Акафист преподобномученице Великой княгини Елизавете и купно с нею пострадавших страстотерпцев алапаевских

Избранней угоднице Божией, преподобномученице великой княгине Елизавете, премудрей и всехвальней невесте Христовей, яко избавляемии тобою от искушений и бед, пение благодарственное и хвалебное восписуем ти молитвенницы твои, святая страстотерпице царственная. Ты же, яко имея велие дерзновение ко Всемилосердному Господу нашему, купно с пострадавшими с тобою мученики преславными, вознеси молитвы твоя о всех, величающих вы и взывающих сице:

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Икос 1

Ангелов Творец и всея твари Содетель и Промыслитель во всяцем народе и колене, имеяй верных чад Своих, от всеславнаго рода монаршескаго призва тя, святая мати наша Елизавето, ко служению великому в стране Российстей; ты бо от дний детства твоего навыкла еси исполняти волю Господню, и движимая благодатию Божиею, аки Руфь древняя, оставила еси народ твой, в земли Российстей отчизну новую преславно обретше. Мы же, вся сия ныне славяще, таковыя похвалы приносим:

Радуйтеся, агницы блаженнии, любовию к Богу издетска просвещеннии.

Радуйтеся, благодатными дарами Всесвятаго Духа озареннии.

Радуйтеся, богомудрии князие и мученицы благословеннии.

Радуйтеся, истинным благородством и подлинным богомыслием просиявшии.

Радуйтеся, глубину веры и высоту сострадания всем житием вашим явившии.

Радуйтеся, со Ангелы купно песнь победную Творцу воспевающии.

Радуйтеся, аки звезды многосветлии на небосклоне Небеснем сияющии.

Радуйтеся, и нас лучами добродетелей ваших озаряющии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 2

Видевше благолепие лица твоего, святая Елизавето, возрадовася зело благоверный князь Константин, и помышляя о красоте добродетелей твоих, воспе гимны хвалебныя Всеблагому Господу, возрастившему тя, аки крин среди терний и благодатию Своею преизобильно тя одарившему. Мы же, сие ныне воспоминающе, просим тя, благоверная княгине, приклони и к нам великое милосердие Всемогущаго Творца нашего, да сподобимся и мы купно с тобою во веки пети Ему: Аллилуиа.

Икос 2

Разумом богопросвещенным свыше одаренная, святая благоверная княгине Елизавето, возжадала еси паче всего о еже волю Господню выну исполняти, и, благодатию небесною укрепляемая, вземши крест свой, с кротостию и смирением понесла еси е, за вся Творца благодаряще. По тяжцем же убиении супруга твоего, егда сердце твое пронзи меч обоюдоострый, евангельски возглашала еси «Отче, прости ему, не ведал бо, что сотворил», посещением твоим убийцу супруга твоего к покаянию подвизая. Мы же, вся сия ныне поминающе, просим тя: сотвори купно с иными страстотерпцы алапаевстими молитвы за ны ко Господу Всемогущему, взывающих сице:

Радуйтеся, образ милосерднаго служения ближнему явившии.

Радуйтеся, Господа паче всего земнаго возлюбившии.

Радуйтеся, образ и подобие Божие в коегождем человеце зрящии.

Радуйтеся, нелицемерно заповеди Христовы исполнявшии.

Радуйтеся, кающимся грешником слезы утешительныя посылающии.

Радуйтеся, в несении скорбей и тягот немощныя укрепляющии.

Радуйтеся, за вся благодарити Христа научающии.

Радуйтеся, милосердие Божие к нам приклоняющии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 3

Силою благодати Христовыя укрепляемая, святая благоверная княгине Елизавето, по кончине супруга твоего, благовернаго князя Сергия, оставила еси мир сей с тленными благами его, и, отрешся от жития в чертозех царстих, облеклася еси в ризы иноческия, воспевая укрепившему тя Господу: Аллилуиа.

Икос 3

Имуще горячее желание послужити ближнему и восходити к Богу по лествице дел милосердия, вся труды твоя, богоблаженная Елизавето, посвятила еси Всенепорочней Матери Господа нашего, и сего ради пречудный храм Покрова Пресвятыя Богородицы и Приснодевы Марии воздвигла еси в обители твоея. Движимая благодатию Всесвятаго Духа, праведных жен Марфу и Марию, яко святых покровительниц трудолюбия и созерцания избрала еси, в добродетелех своих свято пути их последовавше. Мы же, светло празднующе святую память твою, мати Елизавето, купно с тобою алапаевстих соратников величаем и взываем вам сице:

Радуйтеся, к творению дел добрых всех нас подвизающии.

Радуйтеся, подлинными учениками Христа быти нас научающии.

Радуйтеся, с верою возносимым молитвам радостно внимающии.

Радуйтеся, вся благая прошения наша исполняющии.

Радуйтеся, всего мира христианскаго украшением явившиися.

Радуйтеся, следовати пути Марфы и Марии наставляющии.

Радуйтеся, благодать Святаго Духа хранити и преумножати понуждающии.

Радуйтеся, радостию Христовою души наша наполняющии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 4

Буря искушений греховных и суеты мирския не возмогла есть поколебати храмины духа твоего, святая мати Елизавето, ты бо, всецело упование на Христа Распятаго возложивше, в трезвении и богомыслии возрастающи, в царственном граде Москве обитель пречудную основала еси, идеже страждущии людие отраду и утешение обреташа. Сице молим тя: покрый и нас покровом молитв твоих, да воспоем о тебе Всемилосердному Богу нашему: Аллилуиа.

Икос 4

Слышавше богомудрыя советы святаго старца Зосимы, княгине Елизавето, в вере, надежде, любви к Богу и ближним укреплялася еси, и вверенному тебе малому стаду явилася еси воистину наставницею богомудрою и материю вселюбящею, научая сестер обители не токмо словом, паче же образом жития твоего служити страждущим и помощи взыскующим. Сего ради, просим тя купно с алапаевстими мучениками, да будите и нам стеною крепкою, прибежищем и заступлением в нуждех наших, к вам прибегающим и взывающим сице:

Радуйтеся, диадимы великокняжеския к стопам Спасителя возложившии.

Радуйтеся, Христа Распятаго паче славы царственныя возлюбившии.

Радуйтеся, Крест, аки скипетр, достойно и праведно носившии.

Радуйтеся, истину Божию и правду Христову обретати помогающии.

Радуйтеся, из глубин отчаяния пречудно вызволяющии.

Радуйтеся, бурю печалей духовною радостию разгоняющии.

Радуйтеся, елеем милосердия вашего раны душ наших заживляющии.

Радуйтеся, сироты и вдовицы, немощныя и обездоленныя под покров свой принимающии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 5

Богоявленная звезда, на небосклоне Церкви Российстей сияющая, воистину явилася еси, святая преподобномученице Елизавето, яко в подвизех монашеских и делех милосердия усердно подвизалася еси; купно со благоверными великими князьями за веру и Отечество живот твой положила еси и диадемою небесною увенчалася еси. Ныне с новомучениками и исповедниками росстийстими молишися о нас, с любовию пречестную память твою творящих, воспевая Господеви: Аллилуиа.

Икос 5

Видя помощь благодатную, посылаемую по молитвам святых покровителей твоих, преподобнаго и богоноснаго отца нашего Сергия Радонежскаго, златоустаго святителя Петра, митрополита Московскаго, возлюбленных учениц Христовых, преславных мироносиц Марфы и Марии, царственному пути жития добродетельнаго свято и праведно последовала еси, богопросвещенная мати наша Елизавето, делание внутреннее с помощью страждущим умело сопрягая, образ служения истинному Богу и ближним тако показуя и венценосных сродник твоих сему научая. Мы же, вся сия ныне поминающе, величаем вас, страстотерпцы алапаевстие, и взываем вам сице:

Радуйтеся, царственность вашу не в любоначалии, а в служении державе российстей полагавшии.

Радуйтеся, не ради блеска славы земныя, а в стяжании сокровищ Небесных подвизающиися.

Радуйтеся, от пристрастия к земным богатствам больныя души наша врачующии.

Радуйтеся, путие спасительныя нам указующии.

Радуйтеся, в вере истинней нас утверждающии.

Радуйтеся, от дорог погибельных и соблазнов душетленных нас удаляющии.

Радуйтеся, нести людем истину Христову подвизающии.

Радуйтеся, внутренний мрак душ наших Светом Христовым озаряющии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 6

Проповедницею милосердныя любве к ближнему воистину явилася еси, святая мати Елизавето, ибо обитель твоя бе не токмо тихою пристанию спасения, обаче и оплотом утешения и исцеления душ, от страстей изнемогающих. Твоим бо примером внимая, насельницы обители твоея скорбящия утешаху, больныя врачеваху, заблудшия наставляху, умирающия ко отходу в мир иной преуготовляху. Ты же, благоверная княгине, видя милосердия таковаго торжество, радостно воспевала еси Господеви: Аллилуиа.

Икос 6

Возсияша на Руси Святей многия угодницы Божии, от всякаго рода и чина прозябшии, и теми бо навеки украсися небосклон святыя Церкви: святители богомудри, преподобнии отцы и матери наша, подвиги своими Фиваиду Северную благоукрасившии, праведных мужей и жен сонм благословенный, образ жития богоугоднаго нам оставивших, и мучеников воинство, вкупе с ликом князей благоверных; их же подвигов подражателие и славы достойныя сонаследницы воистину явистеся вы, алапаевстии новомученицы, благоверною княгинею Елизаветою в страданиях укрепленныя. Молитеся ныне купно с благосветлым собором святых земли нашея о всех, вопиющих вам сице:

Радуйтеся, царственным путем во обители Небесныя шествовавшии.

Радуйтеся, к Царице Небесней святыя молитвы ваша возсылавшии.

Радуйтеся, Отца Небеснаго благосердие к нам приклоняющии.

Радуйтеся, велии муки в изгнании, Сына Божия ради, приявшии.

Радуйтеся, стяжати Дары Духа Святаго нас вразумляющии.

Радуйтеся, Святыни земли нашея свято и праведно почитати научающии.

Радуйтеся, уповати на Промысел Божий наставляющии.

Радуйтеся, в уповании таковем преславно нас утверждающии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 7

Хотяще некия неблагомысленныя людие оклеветати тя, святая страстотерпице царственная, приидоша в обитель твою, обаче зря святость жития твоего, уразумеша неповинность твою пред людьми российстими, иже и доныне, воспоминая подвизи твоя, умиленно о тебе Господеви воспевают: Аллилуиа.

Новая безбожная власть, не возмогла есть понудити тя, святая благоверная княгине Елизавето, оставити служение твое в церкви Российстей и сестер обители твоея. Заповеди Христовей о любви к ближнему последуя, любы ко Предвечному Господу в сердце твоем сохраняла еси и на благодатную помощь Его во обстояниих скорбных свято уповала еси. Вы же, князи благоверныя, такожде на Господа вся возлагавшии, во след святей Елизавете мужественно поидоша. Мы же, веру и верность вашу воспети желая, вопием вам сице:

Радуйтеся, благодатию Божиею во дни скорбныя чудесно утвержденнии.

Радуйтеся, клевету и гонения от врагов страны вашея претерпевшии.

Радуйтеся, за отступивший от Бога и царя народ российский молившиися.

Радуйтеся, об обращении заблудших присно Господа умоляющии.

Радуйтеся, от клеветы и ярости людския нас оберегающии.

Радуйтеся, водою прощения язвы беззаконий наших омывающии.

Радуйтеся, любовию истиною к ближнему сердца наша преображающии.

Радуйтеся, любовию ко Христу души наша наполняющии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 8

Странное и страшное крушение империи российстей созерцая и видя, яко безумнии людие глумляхуся над боговенчанным государем Николаем и святым семейством его, егда, аки вода потече кровь мученик, за правду лютыя страдания терпящих, вы, святии страстотерпцы, от рода царскаго прозябшии, на Царя Царствующих и Господа Господствующих все упование ваше возложили есте, купно со слуги верными, воспевая Ему: Аллилуиа.

Икос 8

Всяческия похвалы достойнии бысте, мученицы алапаевстии, егда во времена тяжкия, страну российскую в мрак неверия и ненавидения повергшия, честь и достоинство царское сохранили есте, благовернии угодницы Господни. Ты бо, великая княгине Елизавето, токмо верными сестры обители твоея и святителем Тихоном утешаемая, не возроптала еси, обаче пример благий крепкия веры и любви к ближнему явила еси, егда на третий день Святыя Пасхи, людие вероломныя взяша тя и в темницу ввергоша. Вы же, князие святии Сергие, Иоанне, Игоре, Константине и Владимире, кротце чести лишение, осмеяние и изгнание купно с преподобномученицею Елизаветою претерпели есте. Мы же, вся сия ныне поминающе, величаем вас сице:

Радуйтеся, исповедницы и мученицы добропобеднии и преславнии.

Радуйтеся, царственнии служителие Всемогущаго Царя Небеснаго прехвальнии.

Радуйтеся, Царицы Небесныя чада вернии и возлюбленнии.

Радуйтеся, всемощную силу благодати Божией познавшии.

Радуйтеся, путем вероотступничества и вероломства не последовавшии.

Радуйтеся, веру Христу и верность монарху своему ничем не запятнавшии.

Радуйтеся, венцы победныя и радость вечную стяжавшии.

Радуйтеся, благоверных правителей страны Российския достойнии сонаследницы явившиися.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 9

Вси чины Ангельския и святых собори, от века Господеви угодившии, с радостию прияша в лик свой умученных в земли российстей за веру Христову и царя Боговенчаннаго, страстотерпиц добропобедных; купно же с ними и вы, прехвальнии новомученицы алапаевстии: великая княгине Елизавето, князие Сергие, Иоанне, Константине, Игоре и Владимире, со слуги верными Варварою и Феодором, обители сотворшии себе в чертозех Царя Небеснаго, воспевая Ему песнь победную: Аллилуиа.

Икос 9

Вития многовещанныя не возмогут по достоянию воспети подвиги и страдания ваша, святии мученицы алапаевстии, яко вы, муки душевныя и телесныя претерпевши, превзошли есте отроков эфесских, и древним мучеником Христовым равночестнии воистину явистеся; купно с новыми страстотерпцы во славе велией и неизреченней предстоите Царю царствующих и Господу господствующих, и молитеся о всех нас, славящих имена ваша и поющих вам таковая:

Радуйся, святая мати Елизавето, образ истиннаго милосердия и любви ко Христу явившая.

Радуйся, святая Варваро, верность наставнице твоей до конца сохранившая.

Радуйся, святый Сергие, истинныя веры неустрашимый исповедниче, жертву богоугодную сотворивый.

Радуйся, святый Иоанне, благочестием, молитвою и страстотерпчеством Богу угодивый.

Радуйся, святый Константине, ризы твоя в крови агнчей убеливый.

Радуйся, святый Игоре, аки голубь, в обители Отца Небеснаго, добропобедно воспаривый.

Радуйся, святый Владимире, кончину свою предуведя, младость и живот Господеви отдавый.

Радуйся, святый Феодоре, купно с царственными мученики за Христа пострадавый.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Спасения вечнаго и венцев нетленных достигли есте, святии мученицы – братия Иоанне, Константине и Игоре, подобно древним отроком Вавилонским, сквозе пещь страданий, в чертоги Царя Небеснаго возшедшии купно со сродники — великим князем Сергием, иже с верным ему Феодором, аки Михаил Черниговский и болярин его Феодор, муки скорбныя ради Христа претерпевшими и князем Владимиром, верность даже до крови отцу земному и Отцу Небесному сохранившим. Ныне же, во славе Престолу Святыя Троицы купно с царем Николаем и иными страстотерпцы предстоите, воспевая песнь ангельскую: Аллилуиа.

Икос 10

Стене нерушимей и адаманту крепчайшему подобна бе вера ваша, добропобедныя мученицы алапаевстии, яко изгнанныя из царствующих градов в глубь земли российския, богомудрою княгинею Елизаветою наставляемии, пламенными молитвами, постом и трезвением, предуготовляли есте себе к кончине мученичестей. Вы бо, все упование на Христа Распятаго полагая, вослед апостолу помышляли есте, яко аще живете, Господеви живете, аще умираете, со Творцем сочетаетеся. Тако убо, благовернии князие Сергие, Иоанне, Игоре, Константине, Владимире купно с верными Варварою и Феодором смиренномудренно на Голгофу вашу востекли есте. Сего ради, мы таковые похвалы умиленно вам приносим:

Радуйтеся, багряницы царственныя на белыя ризы мученическия сменившии.

Радуйтеся, глубину страданий, от чести лишения безбожницами, претерпевшии.

Радуйтеся, высотою славы и венцами нетленными сего ради Христом увенчаннии.

Радуйтеся, аки звезды многосветлыя на небосклоне Церкви российстей возсиявшии.

Радуйтеся, о мире всего мира Творца неустанно умоляющии.

Радуйтеся, милосердие Божие к нам приклоняющии.

Радуйтеся, о спасении нашем Сына Божия усердно умоляющии.

Радуйтеся, дары Всесвятаго Духа стяжати помагающии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 11

Пение умиленное возносили есте Творцу всяческих, прехвальнии мученицы царственнии, егда нощию, аки татей, бесонравныя богоборцы, тайно увезоша вы из града Алапаевска и в пустынный кладезь ввергоша. Вы же, муки лютыя претерпевая, не возроптали есте и, подобно орлам небопарным, чистыми душами вашими вознеслися есте в чертози Царя Небеснаго, идеже великою и неизреченною славою увенчаннии воспеваете Всесвятей Троице ангельское пение: Аллилуиа.

Икос 11

Светильницы Божии, благодатию Святаго Духа возжженнии, воистину явилися есте, добропобеднии мученицы алапаевстии, ибо с высоты власти и славы низвергнутии, святою княгинею Елизаветою наученнии, возгласили есте: «Слава Богу за вся!» и на Голгофу свою взошли есте, постом и усердными молитвами к смерти лютой ся предуготовивши. Мы же, видяще добрая дела ваша, прославляем прославльшаго вас Господа, и к вам от всего сердца вопием:

Радуйтеся, светом вашим нашу тьму греховную разгоняющии.

Радуйтеся, теплотою любви вашея сердца наша хладная согревающии.

Радуйтеся, облаком благодати Божией от зноя житейскаго нас покрывающии.

Радуйтеся, палимыя зноем страстей, души наша прохлаждающии.

Радуйтеся, об утверждении в России веры истинныя Творца умоляющии.

Радуйтеся, любити и творити волю Божию нас научающии.

Радуйтеся, недузи телесныя и скорби душевныя исцеляющии.

Радуйтеся, отраду и утешение нам ниспосылающии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 12

Благодатию в горниле скорбей и тягчайших испытаний очищеннии, богоноснии страстотерпцы алапаевстии, купно со сродники вашими, боговенчанным царем Николаем, царицею Александрою, великими царевнами Ольгою, Татианою, Мариею и Анастасиею, цесаревичем Алексием, благоверными великими князьями Павлом, Димитрием, Георгием, Николаем и со слугами верными, Всемогущаго Бога нашего умоляете, от скорбей, недугов и суеты нас свобождаете, от враг видимых и невидимых исхищаете и подвизаете радостно Творцу о вас воспевати: Аллилуиа.

Икос 12

Воспевая преславное житие ваше, святии и всехвальнии новомученицы алапаевстии, величаем вас, добропобедныя подвизи ваша хвалим, яко дерзновенно Христа пред богоборцы исповедали есте и верность Ему чрез скорби, лишения и страдания пронесли есте, стяжавше благодать молитися за ны, вопиющия вам сице:

Радуйтеся, земли Уральския похвало и утверждение.

Радуйтеся, всея страны Российския драгоценное украшение.

Радуйтеся, всего мира христианскаго добропобедное утверждение.

Радуйтеся, сомневающихся и маловерных благодатное вразумление.

Радуйтеся, купно со всеми новомученики на пиру Агнчем присно торжествующии.

Радуйтеся, купно с древними страстотерпцы Христу гимны хвалебныя воспевающии.

Радуйтеся, купно с благоверными царями и князьями Царя Небеснаго величающии.

Радуйтеся, радостию духовною унылыя сердца наша преображающии.

Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 13

О, всехвальнии и достопочтеннии новомученицы Алапаевстии, смиренно просим вы, приимите милостивно убогия сия похвалы, возносимыя нами благочестиваго жития и мученическия кончины вашея ради и молим вас: умолите убо Превечнаго Бога нашего, во Святей Троице Единаго, да избавимся обстояний тягостных, во уныние нас повергающих и да сподобимся купно с вами и всеми новомученики и исповедники Российстими во веки Всемогущему и Всемилосердному Господу воспевати: Аллилуиа. Аллилуиа. Аллилуиа

Священный Синод на заседании 29 июля 2017 года одобрил (журнал № 65) новую редакцию акафиста святой преподобномученице великой княгине Елисавете.

Акафист святой преподобномученице великой княгине Елисавете.

Кондак 1

Избра́нная от ро́да держа́внаго дщерь Церкве Русския, любо́вию изоби́льною и милосе́рдием Бо́гу и бли́жним до́бре послужи́вшая, за ве́ру во Христа́ Го́спода на́шего ду́шу свою́ положи́вшая и венце́м сла́вы Христо́вы украше́нная, восхваля́юще по́двиги и страда́ния твоя́, с любо́вию воспева́ем ти си́це: Ра́дуйся, благове́рная княги́не Елисаве́то, преподобному́ченице достосла́вная.

Икос 1

А́нгельским попече́нием храни́мая и ма́терию твое́ю благоче́стию поуча́емая, в труде́х, моли́твах и ми́лостыни измла́да о́браз доброде́тельнаго жития́ яви́ла еси́. По кончи́не же ма́тере твоея́ и бли́жних сро́дников кре́стный путь, Го́сподем запове́данный, уразуме́ла еси́. Те́мже, дивя́щеся таково́му от ю́ности твоему́ избра́нию, со умиле́нием взыва́ем ти:

Ра́дуйся, от ю́ности Христа́ возлюби́вшая;

ра́дуйся, во младости нача́тки благоче́стия прии́мшая.

Ра́дуйся, Христо́ва а́гнице избра́нная;

ра́дуйся, страх Божий в душе восприявшая.

Ра́дуйся, доброде́тели ма́тере твоея́ наследствовавшая;

ра́дуйся, трудолю́бию и милосе́рдию е́ю науче́нная.

Ра́дуйся, се́рдцем в Бо́зе утвержде́нная;

ра́дуйся, с ве́рою и упова́нием крест твой поне́сшая.

Ра́дуйся, земли́ оте́чества твоего́ цве́те благоуха́нный;

ра́дуйся, чистото́ю жи́зни твоея́ Небеса́ возвесели́вшая.

Ра́дуйся, на служе́ние стра́ждущим Бо́гом избра́нная;

ра́дуйся, пред Го́сподем о нас те́плая моли́твеннице.

Ра́дуйся, благове́рная княги́не Елисаве́то, преподобному́ченице достосла́вная.

Кондак 2

Ви́де Госпо́дь благо́е се́рдца твоего́ изволе́ние, я́ко возжеле́ла еси́ житие́ проводи́ти во благоче́стии и чистоте́, к небе́сней красоте́ о́чи се́рдца твоего́ устремля́ющи и любо́вь к Бо́гу в себе́ возгрева́ющи. Моли́твами твои́ми и на́ша сердца́ то́ю же любо́вию просвети́, да с тобо́ю воспои́м Бо́гу: Аллилу́иа.

Икос 2

Ра́зум просвещен имущи и все упова́ние на Бо́га возложи́вши, не убоя́лася еси́, свята́я Елисаве́то, оста́вити дом отца́ твоего́ и в но́вое Оте́чество всели́тися, егда́ бра́ком сочета́лася еси́ с росси́йским вели́ким кня́зем Се́ргием. Мы же с любо́вию взыва́ем ти си́це:

Ра́дуйся, от За́пада на Восто́к прише́дшая;

ра́дуйся, в но́вем Оте́чествии едине́ние с Це́рковию обре́тшая.

Ра́дуйся, за́поведи Госпо́дни испо́лнити возжеле́вшая;

ра́дуйся, в сердца́х на́ших по Бо́зе ревнова́ние воспламеня́ющая.

Ра́дуйся, в супру́жестве целому́дренне пожи́вшая;

ра́дуйся, в доброде́лании нас наставля́ющая.

Ра́дуйся, благове́рная княги́не, стране́ на́шей ве́рно послужи́вшая;

ра́дуйся, супру́гу твоему́ в де́лех благи́х мудрая помощнице.

Ра́дуйся, семейств благочестивых покрови́тельнице;

ра́дуйся, матери́нскою любо́вию нас согрева́ющая.

Ра́дуйся, красото́ю душе́вною и теле́сною всех удивля́ющая;

ра́дуйся, всего́ ми́ра христиа́нскаго украше́ние.

Ра́дуйся, благове́рная княги́не Елисаве́то, преподобному́ченице достосла́вная.

Кондак 3

Си́лою Боже́ственныя благода́ти ко спасе́нию умудре́нная, позна́ла еси́ ве́ру и́стинную, княги́не ми́лостивая Елисаве́то. Темже, во Святе́й Земли́ пребыва́ющи и в жела́нии сердца своего прияти Православие укрепившися, воспе́ла еси́ просвети́вшему тя Бо́гу: Аллилу́иа.

Икос 3

Иму́щи се́рдце, до́брей земли́ подо́бное, ве́ру правосла́вную удо́бь восприя́ла еси́, те́мже Свята́го Миропома́зания и причаще́ния Святы́х Христо́вых Тайн в пра́здник Воскре́шения пра́веднаго Ла́заря сподо́билася еси́. Мы же, сла́вяще просвеще́ние твое́ благода́тию Свята́го Ду́ха, велича́ем тя:

Ра́дуйся, от заблужде́ний отре́кшаяся;

ра́дуйся, ве́ру правосла́вную приемшая.

Ра́дуйся, пома́занием Свята́го Ду́ха запечатле́нная;

ра́дуйся, с Це́рковию и́стинною воссоедине́нная.

Ра́дуйся, святе́й пра́ведней Елисаве́те тезоимени́тая;

ра́дуйся, в по́двизех ей усе́рдно подража́вшая.

Ра́дуйся, сыново́м За́пада путь к и́стинней ве́ре показу́ющая;

ра́дуйся, от благочести́вых люде́й росси́йских любо́вию почита́емая.

Ра́дуйся, ми́лостивая ма́ти, ми́лость у Влады́ки и Го́спода обре́тшая;

ра́дуйся, и о на́шем поми́ловании усе́рдно моля́щаяся.

Ра́дуйся, свет Боже́ственный в се́рдце свое́м носи́вшая;

ра́дуйся, тьму жи́зни на́шея све́том Христо́вых за́поведей озаря́ющая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 4

Бу́ря зло́бы врага́ ро́да челове́ческаго не поколеба́ тя, свята́я, егда́ благове́рный супру́г твой внеза́пную смерть от уби́йц злонра́вных восприя́т, ему́же сострада́ющи, ве́лие му́жество и христиа́нскую любо́вь яви́ла еси́, о покая́нии же уби́йц моля́щися, твори́ла еси́ песнь: Аллилу́иа.

Икос 4

Слы́шавше росси́йстии лю́дие о убие́нии супруга твоего, моля́ху Бо́га, да укрепи́т тя, свята́я Елисаве́то, в несе́нии ско́рби сея́. Ты же, ева́нгельскою любо́вию дви́жима, в темни́це уби́йцу посети́ла еси́, к покая́нию его́ подвиза́ющи и моли́твы вознося́щи ко Го́споду о проще́нии его́. Сего́ ра́ди приими́ от нас, недосто́йных, похвалы́ сия́:

Ра́дуйся, за́поведь Христо́ву о любви́ ко враго́м испо́лнившая;

ра́дуйся, уби́йцу супру́га твоего́ ева́нгельски прости́вшая.

Ра́дуйся, мно́зи ско́рби и беды́ претерпе́вшая;

ра́дуйся, в скорбех и печалех нам помога́ющая.

Ра́дуйся, заблу́ждших на путь и́стины и покая́ния наставля́ющая;

ра́дуйся, о поми́ловании гре́шных те́пле хода́тайствующая.

Ра́дуйся, во тьме печа́лей све́том наде́жды нас озаря́ющая;

ра́дуйся, путево́дная звездо́ всем спасе́ния ча́ющим.

Ра́дуйся, окамене́нныя сердца́ на́ша во умиле́ние приводя́щая;

ра́дуйся, о вся́кой ско́рби на́шей Христа́ умоля́ющая.

Ра́дуйся, зло́бу ми́ра добро́м побежда́вшая;

ра́дуйся, лю́дем росси́йским любо́вь и́стинную показа́вшая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 5

Боготе́чная звезда́ яви́лася еси́ в земли́ Росси́йстей, свята́я Елисаве́то, егда́ бога́тство и сла́ву я́ко прах вмени́вши, в руце Божии жизнь свою предала еси, Крест Господень выну пред очима имущи. Темже, молитвою и делы милосердия Богу угодивши, днесь в радости Ему поеши: Аллилуия.

Икос 5

Ви́девше тя лю́дие богоспаса́емаго гра́да Москвы́ ди́вную устрои́тельницу оби́тели милосе́рдия, возра́довашася, я́ко мно́зи жены́, де́вы и ста́рицы российстии обрето́ша зде ти́хое и душеспаси́тельное приста́нище, подража́юще святы́м жена́м-мироно́сицам Ма́рфе и Мари́и в служе́нии Бо́гу и бли́жним. Сего́ ра́ди, прославля́юще тя, глаго́лем си́це:

Ра́дуйся, среди́ сла́вы земны́я суету́ мирска́го жития́ уразуме́вшая;

ра́дуйся, име́ние свое́ разда́вшая и нищету́ Христо́ву возлюби́вшая.

Ра́дуйся, град Москву́ оби́телию ди́вною украси́вшая;

ра́дуйся, благо́е и́го Христо́во на ра́мо восприи́мшая.

Ра́дуйся, служе́нию святы́х жен-мироно́сиц подража́вшая;

ра́дуйся, мно́гия же́ны во оби́тель милосе́рдия приве́дшая.

Ра́дуйся, ко спасе́нию сесте́р твои́х му́драя управи́тельнице;

ра́дуйся, оби́тели твоея́ неусы́пная храни́тельнице.

Ра́дуйся, в по́двизех теле́сных и духо́вных нас укрепля́ющая;

ра́дуйся, путь от земли́ на Не́бо нам показу́ющая.

Ра́дуйся, свети́ло милосе́рдия, над гра́дом Москво́ю возше́дшее;

ра́дуйся, всех служа́щих бли́жним покрови́тельнице.

Ра́дуйся, благове́рная княги́не Елисаве́то, преподобному́ченице достосла́вная.

Кондак 6

Пропове́дница любве́ Боже́ственныя и милосе́рдия неистощи́маго была́ еси́ в земли́ на́шей, свята́я Елисаве́то, благоче́стия ревни́тельнице, в сердца́х люде́й росси́йских любо́вь ко Го́споду и милосе́рдие к бра́тиям бе́дствующим возгрева́ющи. Темже и мы, твои́м заве́том после́дующе, вку́пе с си́рыми и убо́гими Бо́гу воспои́м: Аллилу́иа.

Икос 6

Возсия́ла еси́ све́том и́ноческаго жития́ в стране́ Росси́йстей, преподо́бная ма́ти на́ша Елисаве́то, в посте́ и моли́тве, в нощны́х бде́ниих и стро́гом воздержа́нии пребывающи, благоче́стию и смире́нию се́стры оби́тели твоея́ поучала еси. Мы же, тобо́ю на путь те́сный по́двига духо́внаго наставля́еми, ублажа́ем тя:

Ра́дуйся, путь равноа́нгельнаго жития́ избра́вшая;

ра́дуйся, в целому́дрии чистоту́ се́рдца твоего́ сохра́ньшая.

Ра́дуйся, в нестяжа́нии высоту́ ду́ха твоего́ показа́вшая;

ра́дуйся, в послуша́нии Бо́гу и бли́жним послужи́вшая.

Ра́дуйся, му́драя княги́не и и́нокине пречестна́я;

ра́дуйся, о́бразе жена́м христиа́нским.

Ра́дуйся, посто́м, бде́нием и непреста́нными моли́твами Бо́гу угоди́вшая;

ра́дуйся, от сна грехо́внаго ду́ши на́ша пробужда́ющая.

Ра́дуйся, ко исполне́нию за́поведи о любви́ к Бо́гу и бли́жним всех наставля́ющая;

ра́дуйся, моли́тве те́плой нас науча́ющая.

Ра́дуйся, наста́внице и́нокиням и собесе́днице а́нгелом;

ра́дуйся, в со́нме преподо́бных жен на Небеси́ просла́вленная.

Ра́дуйся, благове́рная княги́не Елисаве́то, преподобному́ченице достосла́вная.

Кондак 7

Хотя́щи во́лю Госпо́дню твори́ти, свята́я Елисаве́то, на вся́кий час свою́ во́лю отсека́ла еси́, к сове́ту пусты́нных ста́рцев Гаврии́ла и Алекси́я притека́ющи и и́ны му́жи духоно́сныя вопроша́ющи, и́хже му́дрыми наставле́нии житие́ во оби́тели милосе́рдия добре устроя́ла еси́, непреста́нно с се́страми взыва́ющи Бо́гу: Аллилу́иа.

Икос 7

Но́вое чу́до показа́ Госпо́дь, егда́ дарова́ ти, свята́я Елисаве́то, благода́ть и си́лу немощны́я исцеля́ти, безнаде́жныя утеша́ти, заблу́ждшия вразумля́ти. Ты же, облегче́ние и отра́ду с любо́вию подаю́щи, си́рым, забве́ным и немощным смире́нно послужи́ла еси́. Те́мже и нас, убо́гих, твое́ю моли́твою от страстей грехо́вных исцели́ и бу́ди нам ко спасе́нию управи́тельница, да благода́рственно воспое́м ти:

Ра́дуйся, в послуша́нии духо́вным отце́м и вели́ким ста́рцем пожи́вшая;

ра́дуйся, Вели́кая Ма́тушка людьми́ росси́йскими нарече́нная.

Ра́дуйся, дар немощны́я ду́ши врачева́ти от Бо́га стяжа́вшая;

ра́дуйся, боля́щия от одра́ боле́зни возставля́ющая.

Ра́дуйся, вдови́ц и сиро́т благосе́рдая попечи́тельнице;

ра́дуйся, а́лчущих пита́тельнице и су́щим в беда́х ско́рая засту́пнице.

Ра́дуйся, все́ми презре́нных и отве́рженных не оставля́ющая;

ра́дуйся, мно́гия ду́ши от тьмы грехо́вныя и поги́бели спаса́ющая.

Ра́дуйся, уныва́ющим в ско́рбех и обстоя́ниих му́драя уте́шительнице;

ра́дуйся, и нас, удруче́нных боле́зньми и немощами, укрепля́ющая.

Ра́дуйся, ка́ющимся гре́шником пред Го́сподем предста́тельнице;

ра́дуйся, лю́дем росси́йским богодарова́нная помо́щнице.

Ра́дуйся, благове́рная княги́не Елисаве́то, преподобному́ченице достосла́вная.

Кондак 8

Стра́нное и стра́шное виде́ние яви́ Госпо́дь духовнику́ оби́тели милосе́рдия иерею Митрофа́ну, ты же, о свята́я ма́ти, сие́ виде́ние изъясня́ющи, прорекла́ еси́, я́ко ве́лие и гро́зное испыта́ние гряде́т на Це́рковь Ру́сскую и держа́ву на́шу: святы́нь поруга́ние, брань братоуби́йственная, сму́та ве́лия, кончи́на му́ченическая семейства царскаго; но помилу́ет Бог Росси́ю по моли́твам святы́х ея́, с ни́миже ты ны́не воспева́еши Бо́гу: Аллилу́иа.

Икос 8

Вся благода́тию Боже́ственною просвеща́ема, свята́я Елисаве́то, мы́сленныма очи́ма гне́вное посеще́ние Бо́жие страны́ на́шея зре́ла еси́ и проро́чески веща́ла еси́, я́ко мно́зи му́ченицы и испове́дницы в земли́ Ру́сстей возсия́ют. Те́мже все упова́ние на Бо́жию Ма́терь возложи́ти лю́ди российстии призыва́ла еси́, ве́рующи, я́ко моли́твами Ея́ устро́ится и благослови́тся земля́ на́ша. Мы же, ве́дуще прорече́ния твоего́ о судбе́ отчи́зны на́шея сбытие́, ублажа́ем тя си́це:

Ра́дуйся, храм Покрова́ Пресвяты́я Богоро́дицы во оби́тели воздви́гшая;

ра́дуйся, в ру́це Пречи́стей Ма́тери оби́тель твою́ преда́вшая.

Ра́дуйся, хра́мов святы́х и благоле́пных устрои́тельнице;

ра́дуйся, к Богоро́дице неусы́пная моли́твеннице.

Ра́дуйся, храмы Бо́жии сосу́дами и ри́зами благоукрасившая;

ра́дуйся, я́ко се́рдце твое́ оби́телию Свята́го Ду́ха соделася.

Ра́дуйся, житие́м свои́м Го́споду и Ма́тери Его́ ве́рно послужи́вшая;

ра́дуйся, все упова́ние на Бо́га возлага́ти нас науча́ющая.

Ра́дуйся, кро́тость, тишину́ и мир сердца́м на́шим подаю́щая;

ра́дуйся, благода́тными да́ры све́тло украше́нная.

Ра́дуйся, му́жественне ско́рби и клевету́ претерпе́вшая;

ра́дуйся, себе́ в же́ртву Бо́гу угото́вившая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 9

Вся любо́вию к Бо́гу пламене́ющи, свята́я Елисаве́то, не убоя́лася еси́, егда́ приидо́ша во оби́тель твою́ лю́дие безбожнии, хотя́щии суд непра́веден над тобо́ю соверши́ти. Ты же, Го́сподом сохраня́ема, сме́рти тогда́ избе́гла еси́, о вразумле́нии и просве́щении неразу́мных и заблу́ждших моля́щися, Бо́гу же во благодаре́нии воспева́ющи: Аллилу́иа.

Икос 9

Вети́й челове́ческих уста́ не возмо́гут досто́йно восхвали́ти кре́пость любве́ твоея́ во дни бед и напа́стей вели́ких, обыше́дших Оте́чество на́ше, егда́ не восхоте́ла еси́ поки́нути Росси́ю и оби́тель, тобо́ю созда́нную, се́стры тоя́ за ве́ру правосла́вную да́же до сме́рти стоя́ти увещава́ющи. Мы же с любо́вию восхваля́ем тя:

Ра́дуйся, зе́млю на́шу возлюби́вшая;

ра́дуйся, от люде́й правосла́вных с любо́вию прославля́емая.

Ра́дуйся, щито́м ве́ры огражда́тися нас науча́ющая;

ра́дуйся, желание кре́стным путе́м сле́довати в нас укрепля́ющая.

Ра́дуйся, от ро́ва поги́бели мно́гия спа́сшая;

ра́дуйся, оби́тели твое́й и гра́ду Москве́ покро́ве и защи́тнице.

Ра́дуйся, се́стры оби́тели милосе́рдия в ве́ре и наде́жди утверди́вшая;

ра́дуйся, на по́двиг му́ченичества за Христа́ их наста́вльшая.

Ра́дуйся, приобщи́тися страсте́м Христо́вым удосто́ившаяся;

ра́дуйся, в по́двизе испове́дничества ве́рныя утвержда́ющая.

Ра́дуйся, любви́ же́ртвенней, ве́чней нас науча́ющая;

ра́дуйся, в ра́дость Го́спода твоего́ вше́дшая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 10

Спаси́тельнаго по́двига и́щущи, свята́я Елисаве́то, с ра́достию благодари́ла еси́ Бо́га, яко сподо́би тя понести́ крест Его́. Те́мже просия́ побе́дою ве́ра твоя́, егда́, к Голго́фе свое́й восходя́щи, непреста́нно возглаша́ла еси́: Сла́ва Бо́гу за вся́! Умоли́, о ма́ти на́ша, да да́рует нам Госпо́дь стяжа́ти му́дрость и си́лу за ве́ру пра́вую да́же до сме́рти стоя́ти и воспева́ти Ему́ еди́ными усты́ и еди́ным се́рдцем: Аллилу́иа.

Икос 10

Стена́ необори́мая и заступле́ние стране́ на́шей дарова́ся свята́я ико́на Бо́жия Ма́тере Держа́вная, ю́же прия́ла еси́ во Оби́тели милосе́рдия, свята́я Елисаве́то, я́ко зна́мение побе́ды над миродержи́тели тьмы ве́ка сего́. Сего́ ра́ди и мы, все упова́ние на Держа́вную Влады́чицу возложи́вше, тебе́ я́ко и́стинную служи́тельницу и послу́шницу Пречи́стыя Ма́тере Го́спода восхваля́ем:

Ра́дуйся, испо́лненная благода́ти и си́лы Бо́жия;

ра́дуйся, избра́вшая благу́ю часть, я́же не оты́мется от тебе́.

Ра́дуйся, в кро́тости и смире́нии Бо́жией Ма́тери подража́вшая;

ра́дуйся, я́ко му́драя ева́нгельская де́ва еле́й благода́ти собра́вшая.

Ра́дуйся, Пресвяты́я Богоро́дицы благогове́йная служи́тельнице;

ра́дуйся, у Престо́ла Сы́на Ея́ непреста́нная моли́твеннице.

Ра́дуйся, о́браз самоотверже́ния нам яви́вшая;

ра́дуйся, друг дру́га тяготы́ носи́ти науча́ющая.

Ра́дуйся, скорбьми́ и слеза́ми в Ца́рство Небе́сное возше́дшая;

ра́дуйся, любви́ и терпе́нию в страдании сущих всех науча́ющая.

Ра́дуйся, а́нгельски на земли́ пожи́вшая;

ра́дуйся, на Небеси́ вене́ц сла́вы улучившая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 11

Пе́ние моле́бное Бо́жией Ма́тери возноси́ла еси́, свята́я Елисаве́то, в день пра́зднования И́верския иконы́ Ея́, егда́ взя́ша тя нечести́вии и в темни́цу вверго́ша. Ты же благодари́ла еси́ Христа́ Бо́га на́шего, да́вшаго тебе́ не то́чию е́же в Него́ ве́ровати, но и е́же по Нем страда́ти, в у́зах темни́чных воспева́ющи Ему́: Аллилу́иа.

Икос 11

Свет Боже́ственный осия́ тя, страстоте́рпице свята́я княги́не Елисаве́то, ку́пно с преподобному́ченицею Варва́рою, о Христе́ сестро́ю твое́ю, и с про́чими страстоте́рпцы имени́тыми, егда́ в глубо́кий ров низрину́ша вас нечести́вии. Ты же, ра́ны вели́каго кня́зя Иоа́нна обязу́ющи и страда́ния бли́жних облегча́ющи, воспева́ла еси́ свяще́нная песнопе́ния, за убива́ющих си́це моля́щися: О́тче, отпусти́ им, не ве́дят бо, что творя́т. Уврачу́й и на́ших душ ра́ны, преподобная ма́ти, да с любо́вию воспое́м ти:

Ра́дуйся, му́ченическую кончи́ну свою́ предуве́девшая;

ра́дуйся, страстоте́рпице великоименитая.

Ра́дуйся, Страсте́м Христо́вым приобщи́вшаяся;

ра́дуйся, си́лою Боже́ственною в страда́ниих укрепля́емая.

Ра́дуйся, за мучи́телей свои́х, Христу́ подража́ющи, моли́вшаяся;

ра́дуйся, до са́мыя кончи́ны твоея́ песнь Бо́гу воспе́вавшая.

Ра́дуйся, кро́вию свое́ю зе́млю Ру́сскую ороси́вшая;

ра́дуйся, со́нму но́вых му́ченик сопричте́нная.

Ра́дуйся, я́ко ли́ку преподо́бных и пра́ведных жен приобщи́лася еси́;

ра́дуйся, святы́х благове́рных княги́нь земли́ Ру́сския досто́йная сонасле́днице.

Ра́дуйся, же́ртво непоро́чная и благоприя́тная, Бо́гу принесе́нная;

ра́дуйся, со все́ми святы́ми земли́ на́шея торжеству́ющая.

Ра́дуйся, благове́рная княги́не Елисаве́то, преподобному́ченице достосла́вная.

Кондак 12

Благода́ть источают честни́и мо́щи ва́ша, святы́я преподобному́ченицы Елисаве́то и Варва́ро, и́хже от поруга́ния и безче́стия спа́сше, благочести́вии лю́дие из Росси́и во святы́й град Иерусали́м принесо́ша и в ве́си Гефсимани́йстей погребо́ша, иде́же мно́зии к ним приходя́ще, ублажа́ют вас, воспева́юще Бо́гу, ди́вному во святы́х Свои́х: Аллилу́иа.

Икос 12

Све́та небе́снаго и благоуха́ния чу́днаго храм святы́я мироно́сицы Мари́и Магдали́ни во Иерусали́ме испо́лнися, егда́ гроб с те́лом твои́м отве́рст бысть. Те́мже ны́не Це́ркве Правосла́вныя ча́да вси ра́дуются и лику́ют о Го́споде, притека́юще к чудото́чней ра́це моще́й твои́х, преподобному́ченице Елисаве́то, и благодаря́ще просла́вльшаго тя Го́спода, пою́т си́це:

Ра́дуйся, я́ко мо́щи твоя́ нетле́нием процвето́ша;

ра́дуйся, во Святу́ю Зе́млю те́лом принесе́нная.

Ра́дуйся, в саду́ моле́ния Госпо́дня погребе́нная;

ра́дуйся, во хра́ме святы́я мироно́сицы упокое́нная.

Ра́дуйся, явле́нием моще́й твои́х Це́рковь Ру́сскую возвесели́вшая;

ра́дуйся, су́щих в разсе́янии росси́йских люде́й духо́вно укрепи́вшая.

Ра́дуйся, я́ко Господь чрез мо́щи твоя́ исцеляет вся́кия ско́рби и боле́зни;

ра́дуйся, по морю житейскому плавающих тихое пристанище.

Ра́дуйся, вене́ц доброде́телей собра́вшая;

ра́дуйся, сла́вою и честию от Бо́га венча́нная.

Ра́дуйся, Го́рняго Иерусали́ма блаже́нная обита́тельнице;

ра́дуйся, ко Иерусали́му Небе́сному всем нам путеводи́тельнице.

Ра́дуйся, благове́рная княги́не Елисаве́то, преподобному́ченице достосла́вная.

Кондак 13

О, вели́кая страстоте́рпице, жен росси́йских украше́ние и ра́досте на́ша, княги́не ми́лостивая Елисаве́то, приими́ от се́рдца воздыха́ние на́ше, с любо́вию тебе́ приноси́мое, и твои́м предста́тельством ко Го́споду дух пра́выя ве́ры и благоче́стия в нас укрепи́, в доброде́тели и милосе́рдии утверди́, помози́ крест скорбе́й с терпе́нием и наде́ждою понести́, в любви́ и согла́сии наро́д наш сохрани́, да сподо́бимся в ра́дость Го́спода вни́ти, со а́нгелы и все́ми святы́ми пою́ще Ему́: Аллилу́иа.

Молитва 1

О, вели́кая княги́не, свята́я преподобному́ченице Елисаве́то, Росси́йская похвало́, гра́да Москвы́ пресла́вное украше́ние и Святы́я Земли́ свяще́нное достоя́ние!

Ты во дни жития́ твоего́ ве́ру, наде́жду, любо́вь нело́жны стяжа́вши, милосе́рдием к стра́ждущим све́тло просия́ла еси́. Терпе́нием же скорбе́й и искуше́ний о́браз смире́ния бли́жним яви́вши, изгна́нием и страданьми житие́ увенча́ла еси́ и во Ца́рствии Небе́снем ны́не пребыва́еши.

Сего́ ра́ди мо́лим тя, страстоте́рпице свята́я, моли́твами твои́ми да́руй нам се́рдце смире́нное и покая́нное, милосе́рдие неоскудева́ющее, служе́ние бли́жним же́ртвенное, терпе́ние непоколе́блемое, му́жество в ско́рбех и обстоя́ниих неослабева́ющее, в стра́шный же час сме́ртный упова́ние тве́рдое на Го́спода на́шего Иису́са Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м, и Пресвяты́м, Благи́м и Животворя́щим Его́ Ду́хом ны́не и при́сно и во ве́ки веко́в. Ами́нь.

Молитва 2

О, святы́я новому́ченицы Церкви Русския, вели́кая княги́не Елисаве́то и пречестна́я и́нокине Варва́ро, ку́пно ева́нгельския за́поведи де́лом во оби́тели милосе́рдия соверши́вшия, ве́ры ра́ди правосла́вныя до сме́рти подвизавшияся и до́брый плод в терпе́нии страсте́й Христу́ прине́сшия! Моли́теся Ему́, я́ко победи́телю сме́рти, да утверди́т Це́рковь Ру́сскую Правосла́вную и Оте́чество на́ше. Се бо лука́вый враг вооружа́ется на ны, хотя́ нас погуби́ти в междоусо́бных бра́нех, ско́рбех, печа́лех, боле́знех, ну́ждах и беда́х лю́тых. Умоли́те Го́спода низложи́ти вся не́мощныя де́рзости его́; ве́ру в сердца́х люде́й православных укрепи́те, нам же мужества дар низпослите, да, отве́ргшеся себе́ и взе́мше крест свой, после́дуем Христу́, распина́юще плоть свою́ со страстьми́ и похотьми́. Сохрани́те нас от вся́каго зла, освяти́те пути́ жи́зни на́шея, да́руйте покая́ние нелицеме́рное, тишину́ и мир душа́м на́шим, испроси́те у Го́спода всем нам мыта́рств го́рьких и ве́чныя му́ки изба́витися и Небе́сному Ца́рствию насле́дником бы́ти со все́ми святы́ми, от века угоди́вшими Бо́гу, да ра́дующеся воздади́м хвалу́, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.

Кондак 1

Избранная от рода державнаго дщерь Российская, любовию изобильною и милосердием Богу и ближним добре послужившая, за веру во Христа Господа нашего душу свою положившая и венцем славы Христовы украшенная, восхваляем; подвиги и страдания твоя, с любовию воспевающе ти сице:
Радуйся, святая преподобномученице Елисавето, красото Церкве Российския, невестою Христовою быти удостоенная.

Икос 1

Ангельскою любовию Христа возлюбившая и Тому Единому служити желавшая измлада материю твоею поучаемая, в трудех, молитвах и милостыни образ добродетелей явила еси. По кончине же матере твоея и ближних сродников крестный путь, Господем заповеданный, уразумела еси. Темже дивящеся таковому от юности твоему избранию, со умилением взываем ти:
Радуйся, от юности Христа возлюбившая; радуйся, Христова агнице избранная.
Радуйся, от родителей семена веры приимшая; радуйся, в страсе Божии ими воспитанная.
Радуйся, добродетели матере твоея унаследившая; радуйся, трудолюбию и милосердию ею наученная.
Радуйся, сердцем в Бозе утвержденная; радуйся, с верою и упованием понесшая крест твой и Христу последовавшая.
Радуйся, земли отечества твоего цвете благоуханный; радуйся, чистотою жизни твоея Небеса возвеселившая.
Радуйся, избранная Богом на служение страждущим; радуйся, молитвеннице наша пред Богом.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 2

Виде Господь благое сердца твоего изволение, яко от юности возжелела еси житие проводити во благочестии и чистоте, к небесней красоте очи сердца твоего устремляющи и огнь любве к Богу в себе воспламеняющи. Молитвами твоими и наша сердца любовию к Богу просвети, да с тобою воспоим Ему: Аллилуиа.

Икос 2

Разумом свыше просвещаема, святая Елисавето, не убоялася еси оставити отечество, род и дом отца твоего и в новое отечество вселитися, егда браком сочеталася еси с российским: великим князем Сергием, да с ним Богу послужиши, и вкупе с супругом твоим в целомудрии пожила еси, истинную любовь к людем российским показующи. Мы же с любовию взываем ти сице:
Радуйся, славная от земли Запада пришелице; радуйся, новую отчизну — землю Российскую обретшая.
Радуйся, благоверная княгине, стране нашей верно послужившая; радуйся, в добрых делех наших наставнице.
Радуйся, в супружестве в любви и целомудрии пожившая; радуйся, яко супругу твоему в делех благих помощница была еси мудрая.
Радуйся, супругом благочестивым покровительнице; радуйся, материнскою любовию нас согревающая.
Радуйся, заповеди Господни исполнити возжелевшая; радуйся, ревность по Бозе в сердцах наших воспламеняющая.
Радуйся, красотою душевною и телесною всех возрадовавшая; радуйся, всего мира христианскаго украшение.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 3

Силою Божественный благодати во спасение умудренная, разумом твоим познала еси веру истинную, княгине милостивая Елисавето, и во Святей Земли пребывающи, утвердилася еси в желании прияти Православие, воспевающи просветившему тя Богу: Аллилуиа.

Икос 3

Имущи сердце, добрей земле подобящееся, веру православную удобь восприяла еси, темже святаго миропомазания и причащения Святых Христовых Тайн в праздник Воскрешения праведнаго Лазаря сподобилася еси. Мы же, славяще просвещение твое благодатию Святаго Духа, величаем тя:
Радуйся, в день Воскрешения праведнаго Лазаря веру православную приявшая; радуйся, плоде благословенный Российския земли.
Радуйся, миропомазанием Святаго Духа запечатленная; радуйся, во Православии имя, данное ти от рождения, сохраншая.
Радуйся, святей праведней Елисавете тезоименитая; радуйся, яко той житию усердно в подвизех подражала еси.
Радуйся, сыновом Запада путь к истинней вере показующая; радуйся, яко благочестивии людие земли Российския память твою любовию чтут.
Радуйся, милостивая мати, милость у Владыки и Господа обретшая; радуйся, и о нашем помиловании усердно молящаяся.
Радуйся, свет Божественный в сердце своем носившая; радуйся, тьму жизни нашея светом Христовых заповедей озаряющая.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 4

Буря злобы врага рода человеческаго непоколеба тя, святая, егда благоверный супруг твой мученически смерть претерпе, емуже сострадающи, велие мужество и христианскую любовь явила еси. Ангели же, душу супруга твоего возносяще, пояху: Аллилуиа.

Икос 4

Слышавше российстии людие о убиении благовернаго князя Сергия, моляху Бога, да укрепит тя, святая Елисавето, в несении скорби сея. Ты же, жертвенною любовию укрепляема, в темнице убийцу супруга твоего посетила еси, к покаянию его подвизающи и молитвы возносящи ко Господу о прощении его. Сего ради приими от нас, недостойных, похвалы сия:
Радуйся, аповедь Христову о любви ко врагом исполнившая; радуйся, убийцу супруга твоего евангельски простившая.
Радуйся, мнози скорби и беды претерпевшая; радуйся, бремя скорбей и печалей нести нам помогающая.
Радуйся, аблуждших на путь истины и покаяния наставляющая; радуйся, о спасении грешников теплая ходатаице.
Радуйся, во тьме печалей светом надежды нас озаряющая; радуйся, путеводная звездо всем чающим спасения.
Радуйся, окамененныя сердца наша во умиление приводящая; радуйся, во всякой скорби нашей ко Христу за ны теплая молитвеннице.
Радуйся, лобу мира добром побеждавшая; радуйся, людем российским любовь истинную показавшая.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 5

Боготечною звездою возсияла еси в земли Российстей, святая Елисавето, егда богатство и славу яко прах вменивши, в руце Божии жизнь свою предала еси, да послужиши Ему постом и молитвою, и к страждущим явила еси велию любовь и милосердие. Тако и путь жития нашего светом добродетелей твоих озари, да радостно возопиим Богу: Аллилуиа.

Икос 5

Видевше тя людие богоспасаемаго града Москвы дивную устроительницу Обители милосердия, возрадовашася, яко мнози жены и девы российския обретоша зде тихое и душеспасительное пристанище, подражающе святым женам-мироносицам Марии и Марфе в служении Богу и ближним. Сего ради, прославляюще тя, глаголем сице:
Радуйся, во славе земной суету мирскаго жития уразумевшая; радуйся, имение свое раздавшая и нищету Христову возлюбившая.
Радуйся, рад Москву обителию дивною украсившая; радуйся, благое иго Христово на себе восприимшая.
Радуйся, многия жены и девы во Обитель милосердия приведшая; радуйся, мудрая управительнице во спасение сестер твоих.
Радуйся, служению святых жен-мироносиц Марфы и Марии подражавшая; радуйся, Обители твоя неусыпная хранительнице.
Радуйся, в подвизе жизни духовныя нас утверждающая; радуйся, путь от земли на Небо нам показующая.
Радуйся, светило милосердия, над градом Москвою восшедшее; радуйся, всех отдавших жизнь на служение ближним покровительнице.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 6

Проповедницею любве Божественныя и милосердия Его и ревнительницею благочестия была еси в земли нашей, святая Елисавето, в сердцах людей российских любовь ко Господу и милосердие к братиям и сестрам нашим, в бедах сущим, возгреваюши, да и мы твоим заветом последующе, воспоим Богу: Аллилуиа.

Икос 6

Возсияла еси светом добродетельнаго жития в стране Российстей, преподобная мати наша Елисавето, во образе иночестем в посте и воздержании, в нощных бдениях и пениих молебных пожила еси, благочестию и смирению сестры обители твоея поучающи, да и мы, тобою на путь тесный подвига духовнаго наставляеми, ублажаем тя:
Радуйся, уть иноческаго равноангельнаго жития избравшая; радуйся, обетом целомудрия чистоту сердца твоего явившая.
Радуйся, обетом нестяжания высоту духа твоего показавшая; радуйся, обетом послушания Богу и ближним послужившая.
Радуйся, мудрая княгине и инокине пречестная; радуйся, во образ женам христианским свыше предназначенная.
Радуйся, остом, бдением и непрестанными молитвами Богу угодившая; радуйся, от сна греховнаго души наша пробуждающая.
Радуйся, о исполнению заповеди о любви к Богу и ближним всех наставляющая; радуйся, молитве сердечней нас научающая.
Радуйся, аставнице инокиням и собеседнице Ангелом; радуйся, в сонме преподобных жен на Небеси прославленная.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 7

Хотящи волю Господню разумети, святая Елисавето, всецело предала еси себе в послушание старцем Гавриилу Спасо-Елеазаровскому, Алексию Зосимовскому, такожде и другие богомудрыя старцы вопрошала еси, ничтоже без их благословения творящи, волю же свою отсекающи, темже и житие во Обители милосердия ко благу устрояла еси, непрестанно взывающи Богу: Аллилуиа.

Икос 7

Новое чудо показа Господь, егда дарова ти, святая Елисавето, благодать и силу болезни врачевати, разслабленныя укрепляти, бедствующим помогати, обидимых заступати. Ты же, облегчение и отраду страждущим содевающи, немощным, всеми оставленным и увечным послужила еси со смирением и любовию. Темже и нас, грешных, твоею молитвою исцели и буди нам ко спасению управительница, да благодарственно воспоем ти:
Радуйся, в послушании духовным отцем и великим старцем пожившая; радуйся, Великою Матушкою людьми российскими нареченная.
Радуйся, дар немощных души врачевати от Бога стяжавшая; радуйся, болящия и безнадежныя от одра болезни возставляющая.
Радуйся, вдовиц и сирот благосердая попечительнице; радуйся, алчущих питателънице и сущим в бедах скорая заступнице.
Радуйся, всеми презренных и отверженных не оставляющая; радуйся, многия души от тьмы греховныя и погибели спасшая.
Радуйся, унывающим в скорбех и обстояниих мудрая утешительнице; радуйся, и нас, удрученных болезньми и скорбьми укрепляющая.
Радуйся, ающимся грешником пред Богом предстательнице; радуйся, людем российским помощнице милостивая богодарованная.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 8

Странное и страшное видение яви Господь духовнику Обители милосердия отцу Митрофанию. Ты же, о святая мати, сие видение изьясняющи, прорекла еси, яко велие и грозное испытание грядет на Церковь Русскую и державу нашу: святынь поругание, брань братоубийственная, смута велия, мученическая кончина царския семьи; но помилует Бог Россию по молитвам святых ея, с ними же ты ныне воспеваеши Богу: Аллилуиа.

Икос 8

Вся благодатию Божественною просвещаема, святая Елисавето, мысленныма очима гневное посещение Божие страны нашея зрела еси и пророчески вещала еси, яко мнози мученицы и исповедницы в земли Российстей возсияют. Темже все упование на Божию Матерь возложити люди русския призывала еси, верующи, яко молитвами Ея устроится и благословится земля наша. Мы же, ведуще проречения твоего о судьбе отчизны нашея сбытие, ублажаем тя сице:
Радуйся, храм Покрова Пресвятыя Богородицы во Обители милосердия воздвигшая; радуйся, тем в руце Пречистей Матери Господа обитель твою предавшая.
Радуйся, храмов Божиих устроительнице; радуйся, к Богородице молитвеннице наша неусыпная.
Радуйся, церквам Божиим благодеявшая; радуйся, ради жизни вечныя неусыпно потрудившаяся.
Радуйся, житием своим Богу и Пресвятой Деве Богородице верно послужившая; радуйся, все упование возлагати на Бога нас научающая.
Радуйся, ротость, тишину и мир сердцам нашим подающая; радуйся, благодатными дары Духа Святаго украшенная.
Радуйся, яко прозорливо предрекла еси великия скорби земли нашея; радуйся, яко помилова ю Господь.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 9

Вся любовию к Богу пламенеющи, святая Елисавето, не убоялася еси, егда приидоша во обитель, тобою созданную, безумнии людие, хотящии суд неправеден над тобою совершити. Ты же, Господом сохраняема, смерти тогда убегла еси, о вразумлении и просвещении неразумных и заблуждших молящися, Богу же во благодарении воспевающи: Аллилуиа.

Икос 9

Ветий человеческих уста не возмогут достойно восхвалити крепость любве твоея во дни бед и напастей великих, обышедших отечество наше, егда не восхотела еси покинути Россию и обитель, тобою созданную, сестры тоя за веру православную даже до смерти стояти побуждающи. Мы же с любовию восхваляем тя:
Радуйся, емлю нашу возлюбившая, радуйся, от людей российских с любовию прославляемая.
Радуйся, щитом веры во брани с врагом ограждатися нас научающая; радуйся, решимость Господу последовати крестным путем в нас укрепляющая.
Радуйся, сестры Обители милосердия в вере и надежде утвердившая; радуйся, на подвиг мученичества за Христа их наставльшая.
Радуйся, риобщитися страстем Христовым удостоившаяся; радуйся, в исповедничестем подвизе люди российския утверждающая.
Радуйся, от рова погибели мнози спасшая; радуйся, обители твоей и граду Москве помощнице, покрове и защитнице.
Радуйся, любви жертвенней, вечней нас научающая; радуйся, вшедшая в радость Господа твоего.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 10

Спасительнаго подвига ищущи, святая Елисавето, с радостию благодарила еси Бога, яко сподоби тя понести крест Его. Темже просия победою вера твоя, егда, к Голгофе своей восходящи, непрестанно возглашала еси: «Слава Богу за все!» Умоли, о мати наша, да дарует нам Господь стяжати мудрость и силу за веру правую даже до смерти стояти и воспевати Ему едиными усты и единым сердцем: Аллилуиа.

Икос 10

Стена необоримая и заступление стране Российстей даровася святая икона Божия Матере Державная, Юже прияла есть во Обители милосердия святая Елисавето, яко знамение победы над миродержительми тьмы века сего. Сего ради и мы, все упование на Державную Владычицу отчизны нашей возложивше, тебе яко истинную служительницу и послушницу Пречистыя Матере Господа восхваляем:
Радуйся, лагодати и силы Божия исполненная; радуйся, благую часть избравшая, яже не отымется от тебе.
Радуйся, в кротости и смирении Божией Матери подражавшая; радуйся, мудрая евангельская дево, елей благодати собравшая.
Радуйся, Пресвятыя Девы Богородицы благоговейная почитательнице; радуйся, у Престола Ея непрестанно за ны молящаяся.
Радуйся, образ самоотвержения нам явившая; радуйся, друг друга тяготы носити нас научающая.
Радуйся, рез земныя скорби и страдания в Царство Небесное вшедшая; радуйся, любви и терпению в страданиях ради Господа всех научающая.
Радуйся, ангельски на земли пожившая; радуйся, унаследившая на Небеси венец славы.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 11

Пение молебное Божией Матери возносила еси, святая Елисавето, в день празднования Иверския иконы Ея, егда взяша тя нечестивии и в темницу ввергоша. Ты же благодарила еси Христа Бога нашего, давшаго тебе не точию еже в Него веровати, но и по Нем страдати, в узах темничных воспевающи Ему: Аллилуиа.

Икос 11

Свет Божественный осия тя, страстотерпице святая княгине Елисавето, купно с преподобномученицею Варварою, о Христе сестрою твоею, и с прочими страстотерпцы именитыми, егда в глубокий ров ввержена сущи, тамо раны великаго князя Иоанна обязала еси, страдания умирающих облегчала еси, воспевающи священныя песнопения, за убивающих же тя молилася еси: «Отче, отпусти им, не ведят бо, что творят». Уврачуй и наших душ раны, о мати наша, да с любовию воспоем ти:
Радуйся, мученическую кончину свою предуведевшая; радуйся, страстотерпице царственная.
Радуйся, в день памяти преподобнаго Сергия отрастем Христовым приобщившаяся; радуйся, силою Божественною в страданиих укрепляемая.
Радуйся, а мучителей своих, Христу подражающи, молившаяся; радуйся, до самыя кончины твоея песнь Богу воспевавшая.
Радуйся, ровию своею землю нашу оросившая; радуйся, к сонму новомучеников Российских сопричтенная.
Радуйся, яко лику преподобных и праведных жен приобщилася еси; радуйся, святых благоверных княгинь земли Русския достойная сонаследнице.
Радуйся, жертво непорочная, благоприятная, Богу принесенная; радуйся, со всеми святыми земли нашея торжествующая.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 12

Благодати исполненнии сосуди явишася честныя мощи ваша, святыя преподобномученицы Елисавето и Варваро, ихже от поругания и безчестия спасти хотяще, благочестивии людие из России во святый град Иерусалим принесоша и в веси Гефсиманийстей на горе Елеон погребоша, к нимже приходящии ублажают вас, воспевающе Богу, дивному во святых Своих: Аллилуиа.

Икос 12

Света небеснаго и благоухания чуднаго храм святыя мироносицы Марии Магдалини во Иерусалиме исполнися, егда гроб с телом великия княгини Елисаветы открыша. Темже ныне Церкве Православныя чада вси радуются и ликуют о Господе, притекающе к раце мощей твоих, преподобномученице Елисавето, чудеса точащих всем верующим, и благодаряще прославльшаго тя Господа, поют сице:
Радуйся, яко мощи твоя, во святый град Иерусалим принесенныя, процветоша нетлением; радуйся, мощами твоими Святую Землю с землею Российскою духовно соединившая.
Радуйся, явлением мощей твоих Церковь Русскую возвеселившая; радуйся, тем находящихся в разсеянии российских людей духовно укрепившая.
Радуйся, у гроба Господня погребенная; радуйся, во храме святыя жены-мироносицы Марии Магдалини упокоенная.
Радуйся, яко мощи твоя исцеляют всякия скорби и болезни; радуйся, свидетельнице вечности в жизни временней.
Радуйся, венец добродетелей в себе соединившая; радуйся, неисповедимыми судьбами Божиими прославленная.
Радуйся, Горняго Иерусалима обитательнице блаженная; радуйся, ко Иерусалиму Небесному всем нам путеводительнице.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 13

О великая страстотерпице, жен российских украшение и радосте наша, княгине милостивая Елисавето, приими воздыхание сердец наших, с любовию тебе приносимое, и твоим предстательством ко Господу дух правыя веры и благочестия в нас укрепи, в добродетели и милосердии нас утверди, помози крест скорбей с терпением и надеждою понести, в любви и согласии народ наш сохрани, да сподобимся в радость Господа внити, со Ангелы и всеми святыми поюще Ему: Аллилуиа.

(Этот кондак читается трижды, затем икос 1 и кондак 1)

Молитва святой преподобномученице великой княгине Елисавете

О святыя новомученицы Российския, великая княгине Елисавето и сестро ея крестовая пречестная инокине Варваро, купно путь свой во мнозех муках скончавшия, евангельския заповеди делом во Обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем, Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.

Тропарь святой преподобномученице великой княгине Елисавете

Тропарь, глас 2

В красоте земней красоту небесную показала еси, святая преподобомученица Елисавето, и женам-мироносицам Марии и Марфе подражала еси, в служении Богу и людем страждущим. Темже прослави тя Христос Бог, яко едину от святых жен российских, дарующих вам мир и велию милость.

Тропарь, глас 1

Смирением достоинство княжеское сокрывши, богомудрая Елисавето, сугубым служением Марфы и Марии Христа почтила еси. Милосердием, терпением и любовию себе предочистивши, яко жертва праведная Богу принеслася еси. Мы же, чтуще добродетельное житие и страдания твоя, яко истинную наставницу усердно просим тя: святая мученице великая княгине Елисавето, моли Христа Бога спасти и просветити души наша.

Тропарь, глас 4

Страстотерпица преподобная Варваро, в напастех с наставницей своею даже до смерти пребывшая, Христово бо Евангелие исполнив, положила еси душу свою за други своя. Ныне же предстоя с собором святых жен российских, моли оставление грехов даровати чтущим любовию святую память твою.

Тропарь, глас 4

Кротость и смирение и любовь вселивши в душу свою, усердно послужила еси страждущим, страстотерпице святая княгине Елисавето, таже с верою претерпела еси страдания и смерть за Христа, с мученицею Варварою. С нею же моли о всех с любовию почитающих вас.

Кондак, глас 4

Воспоем днесь славу святым новомученицам Российским, благоверной княгине Елисавете с Варварою верною, в Гефсиманийстей веси погребенным, образ бо вам показавшим мужества духовнаго во исповедании веры Православныя. Темже молим вас, молитеся Христу Богу, да изведет на жатву делатели Своя, просветити светом истинныя веры страну еяже возлюбили есте, и спасет души наша.

Кондак, глас 4

От славы царственныя, вземши крест Христов, прешла еси к славе небесней, молящися за врагов, и обрела еси радость вечную, святая мученице княгине Елисавето, с Варварою мученицею. Темже молите о душах наших.