных, пред Престолом Сына Твоего и Бога нашего, еже отвратити гнев Его, праведно на ны движимый, и помиловати всех верно вопиющих: Аллилуиа.
Икос 6
Возсиявает в душах наших, скорбию и унынием омраченных, благодатнаго утешения свет, и сердца наша веселия и радости исполняются, егда Ты, Владычице наша Преблагая, вразумляеши нас вопити к щедрому Богу, да милостив будет нам, грешным, и простит нам согрешения наша. Не премолчи убо, Владычице, молящися о нас, зовущих Ти со умилением:
Радуйся, скорбь нашу в радость претворяющая.
Радуйся, неизреченную сладость верным изливающая.
Радуйся, духовных очей наших прозрение.
Радуйся, скорбящих отрадо и увеселение.
Радуйся, в скорбех и недузех долготерпению нас научающая.
Радуйся, немощных благодатным покровом Твоим покрывающая.
Радуйся, Всеблагая Владычице, молений наших скорая Услышательнице.
Кондак 7
Хотящи явити токи милостей и щедрот от иконы Твоея Услышательницы, сию не токмо в Горе Афонстей, но и в подобиих ея новыя возжегши светильники, во иных градех и весех прославила еси, да спасаемии Тобою от бед Сыну Твоему вопиют: Аллилуиа.
Икос 7
Новое чудо милосердия Твоего зрим, Пречистая, в явлении чудотворнаго образа Твоего, к немуже припадающе и помощи от Тебе просяще, и Тобою вразумляеми и наставляеми вопием Ти:
Радуйся, теплая Ходатаице о живущих в жребии Твоем — Святей Горе Афонстей.
Радуйся, обитающим зде всех благ Подательница.
Радуйся, на всяком месте призывающих Тя спасающая.
Радуйся, от бед и напастей всех заступающая.
Радуйся, иконам Своим силу чудодействовати даровавшая.
Радуйся, ликом Твоим нас утешающая.
Радуйся, Всеблагая Владычице, молений наших скорая Услышательнице.
Кондак 8
Странно и сумнительно неверующим слышати, Мати Царя Небеснаго, како на икону Твою святую вернии людие очима своима и умиленными душами взирающе, от скорбей избавляются и от бед сохраняются. Мы же, внимая слову Твоему, Владычице, реченному к первописанней иконе Твоей: «Благодать Рождшагося от Мене и Моя с сею иконою да будет», — веруем, яко и сия икона Твоя «Услышательница» благодать Твою источает. Темже благоговейно покланяющеся, лобызаем ю, вопиюще Богу: Аллилуиа.
Икос 8
Всем верным утешительно есть взирати на святую икону Твою, Владычице, на нейже зрим Тя, на руку Твоею Предвечнаго Младенца Господа нашего Иисуса Христа держащую, Емуже покланяющеся боголепно яко Сыну Твоему и Богу нашему, Тебе, истинней Богородице, со умиленнием глаголем:
Радуйся, горняго и дольняго мира Всецарице.
Радуйся, Небесе и земли Владычице.
Радуйся, Путеводительнице к Небу первейшая.
Радуйся, со Ангелом Хранителем — Хранительнице наша усердная.
Радуйся, любящих Сына Твоего чады Своими именующая.
Радуйся, молитвы наша приятными Богу соделовающая.
Радуйся, Всеблагая Владычице, молений наших скорая Услышательнице.
Кондак 9
Всякаго естества Ангельскаго превысшая явилася еси, Пресвятая Дево, Бога бо зачала еси плотию, Невместимаго во утробе Твоей вместила еси. Темже вси роди блажат Тя по долгу, благословенная Марие Богородице, от востока бо и до запада хвально имя Твое; иноков же лицы Покровительницу Тя свою именуют, наипаче же подвизающиися в жребии Твоем — Горе Афонстей, юже особым благоволением Твоим осенила еси, многая чудеса в ней содевающи и милости Твоя богатыя насельником ея являющи, да благодарно вопиют о Тебе Богу: Аллилуиа.
Икос 9
Ветии человечестии недоумеют восхвалити по достоянию славное, Владычице, иконы Твоея явление и дивная чудотворения Твоя, людем православным источаемая. Мы же, неисчетныя чудеса, иконою Твоею являемая, видяще, душею и сердцем радуяся, Тебе глаголем:
Радуйся, радость благодатную нам изливающая.
Радуйся, утешение духовное нам подающая.
Радуйся, на Небесех царствующая и нас доле не оставляющая.
Радуйся, житие наше земное во благо устрояющая.
Радуйся, покаянием нашим двери райския нам отверзающая.
Радуйся, вечною радостию души наша озаряющая.
Радуйся, Всеблагая Владычице, молений наших скорая Услышательнице.
Кондак 10
Спасти хотящи люди Своя от обдержащих скорбей и болезней, даровала еси нам, Владычице, честную икону Твою Услышательницу, да видяще являемую Тобою милость, вопием со умилением Богу, усыновившему нас Тебе при Кресте Своем и даровавшему нам таковую Путеводительницу на Небо: Аллилуиа.
Икос 10
Стена еси заступления, Преблагословенная Дево, и столп крепок от лица вражия всем подвижником благочестия: Тебе бо дадеся велия сила на темныя силы адския. Сего ради вернии согласно Тебе зовут:
Радуйся, матернею любовию Твоею весь мир христианский объемлющая.
Радуйся, сострадания к страждущим преисполненная.
Радуйся, на стезю спасения верных наставляющая.
Радуйся, к благочестию и целомудрию жизнь нашу направляющая.
Радуйся, обителей иноческих неусыпная Блюстительнице.
Радуйся, домов и семейств благочестивых неустанная Хранительнице.
Радуйся, Всеблагая Владычице, молений наших скорая Услышательнице.
Кондак 11
Пение наше, не довлеющее к достойному прославлению милостей Твоих, Преблагословенная, обаче от полноты любве и усердия Тебе приносимое, не презри и не отвратися от нас, недостойных, но помози нам, Всеблагая, покаянием очиститися от скверны греховныя и преуспети в чистем и богоугоднем житии, да воспоминая неисчетная чудотворения Твоя, вопием Верховному Творцу чудес Богу: Аллилуиа.
Икос 11
Светоподательными лучами чудес святая икона Твоя немерцаемо сияет, Всемилостивая Владычице, и весь мир христианский благодатно просвещает, прогоняющи всякое вражие действо силою Божиею, от нея исходящею. Сего ради грядут к ней от лет древних на поклонение православных собори, умиленно воспевая благохваления таковая:
Радуйся, руце Твои за ны ко Господу простирающая.
Радуйся, непрестанно Ему молящаяся о нас.
Радуйся, недужным источник исцелений неоскудный.
Радуйся, разслабленным телом и духом врачевание скорое.
Радуйся, николиже верных заступлением не оставляющая.
Радуйся, во всем упование на Бога имети нас научающая.
Радуйся, Всеблагая Владычице, молений наших скорая Услышательнице.
Кондак 12
Благодать Божия, причастная иконе Твоей, Услышательницею нареченней, влечет к ней всех скорбящих и обремененных, и не тщи отходят они от сего источника Твоих милостей и щедрот: в скорбех отраду, в напастех защиту, в болезнех цельбу неоскудно получая, и благодарственно вопиют Сыну Твоему и Богу хвалебную песнь: Аллилуиа.
Икос 12
Поюще чудеса Твоя, Владычице, хвалим Тя, яко Живоносный Источник благодати, яко неистощимую реку чудес, и припадая усердно ко святей иконе Твоей, лобызаем ю с сердечною любовию и молим Тя: воззри на нас милосердием Твоим, смиренно приносящих Ти песни таковыя:
Радуйся, бедствующим благая Помощнице.
Радуйся, молящихся скорая Услышательнице.
Радуйся, яко в светлую ризу непорочности облещися нам пособствуеши.
Радуйся, яко сретению Жениха Христа предуготовляти нас тщишися.
Радуйся, стати одесную Бога на Страшнем Суде Христовом нам ходатайствующая.
Радуйся, внити в брачный чертог Сына Твоего и Бога нашего помогающая.
Радуйся, Всеблагая Владычице, молений наших скорая Услышательнице.
Кондак 13
О Премилостивая Мати Сладчайшаго Господа нашего Иисуса Христа, во святей иконе Твоей Услышательницею нарекшаяся! Приими милостиво сие малое моление наше и исполни во благих прошения наша, даруй нам вся потребная к жизни и благочестию, избави нас от бед, болезней и печали и Царствия Небеснаго наследники всех сотвори, верно вопиющих Богу: Аллилуиа.
(Этот кондак читается трижды, затем икос 1 и кондак 1)
Молитва
О Преблагословенная Владычице, Приснодево Богородице, скорая Услышательнице всех, к Тебе с верою прибегающих! Призри с высоты Небеснаго величия Твоего на нас, к чудотворному Твоему образу припадающих и, услышав смиренную молитву нашу, умоли Сына Твоего и Бога нашего да сохранит в мире и благоденствии страну нашу, да укрепит Церковь Православную и непозыблему соблюдет ю от неверия, ересей и раскола. Избави, о Всеблагая, всех с верою Тебе молящихся, от падений греховных, от навета злых человек, от бед, скорбей и болезней; даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя в Троице славимаго Бога: Отца и Сына и Святаго Духа. Аминь.
ИКОНА БОЖИЕЙ МАТЕРИ «УСЛЫШАТЕЛЬНИЦА»
Сведения об афонской иконе «Услышательница» можно почерпнуть из жизнеописания преподобного Космы Зографского, подвизавшегося на Афоне в конце XIII — начале XIV вв. В житии описывается случай из первых лет иноческой жизни преподобного Космы, когда Царица Небесная благоволила дать ему во очию узреть Свое трогательное попечение о насельниках обители. Преподобный Косма, подвизавшийся в Зографском монастыре, пришел однажды в Ватопедский монастырь на храмовый праздник Благовещения. Здесь увидел он в церкви Жену царственной красоты и величия, Которая сама распоряжалась всем в церкви во время службы, а также и за трапезой.
Косма недоумевал, каким образом очутилась здесь на Афоне женщина, куда не ступала нога ни одной из них, и почему иноки допускают Ее присутствие здесь. Размышляя над этим, он возвратился в Зограф к своему старцу. Рассказав об увиденном на празднике, он чистосердечно поведал все свои сомнения и размышления по этому поводу. «Как выглядела эта Жена? Какое было одеяние на Ней?» — спросил его духовный отец. И когда Косма описал Ее, старец со вздохом заметил: «Неужели ты не узнал, что за Жена явилась тебе в обители, посвященной Божественной Марии? Это была не простая смертная женщина, а сама Царица нашей Святой Горы и всея твари!»
Спустя некоторое время, оставшись по окончании службы в храме в одиночестве, преподобный Косма остановился перед иконой Богоматери. Желая получить от Господа указание на дальнейшее течение своей иноческой жизни, он обратился с горячей молитвой к Божией Матери: «Пресвятая Богородице! Помолись Сыну Твоему и Богу, да наставит меня на путь спасения!» Едва только он произнес это, как услышал голос Божией Матери: «Сыне и Боже Мой! Научи раба Твоего Косму, как ему спастись». И тотчас же последовал ответ на это моление: «Пусть удалится из монастыря в безмолвие».
И Косма последовал этому небесному откровению. Во исполнение такой воли Божией, получив благословение от своего настоятеля, он удалился в соседнюю пустынь, высек себе в скале пещеру и провел здесь всю свою жизнь в непрестанных иноческих подвигах. За чистоту своей жизни и строгие подвиги дивный отшельник был удостоен от Бога дара чудотворений. Икона же, перед которой молился святой Косма и от которой он слышал голос, была названа «Услышательница». Велика поистине любовь Царицы Небесной к инокам Святой Горы, трогательно Ее материнское попечение о нуждах их. Этот образ Божией Матери и сейчас находится в соборном храме Зографского монастыря, и помещается в алтаре.
С Афонской иконы «Услышательница» было сделано много списков, которые разошлись по всему православному миру. Некоторые из них также прославились чудотворениями.
Один из таких чудотворных списков ныне находится в женском монастыре иконы Божией Матери «Услышательница» села Фасова Макаровского района Киевской области.
Празднование: 19 марта (н. ст.)
Тропарь, глас 4
К Богородице притецем, сущии в бедах, и святей иконе Ея тако возопием: О Владычице мира, приими непрестанное и усердное благодарение наше, яко во дни лютых обстояний Ты, Всеблагая Мати, дивно верных раб Твоих сохраняеши и от наветов злых духов и человеков незримо покрываеши.
Кондак, глас 6
Не имамы иныя помощи, не имамы иныя надежды, разве тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.
Кондак 1
Взбранней Воеводе Царице небесе и земли, даровавшей нам пречудную икону «Покрывающая», благодарственное приносим пение. Ты же, яко Благосердая Мати, не отрини нашего сего моления, но благоволи прияти е, сподобив вопити Тебе тако: Радуйся, Владычице мира, от наветов злых духов и человеков нас покрывающая.
Икос 1
Ангельский глас услыша святая Анна извествующ: «Ты зачнеши и родиши Дщерь, Преблагословенную Марию; в Ней благословятся вся племена земная и приидет спасение всему миру». Сие ведуще возопием Богородице:
Радуйся, Мати Сына Божия.
Радуйся, Пренепорочная Дево.
Радуйся, Спаса душ наших родившая.
Радуйся, грешных с Богом примирившая.
Радуйся, Невместимаго вместилище.
Радуйся, носило всего Божества.
Радуйся, Божие к смертным благоволение.
Радуйся, смертных к Богу дерзновение.
Радуйся, честнейшая Херувим.
Радуйся, славнейшая без сравнения Серафим.
Радуйся, ада и смерти попрание.
Радуйся, вечныя жизни дарование.
Радуйся, Владычице мира, от наветов злых духов и человеков нас покрывающая.
Кондак 2
Видяще святыя Твоя родителие Иоаким и Анна, яко Ты еси, Пречистая, плод Благословенный, возблагодариша Бога и пред дверьми храма положиша обет посвятити Тя Господу, поя Ему: Аллилуиа.
Икос 2
Разум совершенный Ты Сама стяжала еси, Богородице, воспитавшися во Святая Святых, тако не престаеши умудряти и просвещати светом богоразумия и вся христианы, вопиющия Ти таковая:
Радуйся, к Богопознанию приводящая.
Радуйся, к свету истины прельщенныя обращающая.
Радуйся, страх Божий в сердца вселяющая.
Радуйся, благоговети пред святынею научающая.
Радуйся, ревностию ко спасению воодушевляющая.
Радуйся, духовное нечувствие в нас подавляющая.
Радуйся, храмы Божия почитати внушающая.
Радуйся, в них отраду находити вдохновляющая.
Радуйся, жажду Святаго Причащения возбуждающая.
Радуйся, веру и любовь к Богу воспламеняющая.
Радуйся, чистоты и целомудрия Поборнице.
Радуйся, добрыя христианския жизни Споспешнице.
Радуйся, Владычице мира, от наветов злых духов и человеков нас покрывающая.
Кондак 3
Сила Вышняго осени Тя, Благодатная, егда Архангел Гавриил благовествоваше Ти о безсеменном зачатии Сына Божия, Спасителя миру. Прияв сию благую весть со смирением, яко раба Господня, возопила еси Богу: Аллилуиа.
Икос 3
Имуще во утробе Христа Жизнодавца, востекла еси, Благословенная, к южике Своей, праведней Елисавете, и целовастася обе матери, радуяся о Бозе Спасе нашем. Сего ради, яко источнику святыя радости, вопием Ти сице:
Радуйся, тяжкое житие наше облегчающая.
Радуйся, лютыя беды и напасти отгоняющая.
Радуйся, от душевныя туги и уныния спасающая.
Радуйся, безпомощным на помощь ускоряющая.
Радуйся, испытания Божия за благо приимати указующая.
Радуйся, в самих страданиях утешение подающая.
Радуйся, яко Тобою злыя начинания пресекаются.
Радуйся, яко тобою добрая желания наша исполняются.
Радуйся, огнем матерния Твоея любве души согревающая.
Радуйся, благодатию Святаго Духа нас озаряющая.
Радуйся, всех скорбящих и угнетенных Мати Благосердая.
Радуйся, всего мира христианского Заступнице усердная.
Радуйся, Владычице мира, от наветов злых духов и человеков нас покрывающая.
Кондак 4
Буря недоумения смущает ми ум, како возмогу недостойными усты восхвалити Тя, Пресвятая Дево, за Твое великое нам вспоможение. Темже, величая неисчетныя Твоя милости, смиренномудренно пою Вседержителю Богу: Аллилуиа.
Икос 4
Слышаша Вифлеемстии пастырие Ангелов, поющих Христово Рождество, текше в пещеру, обретоша тамо Богородительницу, на руках держащую Превечнаго Младенца. С ними в веселии духовнем и мы Тебе, яко общей Матери, глаголем тако:
Радуйся, младенцев воспитание.
Радуйся, отроком смысла Подательнице.
Радуйся, юношей Руководительнице.
Радуйся, добрых дев величание.
Радуйся, возрастных и мужей премудростию обогащающая.
Радуйся, жен стыдением и кротостию наделяющая.
Радуйся, старцев благоговейных сладкое успокоение.
Радуйся, стариц боголюбивых тихое прибежище.
Радуйся, честных браков устроение.
Радуйся, вражды и ссоры между единокровными разрушение.
Радуйся, благочестивых семейств благословение.
Радуйся, девства похвало и возвышение.
Радуйся, Владычице мира, от наветов злых духов и человеков нас покрывающая.
Кондак 5
Боготечною звездою являешися, Царице Небесная, всем под покров Твой всемощный прибегающим и непрестанно в умилении сердечнем вопиющим к Богу: Аллилуиа.
Икос 5
Видя праведный Симеон Тя, пришедшую с Младенцем Иисусом во храме представитися Господеви, рече: «Тебе же Самой душу пройдет оружие», проразумевая матерния Твоя страдания о Сыне Твоем Божественнем и о всех гонимых за имя Его святое. Сего ради зовем Ти:
Радуйся, пастырей Церкви от мира поносимых прославление.
Радуйся, рабов Божиих осмеиваемых ободрение.
Радуйся, стоящих за правду защищение.
Радуйся, томимых горькими работами облегчение.
Радуйся, яко невинно осужденных свобождаеши.
Радуйся, яко из изгнания скоро возвращаеши.
Радуйся, во узах седящих благодатно посещающая.
Радуйся, терпеливых страдальцев предвкушением блаженства услаждающая.
Радуйся, сердца злых людей, враждующих противу нас, смягчающая.
Радуйся, советы лукавыя и коварство их разоряющая.
Радуйся, от разбойников на пути ны охраняющая.
Радуйся, татей и тайных убийц от домов наших отводящая.
Радуйся, Владычице мира, от наветов злых духов и человеков нас покрывающая.
Кондак 6
Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных, благодарственно о Тебе поющих Богу: Аллилуиа.
Икос 6
Возсия Божественный свет во Египте и падоша тамо идоли, егда бежала еси, Пречистая, с Богомладенцем Иисусом, спасаяся от убийства Иродова. Ты убо озаряеши светом Боговидения умы и всех удаляющихся прелестей суетнаго мира, исторгая из душ их кумиры гнездящихся тамо губительных страстей. Темже превозносим Тя словесы сими:
Радуйся, сумнящихся в вере вразумление.
Радуйся, гордых умом своим смирение.
Радуйся, озлобленных и гневом палимых укрощение.
Радуйся, ропщущих на Промысл Божий с тяготами жизни примирение.
Радуйся, яко дерзких ругателей Бога и Святыни Его незримо караеши.
Радуйся, яко заблуждших на путь спасения наставляеши.
Радуйся, суеверных и гадателей посрамление.
Радуйся, развращенных и нечестивых обличение.
Радуйся, яко душевредная учения низлагаеши.
Радуйся, яко истину познавати помогаеши.
Радуйся, яко мрак хулы, срамословия и всякия лжи разсеяваеши.
Радуйся, светом святаго Евангелия люди просвещаеши.
Радуйся, Владычице мира, от наветов злых духов и человеков нас покрывающая.
Кондак 7
Хотящи николиже отлучатися от рожденнаго Тобою Спасителя мира, Ты, Богоблаженная, пребывала еси с Ним неотлучно во граде Назарете, детоводя и питая Его яко человека, и поя в сердце Своем, яко Богу: Аллилуиа.
Икос 7
Новую показуя матернюю любовь к Сыну Твоему, со скорбию искала еси Его, двоюнадесятилетняго отрока, во граде Иерусалиме в праздник Пасхи, мняще Его в дружине суща. Ведуще таковое Твое сердоболие, со умилением вопием Ти:
Радуйся, обидимых и огорченных возвышающая.
Радуйся, ненавидимых и всеми отверженных честию величающая.
Радуйся, убогих и нагих одеяние.
Радуйся, нищих и разоренных питание.
Радуйся, бездомных, странных, вдов и сирот призрение.
Радуйся, неимущим работы поможение.
Радуйся, путешествующим благополучное к дому возвращение.
Радуйся, заблуждших в пути к жилищу приведение.
Радуйся, детям неудобоучащимся разум обновляющая.
Радуйся, умом и нравом простых Своею помощью не оставляющая.
Радуйся, ненадежных надеяние.
Радуйся, уповающих на волю Божию наслаждение.
Радуйся, Владычице мира, от наветов злых духов и человеков нас покрывающая.
Кондак 8
Странное и предивное Твое попечение бысть о христианех на всех путех их жизни многомятежней и многотрудней. Сего ради, имея в Тебе толико Милосердую и независтную Помощницу, вси облагодетельствованнии Тобою велегласно поют Богу: Аллилуиа.
Икос 8
Вся была еси со Христом при служении Его роду человеческому, како и божественный евангелист Лука повествует о Тебе, глаголя: «Мати Твоя и братия вне стоят видети Тя хотяще». Мним, яко Ты, Всеблагая Мати, неотступно пребываеши и со всеми труждающимися во славу Божию, восхваляющими Тя тако:
Радуйся, правителей, яко слуг Божиих, поставляющая.
Радуйся, сущих во власти к торжеству добра направляющая.
Радуйся, святителей правилом веры и образом благочестия украшающая.
Радуйся, пастырей ревностию о спасении чад духовных снабдевающая.
Радуйся, наставников совершенный разуме.
Радуйся, учащихся в науках преуспеяние.
Радуйся, вождей и воинов к защите веры и отечества побуждающая.
Радуйся, инокам и инокиням в борьбе с прилогами мира и плоти пособляющая.
Радуйся, судей святое зерцало правды.
Радуйся, врачей искусное больных врачевание.
Радуйся, земледельцев Соработнице и Благая Помощнице.
Радуйся, всех честне трудящихся покой и надежное пристанище.
Радуйся, Владычице мира, от наветов злых духов и человеков нас покрывающая.
Кондак 9
Всяк возраст верных благопользуется Твоим попечением, Всемилостивая Мати, яко всегда к Тебе прибегающим душеполезное даруеши, потребная в житии доставляеши и усердно ходатайствуеши за ны, немощныя и грешныя, у Престола Господа Славы, Емуже поем: Аллилуиа.
Икос 9
Ветия многовещанныя не могут изглаголати Твоея матерния печали, при Кресте Сына Твоего бывшей, егда видела еси Его страждуща за вся человеки мукою неизглаголанною. Темже, яко искушенней по всяческим и сострадати в самых тяжких скорбях и лишениях нам могущей, взываем Ти:
Радуйся, слепых прозрение.
Радуйся, глухих слышание.
Радуйся, хромых хождение.
Радуйся, раслабленных телом исцеление.
Радуйся, недужных здравие.
Радуйся, в злоключения впадших земныя суеты познание.
Радуйся, стужаемых от бесов избавление.
Радуйся, поврежденных умом просветление.
Радуйся, неисцельно больных на Свои всемощныя руце приемлющая.
Радуйся, от злых навыков, опивства, брани и игралищ изъемлющая.
Радуйся, отчаянных грешников моления не отвергающая.
Радуйся, от пагубнаго безволия их исхищающая.
Радуйся, Владычице мира, от наветов злых духов и человеков нас покрывающая.
Кондак 10
Спасти хотя мир, Иже всех Господь, сый на Кресте, дарова всему миру Пресвятую, Премилосердную Матерь, егда изрек Пренепорочней и возлюбленному ученику: «Се сын Твой» и «Се Мати твоя». Благодаряще за сие Всеблагаго Бога, глаголем Ему: Аллилуиа.
Икос 10
Стена крепка явилася еси по завету Господа, Преблагословенная, даруя всем благоденствие, мир, отраду и радость, яко и Сама все сие первая получила еси от Воскресшаго Христа Спасителя, услышав от Него приветственный глас: «Радуйся!». Сего ради ублажаем Тя тако:
Радуйся, всякую ненависть, злобу и вражду в нас укрощающая.
Радуйся, мир о Дусе Святе в сердце вселяющая.
Радуйся, зависть, клевету, ревность и злопамятство истребляющая.
Радуйся, братолюбием нас ущедряющая.
Радуйся, от глада, хлада, труса, потопа, огня и меча ограждающая.
Радуйся, хлебом насущным нас питающая.
Радуйся, смертоносную язву прекращающая.
Радуйся, гнев Божий праведно на ны движимый, утоляющая.
Радуйся, праведных дел наших поспешение.
Радуйся, на всех путех жизни нашея промышление.
Радуйся, родителей благонравием детей утешающая.
Радуйся, рабов Божиих тихим и безмолвным житием награждающая.
Радуйся, Владычице мира, от наветов злых духов и человеков нас покрывающая.
Кондак 11
Пение наше смиренное, от полноты любве и усердия Тебе приносимое, не презри, Богоневесто, и не отвратися от нас, грешных и недостойных, но помози нам очиститися от всякия скверны плоти и духа, да возможем достойно и праведно пети Богу: Аллилуиа.
Икос 11
Светом руководствующим являлася еси Апостолом, Богородительнице, по вознесении Сына Твоего на небо. Таковою пребываеши даже до сего дне всем хотящим спаститися и в разум истины приити. Не лиши, о Всеблагая, Твоего святаго водительства и нас, в житейском море треволнений обуреваемых, обаче от сердца приносящих Тебе благохваления таковая:
Радуйся, нечистыя помыслы пожигающая.
Радуйся, от греховных чувств отрезвляющая.
Радуйся, искушения и соблазны от нас прогоняющая.
Радуйся, к покаянию и исправлению подвизающая.
Радуйся, слезами сокрушения бездну беззаконий наших омывающая.
Радуйся, духовно бодрствовати нам помогающая.
Радуйся, ум и сердце к горнему возводящая.
Радуйся, все земное презирати понуждающая.
Радуйся, к трезвению и молитве приводящая.
Радуйся, блаженство духа тем уготовляющая.
Радуйся, подвижников благочестия явное подкрепление.
Радуйся, всех верных дивное спасение.
Радуйся, Владычице мира, от наветов злых духов и человеков нас покрывающая.
Кондак 12
Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях, находящих на ны от враг видимых и невидимых, умиротвори наша сердца, злобою и враждою исполненныя, да утешеннии Тобою, радостно зовем Богу: Аллилуиа.
Икос 12
Поюще честное Твое Успение, прославляем и Покров Твой святый, распростертый над всем миром, наипаче же родом христианским, прославляющим Тя тако:
Радуйся, покаянием к исходу от сея жизни нас приуготовляющая.
Радуйся, болезньми от грехов очищающая.
Радуйся, яко от напрасныя смерти сохраняеши.
Радуйся, яко последняго напутствия достойныя сподобляеши.
Радуйся, скорое разрешение души от тела в предсмертных муках посылающая.
Радуйся, мирную кончину дарующая.
Радуйся, горьких мытарств избавляющая.
Радуйся, христианского погребения не лишающая.
Радуйся, ко Господу выну о нас предстательствующая.
Радуйся, в жизни и по смерти с нами пребывающая.
Радуйся, страха смертнаго нас избавляющая.
Радуйся, Радосте наша, двери райския нам отверзающая.
Радуйся, Владычице мира, от наветов злых духов и человеков нас покрывающая.
Кондак 13
О Владычице мира, приими сие малое благодарение наше, от всего сердца Тебе приносимое, и не попусти нам николиже охладевати в сем благодарном чувстве, но вразуми нас всегда помнити Твоя неисчестныя милости и со слезами умиления вопити о Тебе Богу: Аллилуиа.
(Этот кондак читается трижды, затем икос 1 и кондак 1) Молитва
О Пресвятая Дево Богородице, Премилостивая Мати всех христиан, наипаче же скорбящих, гонимых и многоразличными недугами одержимых! Аз, яко нищ и убог душею и телом, представ пред святым Твоим образом, со слезами умильно прошу Твоего благодатнаго подаяния, ничто бо доброе и благое во мне есть, весь обложен немощами, нищетою и убожеством: нозе мои не обувени, дабы поспешати ми на дела святыя и богоугодныя, руце мои загрязнены от множества содеянных мною беззаконий, очи мои потуплены от нечистыя совести, зане не возмогут взирати на благолепие красоты Твоея, явленныя нам в чудотворном Твоем образе «Покрывающая». Все лице мое потемнено и испещрено печатию безчисленных моих пороков и грехопадений. Несть во мне ни спасительныя веры, ни утешительныя надежды, ни благостныя любве. Аз есмь яко гнилостный сосуд, преисполненный всякия скверны: гордости, себялюбия, высокоумия, тщеславия, гнева, раздражительности, злобы, памятозлобия, недоброжелательства, зависти, ревности, осуждения, ропота, злословия, празднословия, лукавства, лести, обмана, лицемерия, уныния, нетерпения, малодушия, невоздержания душевных и телесных чувств, пристрастия, плотоугодия, всякаго сладострастия и иных тмочисленных страстей. И каково мое убожество духовное, таково же и телесное: болезни и напасти обдержаша мя и все житие мое, яко трость ветром колеблема, исполнено непостоянства, страха и всякия опасности. По глаголу святаго Апостола: беды от духов злобы поднебесных, беды от ненавидящих, обидящих и враждующих противу меня человеков, беды от зверей, скотов и гадов земных, беды от стихий мира — молнии, огня, воды, тлетворнаго воздуха, хлада, глада, беды от многих немощей и болезней моего тела, беды на пути и в дому, беды во дни и в нощи. Кто же мя поддержит, кто сохранит, кто от врагов избавит, кто к добродетели направит, кто болезни моя исцелит, кто утешит, упокоит, вразумит, наставит, спасет и помилует, аще не Ты, Пресвятая Мати, Заступница и Покровительница моя Всеблагая? Ты разсеянный по миру ум мой собери, помыслы от всякия скверны очисти, чувства, отравленныя всяким злом, освежи, волю мою, дряблую на все доброе, укрепи и от пагубнаго безволия мя избави, сердце от страстей свободи и святою любовию к Богу и ближним наполни, всю внутреннюю храмину мою переустрой и удобным жилищем Духа Святаго соделай. Не остави мя, Премилосердая Владычице, и в телеснем моем многоскорбнем житии: болезни потреби, враги видимыя и невидимыя разжени, злыя обстояния разруши, страх, приходящий от духов злобы и человеков, хотящих мя погубити, отжени, вся потребная и нужная ми даруй, бодрость духа пошли. Да обновленный, да очищенный, да утешенный Тобою, Царице моя Пресвятая, прославлю Святую Троицу: Отца и Сына и Святаго Духа и Твое дивное о мне попечение ныне и присно и во веки веков. Аминь.
Икона Божией Матери «Покрывающая»
В 30 км от Москвы, в Домодедовском районе, находится известный в ХХ веке Серафимо-Знаменский скит. В истории Русской Православной Церкви он знаменит высотою монашеской жизни его устроителей, впоследствии новомучеников и исповедников российских.
Серафимо-Знаменский скит был основан схиигуменией Фамарью (Марджанишвили, 1868-1936) в начале XX века по благословению великих старцев того времени: Алексия Зосимовского, Анатолия Оптинского и Гавриила Седмиезерского. Активное участие в создании скита, обсуждении планов по его внутреннему и внешнему устройству принимала духовный друг матушки великая княгиня преподобномученица Елизавета Федоровна (Романова). Закладка скита состоялась 9 августа 1910 года, 23 сентября 1912 года митрополит Владимир (Богоявленский), в последствии священномученик, освятил новосозданную обитель. Нива духовного окормления скита была уготована епископу Арсению (Жадановскому), священнослужителю в пятом поколении, одному из сонма новомучеников последнего времени, человеку высокой духовности, мудрости и чистоты. Со дня основания и до закрытия в 1924 году Серафимо-Знаменский скит был местом его уединенных подвигов. В 1916 году он становится духовником обители.
Обладая большим духовным опытом и прекрасным литературным даром, он оставил потомкам мемуары о великих подвижниках XX столетия — книгу «Воспоминания», ряд статей по истории Русской Церкви и богослужебных текстов, в том числе служба с акафистом Пресвятой Богородице в честь Ее иконы «Покрывающая». На этой иконе, по описанию епископа Арсения «Божия Матерь головным платком прикрывает и как бы от кого защищает Богомладенца, а Он держит в руке кисть винограда — эмблему Святого Причащения, при котором не страшны никакие невзгоды…»
Икону Божией Матери «Покрывающая» матушка Фамарь считала хранительницей и покровительницей скита и его насельниц, внушая мысль о необходимости молиться Царице Небесной и часто прибегать к причащению Святых Христовых Тайн. Вместе с сестрами в чувстве благодарности и умиления она воспевала Преблагословенной: «Ты, Всеблагая Мати, дивно верных раб Твоих сохраняеши и от наветов злых духов и человеков незримо покрываеши…»
Празднование в честь иконы Божией Матери «Покрывающая» приурочено к 6/19 марта — дню рождения владыки Арсения.
Празднование:
8 января (н. ст.)
Тропарь, глас 1
Преблагословенная Царице, Пречистая Дево Богородице, прославльшая Святую Гору Афонскую многими чудесы, от икон Твоих честных изливающимися. Сего ради пред образом Твоим, припадающе, молимся: избави нас от всякаго зла, недуги наша исцели, мир и успокоение в сердца наша низпосли и наследники Царствия Небеснаго, яко Мати Милосердная, сотвори.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву и потщися на умоление, предстательствующи присно, Богородице, чтущих Тя.
Кондак 1
Взбранной Воеводе и Благой Заступнице рода христианскаго, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: Радуйся, Благая Успокоительнице, мир и покой в сердца наша низпосылающая.
Икос 1
Ангела с Небесе послати чадом нашим исходатайствуй, Пресвятая, у Сына Твоего и Бога нашего, якоже и Тебе послан бысть Гавриил Архангел, и сподоби ны взывати Тебе сице:
Радуйся, рождением Своим родителей обрадовавшая.
Радуйся, со слезами многими у Бога испрошенная.
Радуйся, молитвы и поста светлое прозябение.
Радуйся, благочестивыя жизни красный плоде.
Радуйся, от младенства святаго послушания исполненная.
Радуйся, благочестием от сосца матерня напоенная.
Радуйся, любве всесветлое жилище.
Радуйся, милостей Господних сокровище.
Радуйся, Благая Успокоительнице, мир и покой в сердца наша низпосылающая.
Кондак 2
Видяще наше слезное родительское моление, умилосердися, Владычице, о чадех наших, возми их под Свой честный и благосветлый покров, да воззовут в веселии Богу: Аллилуиа.
Икос 2
Разум чадом нашим низпосли, еже како добре Ти послужити, и наполни сердца их премудростию Небесною, подающи едину ю возлюбити, земное же презрети, и не возбрани устом нашим взывати таковая:
Радуйся, детство свое при храме проведшая.
Радуйся, во святая святых возшедшая.
Радуйся, Единому Богу посвященная.
Радуйся, молившаяся Ему день и нощь.
Радуйся, чистоту и целомудрие измлада возлюбившая.
Радуйся, смирение свое всеусердно охранявшая.
Радуйся, молитвою к Богу присно пламеневшая.
Радуйся, похвало и радосте родителей святых.
Радуйся, Благая Успокоительнице, мир и покой в сердца наша низпосылающая.
Кондак 3
Сила Вышняго да осенит чада наша, Твоего ради неусыпнаго предстательства за них пред Сыном Твоим, да, познавше Твое матернее милосердие ко всем с верою притекающим к Тебе, воззовут Богу: Аллилуиа.
Икос 3
Имуще от Бога чад наших, не хощем зрети их в геенне огненней пребывающих, но записанных в книзе животней. Сего ради, Пречистая Дево, приклонися ко гласу моления нашего, взывающему Тебе:
Радуйся, Мати Бога и Слова.
Радуйся, святая святых большая.
Радуйся, Воспитательнице Сына Божия.
Радуйся, Кормилице Господа сил.
Радуйся, яко раждаеши Спасителя мира.
Радуйся, яко растиши Избавителя плененным.
Радуйся, яко носиши Наставника заблуждшим.
Радуйся, яко Сын Твой — Господь.
Радуйся, Благая Успокоительнице, мир и покой в сердца наша низпосылающая.
Кондак 4
Бурю видяще соблазнов многоразличных, умножившихся, яко песия мухи и скнипы, в пределех наших, к Тебе, Благодатная, взываем о чадех своих, да избегнут сих и вопиют Богу: Аллилуиа.
Икос 4
Слышаще глас Твой, глаголющий Сыну Твоему: «Приими всякаго молящагося Тебе и призывающа имя Мое на помощь», — простираем руце наша в молитве к Твоему милосердию, да возмеши чад наших под покров Свой и исполниши прошения наша таковая:
Радуйся, от уныния злаго чад наших избавляющая.
Радуйся, от безумнаго веселия их ограждающая.
Радуйся, в несении креста их укрепляющая.
Радуйся, в подвизех благочестия их утверждающая.
Радуйся, под покровом Твоим милостиво их сохраняющая.
Радуйся, здравие душ и телес им подающая.
Радуйся, усердная Наставнице целомудрия.
Радуйся, милостивая Взыскательнице заблуждших.
Радуйся, Благая Успокоительнице, мир и покой в сердца наша низпосылающая.
Кондак 5
Боготечная звезда утренняя, Сын Твой, Пресвятая Дево, да возсияет светом невечерним в сердцах чад наших во еже воззвати им Богу: Аллилуиа.
Икос 5
Видяще наше прилежное моление, не отврати лица Твоего от чад наших, аще и отвратятся Тебе, и услыши глаголы уст наших, вопиющих таковая:
Радуйся, яко научаеши чад наших имети разум на доброе.
Радуйся, на пути греха их запинающая.
Радуйся, правошествовати их наставляющая.
Радуйся, от лукавства злых человек их ограждающая.
Радуйся, в злострадании их укрепляющая.
Радуйся, благодарити Бога за все научающая.
Радуйся, Благая Ходатаице присно о чадех наших к Сыну Своему.
Радуйся, Споручнице их пред Творцем и Богом.
Радуйся, Благая Успокоительнице, мир и покой в сердца наша низпосылающая.
Кондак 6
Проповедует весь мир христианский Твое всегдашнее заступление о молящихся Тебе, сице и ныне услыши многоболезненное сие родительское моление о чадех наших, да воспевают Богу: Аллилуиа.
Икос 6
Да возсияет луча благодати в душах чад наших, да, просвещеннии Тобою, узрят путь, ведущий в живот вечный, и последуют по нем, сохраняеми под Твоим всемогущим покровом. Сего ради услыши ны, зовущия Ти таковая:
Радуйся, родителей на любовь благую к чадом своим подвигающая.
Радуйся, сердца чад, во еже родителей своих чтити, умиляющая.
Радуйся, просящим подающая разум.
Радуйся, верных озаряющая смыслы.
Радуйся, всех скорбящих Радосте.
Радуйся, умягчение злых сердец.
Радуйся, отрадо и утешение.
Радуйся, прибавление ума.
Радуйся, Благая Успокоительнице, мир и покой в сердца наша низпосылающая.
Кондак 7
Хотяще чадом нашим вечнаго спасения, со слезами предстоим пред честною Твоею иконою, Владычице, да не презриши моления нашего, зовущаго Сыну Твоему: Аллилуиа.
Икос 7
Новую покажи милость на чадех наших, Владычице, и неизследимыми судьбами Сына Твоего привлецы их под Свой благодатный покров, да усердно зовем Ти:
Радуйся, воспитание чад наших, во еже огражденными им быти муки вечныя.
Радуйся, воспитание чад наших, во еже наследовати им блаженство непрестающее.
Радуйся, пробуждение совести чад наших на покаяние.
Радуйся, питающая их плодами добротолюбия.
Радуйся, премилосердая Утешительнице всех скорбящих и обремененных.
Радуйся, неусыпающая Наставнице всех заблуждших и ослепленных.
Радуйся, Судии Праведнаго умоление.
Радуйся, многих согрешений прощение.
Радуйся, Благая Успокоительнице, мир и покой в сердца наша низпосылающая.
Кондак 8
Странствующе в юдоли сей многоскорбней по морю многомятежному страстей, чада наша где обрящут твердое пристанище, аще не в Тебе, Пречистая? Спутешествуй же им и настави их на путь истинный, да зовут Богу: Аллилуиа.
Икос 8
Всем еси Мати Милующая, Пречистая Дево, якоже Христос Спаситель рече Тебе, у Креста Его предстоящей: «Се, сын Твой», — указуя на избраннаго от человек. Сего ради вручаем чада наша в руце Твои и во смирении зовем Ти:
Радуйся, чад наших Благосердая Путеводительнице.
Радуйся, терния греховных страстей Милосердая Искоренительнице.
Радуйся, отраду в пустыни греха подающая.
Радуйся, в минуту скорби утешающая.
Радуйся, в землю обетования путеводствующая.
Радуйся, на воде упокоения веселящая.
Радуйся, совершенный разуме наставников и детоводителей.
Радуйся, благословение домов и семейств благочестивых.
Радуйся, Благая Успокоительнице, мир и покой в сердца наша низпосылающая.
Кондак 9
Всякаго блага исполни сердца и души чад наших, отгоняющи от них духа злосмраднаго безбожия, нечестия и блудодейства, господствующа в мире сем. Сохрани рабов Твоих в чистоте и целомудрии, да взывают во умилении Богу: Аллилуиа.
Икос 9
Ветий суемудренных, лжущих на Твое всемощное заступление, отжени, Мати Божия, от чад наших, да не поползнутся умом в душетленныя учения и не обратятся сердцем в похоти безместныя, но призри на ны, верно вопиющия:
Радуйся, добрым нравам чад наших научающая.
Радуйся, от злых навыков их избавляющая.
Радуйся, мудрых наставников Твоим рабом посылающая.
Радуйся, от худых сообществ их отвращающая.
Радуйся, благому учению внимати призывающая.
Радуйся, суетныя басни презирати помогающая.
Радуйся, Божие ко грешным благоволение.
Радуйся, кающихся пред Господем крепкое заступление.
Радуйся, Благая Успокоительнице, мир и покой в сердца наша низпосылающая.
Кондак 10
Спасти хотя мир, Христос Бог призва не праведники, но грешники на покаяние, сего ради молися Сыну Твоему о чадех наших, аще и пойдут на страну далече, обаче взысканнии Твоим матерним заступлением, возвратятся в сокрушении сердца к Отцу Небесному и воззовут Ему: Аллилуиа.
Икос 10
Стеною несокрушимою стани, Небесная Царице, чадом нашим, да Твоим предстательством избегнут змиева приношения, краснаго в снедь, последи же смертоноснаго, и возмогут чистым сердцем пети Тебе таковая:
Радуйся, избавляющая чад наших от ядовитаго зелия.
Радуйся, спасающая их от душепагубнаго пития.
Радуйся, от блудодейства их сохраняющая.
Радуйся, целомудрию их научающая.
Радуйся, потребление всякаго обольщения.
Радуйся, избавление всякаго смущения.
Радуйся, трезвения Поборнице.
Радуйся, мудрости Ходатаице.
Радуйся, Благая Успокоительнице, мир и покой в сердца наша низпосылающая.
Кондак 11
Пети Твое необоримое заступление выну сподоби чад наших, да обрящут Тебе крепкую Помощницу и Твоею благодатию отверзут уста своя воспевати Богу: Аллилуиа.
Икос 11
Светоприемною свещею житие чад наших соделай, да присно горят любовию к Тебе и Сыну Твоему, и не презри ны, зовущих Ти:
Радуйся, дым соблазнов разгоняющая.
Радуйся, мглу страстей просвещающая.
Радуйся, зрение хранити научающая.
Радуйся, блюсти чувствования вразумляющая.
Радуйся, щедрот неизреченных Мати.
Радуйся, побуждающая чад наших в благоговении Тебе предстояти.
Радуйся, утешение им в скорби живоносное.
Радуйся, от набега лукавых прибежище непреложное.
Радуйся, Благая Успокоительнице, мир и покой в сердца наша низпосылающая.
Кондак 12
Благодатию неизреченною Духа Святаго напитай сердца чад наших, еже возлюбити токмо Сына Твоего и Бога и Тебе, Преблагую Заступницу, да подвигшеся Тобою, зовут Царю всяческих: Аллилуиа.
Икос 12
Поюще Твое милосердие, имже милуеши и питаеши чад наших, молимся: не престай просити о них Сына Твоего, яко вся Тебе возможна суть, и услыши мольбы наша таковая:
Радуйся, от купели святаго Крещения чад наших Восприемнице.
Радуйся, к свету истины их Путеводительнице.
Радуйся, росу благодати Твоея им подающая.
Радуйся, млеком истины их питающая.
Радуйся, яко твориши чад наших земныя Ангелы.
Радуйся, яко претворяеши их в Небесныя человеки.
Радуйся, наследники Царствия Небеснаго их показующая.
Радуйся, в обителех Небесных их водворяющая.
Радуйся, Благая Успокоительнице, мир и покой в сердца наша низпосылающая.
Кондак 13
О Всепетая Мати Иисуса Сладчайшаго! Приими малое сие моление о чадех наших в воню благоухания духовнаго и возми их под Твой милосердный покров; еще же даруй им мыслити, глаголати и творити точию Тебе и Сыну Твоему угодная и посли им в жизни сей привременней вся полезная ко спасению душ их, да воспевают Богу: Аллилуиа.
( Этот кондак читается трижды, затем икос 1 и кондак 1)
Молитва первая
О Пречистая Богомати, Всецарице Успокоительнице! Услыши многоболезненное воздыхание наше пред чудотворною иконою Твоею, призри на чад Твоих, неисцельными недуги страждущих, ко святому образу Твоему с верою припадающих! Якоже птица крилома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Тамо, идеже надежда исчезает, несумненною надеждою буди. Тамо, идеже лютыя скорби превозмогают, терпением и ослабою явися. Тамо, идеже мрак отчаяния в души вселися, да возсияет неизреченный свет Божества! Малодушныя утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о Всемилостивая Царице! Ум и руки врачующих нас благослови, да послужат орудием Всемощнаго Врача, Христа Спаса нашего. Яко живей Ти, сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да чудотворную помощь скоро получивше, прославляем Живоначальную и Нераздельную Троицу, Отца и Сына и Святаго Духа, во веки веков. Аминь.
Молитва вторая
О Пресвятая Владычице Дево Богородице, Премилосердая Мати всех человек, спаси и сохрани под кровом Твоим чад наших, всех отроков, отроковиц, младенцев и во чреве матери носимых. Покрый их ризою Твоею, соблюди их в страсе Божием и послушании родителем, умоли Господа нашего и Сына Твоего, да дарует им вся полезная к душевному спасению. Вручаем их Твоему материнскому смотрению, яко Ты еси Божественный покров рабом Твоим. Аминь.
ИКОНА БОЖИЕЙ МАТЕРИ «УСПОКОИТЕЛЬНИЦА»
Святая Гора Афон сияет своими чудотворными иконами, как небо звездами, которые светят в ночной мгле. Одним из таких светил, ведущих нас ко спасению, является образ Божией Матери «Успокоительница», который издревле хранится в недрах Святого Афона и сокрыт от глаз праздных туристов. Этот образ открывается только истинным почитателям Божией Матери и ждет своего времени явления миру в последние времена, чтобы успокоить верных.
В уединенной молитве перед этой иконой, паломник невольно забывает об окружающем мире, и обращается к Царице Небесной с упованием, что Она одна не обманет наши ожидания.
На иконе представлен образ Богоматери с Младенцем в редком изводе, когда Христа изобразили спящим на руках Своей Матери. Кроткий лик Богородицы отражает глубокую душевную скорбь. Ее печальный взгляд, устремленный на Сына, говорит о том, что Ей известно о Его предстоящих страданиях и Своем бессилии изменить ход событий. Божия Матерь бережно охраняет спокойный младенческий сон Христа, Спасителя мира, Который на самом деле не спит, а ждет нашего покаяния, видя грехи и беззакония, которые творятся в мире. Неизмеримо велико терпение и великодушие Господа, неусыпно заботящегося о благе человека. Как мать бережет покой своего ребенка, так и Божия Матерь успокоит каждого, обращающегося к Ней со словами молитвы в своих душевных и телесных скорбях, и ниспошлет ему Свою небесную помощь и защиту. Возможно, с этим связано и название иконы.
История иконы, которая была написана в конце XVIII – начале ХIX века, неизвестна. Остается безвестным и иконописец, создавший со изволения благодати Духа Святаго этот дивный образ. Не смотря на то, что не сохранилось предание об этой иконе, мы имеем еще одну возможность увидеть прекрасные лики Божией Матери и Младенца, и надеемся, что благодать Божия оставит в душе читателя отрадное ощущение от знакомства с еще одной иконой, составляющей славу Святой Горы Афон.
Обратимся с молитвой к Пречистой Деве Марии. Жизнь того, кто поручает себя покрову Девы Пречистой, обновляется радостями духовными. И как подвижникам афонским Божия Матерь, ступив на святую землю Афона, принесла благодать Христову, заботу и покровительство, так и нам, с верою и благоговением сохраняющим заповеди Ее Сына, Иисуса Христа, мы искренне верим – подарит надежду, благословение и помощь, мир и успокоение душам нашим!