Кондак 1

Избраннии и всехвальнии царственнии страстотерпцы, державы Российския заступницы и о людех ея молитвенницы святии, благоверный царю Николае с царицею Александрою и царственными чады Алексием, ольгою, Татианою, Мариею и Анастасиею, похвальное пение приносим вам с верою и любовию; вы же, яко имущии дерзновение к прославльшему вас Господу, ограждайте нас от всяких зол и бед молитвами вашими, да зовем вам:
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Икос 1

Ангелов Творец и всея твари Царь и Господь, судьбы народов и царств по воли Своей управляяй, воздвиже в стране Российстей род царей благочестивых и избра тя, царю Николае с семейством твоим в жертву живую, всеусердную и благоприятную Богу. Мы же, дивящеся таковому о вас Божию смотрению, во умилении сердец приносим вам похвалы сия:
Радуйся, помазанниче Божий Николае, престола царства Российскаго украшение;
радуйся, царице Александро, мудрых жен христианских красото и славо.
Радуйся, царевичу Алексие, жертво непорочная, Богу принесенная;
радуйтеся, истинныя невесты Христовы и страдалицы ольго, Татиано, Марие и Анастасие.
Радуйтеся, всем сердцем Спаса Христа возлюбившии;
радуйтеся, верность Ему даже до смерти сохранившии.
Радуйтеся, скорби многия в житии вашем претерпевшии;
радуйтеся, страстем Христовым мужественно подражавшии.
Радуйтеся, на Небеси и на земли от Господа прославленнии;
радуйтеся, к сонму святых новомучеников и исповедников Российских сопричтеннии.
Радуйтеся, страны Российския милостивии покровители;
радуйтеся, фимиам молитв за нас к Богу приносящии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 2

Видев сердцеведец Господь твердое твое желание верою и правдою послужити Богу и народу своему, благоизволи помазати тя, богоизбранный царю Николае, на царство Российское; ты же приял еси венец царский яко послушание, Богом данное, и многия труды подъял еси ради могущества и славы державы Российския, воспевая Давшему ти благодать и силу песнь ангельскую: Аллилуиа.

Икос 2

Разумом светлым и сердцем чистым изволению Божию повинуяся, иго благое Христово взем, бразды правления державы Российския приял еси, царю Николае, такожде поревновал еси храмов и обителей иноческих созиданию, святых угодников Божиих прославлению и Православныя Церкве утверждению. Сего ради, ревность твою в служении сем прославляюще, зовем ти таковая:
Радуйся, от юности сердце свое Господеви предавый;
радуйся, помазанниче, Богом избранный.
Радуйся, скипетр царский достойно носивый;
радуйся, царское служение со страхом Божиим совершавый.
Радуйся, могущество и славу державы Российския утвердивый;
радуйся, насадителю в ней истиннаго просвещения и благочестия.
Радуйся, о благе народа усердное попечение имевый;
радуйся, и ныне о всех нуждающихся пред Господем предстателю.
Радуйся, храмы и обители иноческия земли Российския украсивый;
радуйся, Церкве Святыя Православныя верный защитниче.
Радуйся, душу свою за люди российския и отечество наше положивый;
радуйся, венцем от Царя Славы венчанный.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 3

Силою свыше укрепляем, мужественно проходил еси предлежащий ти подвиг служения Богу, отечеству, народу своему, и всем православным народом заступник явился еси, егда подвигл еси воинство русское на спасение страны Сербския и на брань противу врагов России и веры православныя. Темже благодарственно воспеваем укрепившему тя Христу Богу: Аллилуиа.

Икос 3

Имея в сердце твоем твердое упование на всесильную помощь Божию и пламенное желание державе Российстей послужити, глаголал еси, страстотерпче святый: несть тоя жертвы, юже не принесл бых во благо отечества моего. Тако научи и нас за спасение страны нашея души полагати, заповедь любве исполняюще, воспевающе тебе, святый царю Николае, похвалы сия:
Радуйся, веры православныя велий ревнителю;
радуйся, закона и правды твердый хранителю.
Радуйся, милостивый и кроткий повелителю;
радуйся, царей и князей Российских украшение.
Радуйся, стране своей возлюбленней добре послуживый;
радуйся, ходатаю о ней усердный.
Радуйся, лукавыя советы врагов России презревый;
радуйся, во дни брани мужество велие явивый.
Радуйся, всея России Богом данный заступниче;
радуйся, стран и народов православных державный покровителю.
Радуйся, яко Престолу Святыя Троицы ныне предстоиши;
радуйся, яко со всеми святыми пред Богом о душах наших ходатайствуеши.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 4

Бурю лютых искушений воздвиже отец лжи диавол на страну нашу православную, злобою, клеветою и коварством беззаконных и богоотступников собирая, дабы разорити и погубити царство Российское. Ты же, благоверный царю Николае, братоубийства в державе своей избегнути хотя, власть земную и славу оставил еси, и умолял еси Господа, да сохранит на Руси верных Богу и поющих Ему: Аллилуиа.

Икос 4

Слыша и видя отечества твоего нестроение и разорение, молился еси, святый царю Николае, да спасет Пречистая Мати Господа дом Свой – державу Российскую, и се явися образ Пресвятыя Богородицы Державныя, и прият Царица Небесная скипетр и державу от руку отверженнаго народом царя земнаго. И бысть явление иконы сея на велию радость всем верным, поющим тебе, страстотерпче святый:
Радуйся, волю свою всецело в волю Божию предавый;
радуйся, тленную славу земную ни во чтоже вменивый.
Радуйся, царский венец на терновый пременивый;
радуйся, терпению Христову верный подражателю.
Радуйся, хулы и напасти кротко претерпевый;
радуйся, якоже иов многострадальный, праведность во страдании явивый.
Радуйся покрову и заступлению Божия Матере страну Российскую вручивый;
радуйся, пламенныя молитвы к Богу о ней возносивый.
Радуйся, Богом на страдание вольное предызбранный;
радуйся, царскую порфиру кровию своею обагривый.
Радуйся, веру истинную до конца сохранивый;
радуйся, царственною славою на Небеси и на земли почтенный.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 5

Боготечная звезда явилася еси, славная царице Александро, приявши веру Православную и всем сердцем твоим возлюбивши молитву, храмы Божия и святых отец творения. Темже во благочестии воспитала еси чада твоя и уготовала еси их в жертву чистую, непорочную за Христа, воспевающи Ему благодарственную песнь: Аллилуиа.

Икос 5

Видя Господь крепость веры твоея и силу терпения, святая царице Александро, дарова тебе вкупе с возлюбленным супругом твоим и чады вашими чашу горьких страданий испити и мученическую смерть прияти. Ты же, подражающи закланному агнцу Христу, вся претерпела еси и во обители горния душею возлетела еси. Темже, поминающе страдания твоя, Христова страстотерпице, воспеваем тебе таковая:
Радуйся, в сиротстве твоем Материю Божиею восприятая;
радуйся, Феодоровскому образу Владычицы посвященная.
Радуйся, любовию к мудрости Богом одаренная;
радуйся, святынь православных почитательнице.
Радуйся, с супругом твоим в любви и благочестии пожившая;
радуйся, чадом твоим царственным мати любвеобильная.
Радуйся, ратником увечным страдания облегчавшая;
радуйся, Умывшему ноги учеником добре подражавшая.
Радуйся, матерей российских в скорбех утешающая;
радуйся, всем российским женам похвало и радосте.
Радуйся, елей милости в сосуде своем собравшая;
радуйся, верность отечеству новому и вере православней даже до смерти сохранившая.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 6

Проповедницы славы Божия и ревнители благочестия явистеся, святии царственнии супрузи Николае и Александро, и образ брака благословеннаго, союзом любве связаннаго показасте верным людем и всем чтущим вас и благодарно воспевающим прославившему вас Богу: Аллилуиа.

Икос 6

Возсияли есте, яко звезды богосветлии, в царстве православнороссийстем, боговенчаннии царю Николае и царице Александро, в житии вашем и в делех любве, милосердия, веры; вы бо воспитали есте чад своих во благочестии, с нимиже в заточении от богоборцев бывше, веру, надежду и любовь к Богу сохранили есте, и мученическую кончину претерпевше, причастницы Царства Небеснаго соделастеся. Темже, яко земли Русския покровители, молите Бога о спасении отечества нашего и всех с любовию вас чтущих и воспевающих тако:
Радуйтеся, образ истинный супружества христианскаго явившии;
радуйтеся, любовь небесную в себе поистинне показавшии.
Радуйтеся, бедных и убогих милостивии попечители;
радуйтеся, христианским смирением украшеннии.
Радуйтеся, изгнани правды ради, яко ваше есть Царство Божие;
радуйтеся, яко мзда ваша многа есть на Небесех.
Радуйтеся, путь узкий и прискорбный прошедшии;
радуйтеся, блаженство райское унаследовавшии.
Радуйтеся, яко ангели с вами ликуют на Небеси;
радуйтеся, яко человецы восхваляют вас на земли.
Радуйтеся, от людей российских с любовию прославляемии;
радуйтеся, с Господем и Пречистою Его Материю вечно царствующии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 7

Хотя Человеколюбец Господь радость явити людем российским, дарова нам светлаго отрока царевича Алексия, дивнаго молитвенника и заступника нашего. Той бо во смирении сердца глагола: «аще бы мне царствовати, да не обрящутся нищии и убозии». Егда же многия скорби, недуги и убиение от богоборцев претерпев, в Царство Небесное взыде страстотерпец святый, тамо прославльшему его Господу радостно воспе ангельскую песнь: Аллилуиа.

Икос 7

Новое знамение благоволения Своего к державе Российстей яви тя Господь, царевичу Алексие, яко плод благословен молитв Саровскаго чудотворца, надежду, славу и упование православных людей всея России. Божиим же промышлением, яко агнец непорочный, мученическую кончину от безбожных приял еси, ныне же ликуеши яко наследник Царствия Небеснаго. Сего ради победным венцем украшеннаго и с лики новомучеников и исповедников Российских прославленнаго, ублажаем тя, глаголюще:
Радуйся, преподобному Алексию, человеку Божию, тезоименитый;
радуйся, святых князей-отроков российских сонаследниче.
Радуйся, достойный сыне родителей благочестивых;
радуйся, юнейший ратник в воинстве отца твоего бывый.
Радуйся, образе кротости и смирения;
радуйся, земли нашея украшение.
Радуйся, болезнь тяжкую мужественно претерпевый;
радуйся, за вся Господа благодаривый.
Радуйся, яко овча на заколение приведенный;
радуйся, жертво непорочная, Богу во всесожжение принесенная.
Радуйся, детскую чистоту житием своим явивый;
радуйся, вместо царства земнаго Царство Небесное приемый.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 8

Странно есть людем христолюбивым видети, како странствие земное совершивши и путь страдальческий прошедши, дщи царева, равноапостольней ольге тезоименитая, веры ради мужественно на смерть себе вдаде за Христа, Владыку Жизни. Сего ради, мученический венец приявши, страстотерпице святая ольго, со ангелы Престолу Христа Бога предстоиши, поющи Ему победную песнь: Аллилуиа.

Икос 8

Вси Небеснии чини и святых земли российския собори радостно прияша вас, страстотерпцы царственнии, подвиг земнаго жития своего совершившии и в жизнь вечную вшедшии. Темже вся Церковь Христова, восхваляющи любовь вашу и служение во славу Господа и Пречистыя Его Матере, мира Заступницы, молитвенно память вашу празднует и песни хвалебныя приносит вам:
Радуйтеся, добродетелем святых предков ваших подражавшии;
радуйтеся, народу своему верно послужившии.
Радуйтеся, вдов и сирот питатели и заступницы;
радуйтеся, милости и сострадания к людем преисполненнии.
Радуйтеся, христианскаго благочестия поборницы;
радуйтеся, крест свой с терпением и всецелым преданием в волю Божию понесшии.
Радуйтеся, изгнание и поругание смиренно претерпевшии;
радуйтеся, силою Божиею на подвиг страдальческий укрепленнии.
Радуйтеся, за веру и любовь ко отечеству своему безчестие приявшии;
радуйтеся, в скорбех и злостраданиих мужество духовное показавшии.
Радуйтеся, теплотою любве вашея нас согревающии;
радуйтеся, друг друга тяготы носити нас научающии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 9

Всякое естество ангельское удивися терпению и мужеству твоему, страстотерпице святая Татиано, ты, бо всяких добродетелей исполнена и покровительнице своей, святей мученице Татиане, подражающи, с молитвою предала еси дух твой в руце Божии и в Царство Небесное взошла еси, идеже со ангелы и всеми святыми воспеваеши Богу песнь: Аллилуиа.

Икос 9

Ветии многовещаннии не возмогут по достоянию воспети пречудное прославление ваше, страстотерпцы царственнии. Исполни бо ся проречение преподобнаго Серафима Саровскаго, яко прославльшаго его царя прославит Бог. Мы же, исполненнии радости и благодарения Господу, торжествующе память вашу, от всего сердца взываем сице:
Радуйтеся, вся печали ваша на Бога возложившии;
радуйтеся, заповедь любве до конца исполнившии.
Радуйтеся, страдальческий подвиг славно скончавшии;
радуйтеся, от рук ненавидящих вас смерть без ропота приявшии.
Радуйтеся, Христа Бога в сердцах своих носившии;
радуйтеся, вечнаго Царства Христова наследницы.
Радуйтеся, смертию временней прешедшии к жизни вечней;
радуйтеся, Церковию Православною чудно прославленнии.
Радуйтеся, в радость Господа своего вшедшии;
радуйтеся, венцы нетления от Него приявшии.
Радуйтеся, яко страдания ваша в храмех Божиих величаются;
радуйтеся, яко память ваша с похвалами во Святей Церкви совершается.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 10

Спасти хотящи душу свою, святая страстотерпице царевно Марие, яко агница Божия к смерти себе приуготовила еси, покаянием теплым душу очистила еси и приобщением Тела и Крови Господни соединилася еси Царю Славы Христу, воспевающи Ему, всем страдальцем царственным дарующему жизнь вечную, победную песнь: Аллилуиа.

Икос 10

Стену необоримую и покров дарова Господь всей державе Российстей, благоприятными бо вашими молитвами, страстотерпцы царственнии, спасаете отчизну вашу земную от всех врагов видимых и невидимых. Сего ради благодарение Отцу Небесному усердно возсылаем и вам, предстателем нашим, хвалу приносим, вопиюще:
Радуйтеся, земли Русския Богом дарованнии защитницы;
радуйтеся, яко по всей стране Российстей память ваша празднуется.
Радуйтеся, посвященных вам храмов неусыпнии покровители;
радуйтеся, об отечестве и народе нашем молитвенницы предивнии.
Радуйтеся, чудесы многими по кончине прославленнии;
радуйтеся, в нуждах и бедах сущих скорое избавление.
Радуйтеся, болезней душевных и телесных целители;
радуйтеся, мира семейнаго блюстители.
Радуйтеся, изгнанных правды ради утешители;
радуйтеся, за нас, грешных, пред Богом споручницы.
Радуйтеся, вечную радость на Небеси обретшии;
радуйтеся, о всем мире христианстем молитвы Богу приносящии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 11

Пения похвальная приношаше земля Русская тебе, святая царевна Анастасие, и всей седмерице царственных страстотерпец от дней убиения вашего до прославления в сонме новомучеников и исповедников Российских, почитающи память страданий ваших. Темже и мы, в напастех и бедах к вам прибегающе и на ваше предстательство уповающе, едиными усты и единем сердцем непрестанно взываем Благодетелю Богу: Аллилуиа.

Икос 11

Светоподательныя светильники, светом любве Христовы и огнем чудес землю Русскую освящающия, зрим вас, святии царственнии страстотерпцы, и сиянием вашея небесныя славы озаряеми, поем и прославляем вас песньми таковыми:
Радуйтеся, светильницы, любовию Божиею горящии;
радуйтеся, лучами благодати Божия осияннии.
Радуйтеся, сиянием небеснаго света озареннии;
радуйтеся, благоухания духовнаго преисполненнии.
Радуйтеся, пресветлаго собора святых земли нашея звезды сияющия;
радуйтеся, яко вами Свет Христов в стране Российстей умножается.
Радуйтеся, всех обидимых и неправедно гонимых заступницы;
радуйтеся, ко Господу моление людей российских приносящии.
Радуйтеся, столпи света, путь к Царству Небесному нам указующии;
радуйтеся, предстательством своим у Господа благостроение отечеству нашему испрошающии.
Радуйтеся, светом невещественным души просвещающии;
радуйтеся, вся благая прошения наша исполняющии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 12

Благодать, данную вам от Господа видяще, стастотерпцы царственнии, молим вы, испросите у Христа Бога нашего стране Российстей мир и спасение; помозите всем живущим в ней людем, ихже возлюбили есте любовию жертвенною, обрести радость духовную, покой души, мужество и крепость во испытаниих; во святей вере, благочестии и чистоте нас сохраните, да со всеми вами воспоем Богу победную песнь: Аллилуиа.

Икос 12

Поюще дивное предстательство ваше к Богу, святии царствении страстотерпцы, царю Николае, царице Александро, царевичу Алексие, царевны ольго, Татиано, Марие и Анастасие, величаем дивнаго во святых Своих Царя Небеснаго, ублажаем мученическую кончину вашу и почитаем вас, яко молитвенников не токмо за землю Русскую, но и о всех верных чадех Церкве Православныя. Веруем, яко дадеся вам благодать недужныя врачевати, обидимыя заступати, в вере истинней укрепляти, на путь правды наставляти всех любовию славящих вас сице:
Радуйтеся, Трисиянным Светом озареннии;
радуйтеся, яко зрите всегда Творца своего и Господа.
Радуйтеся, с Царицею Небесе и земли о мире молящиися;
радуйтеся, с Небесными Силами Бога прославляющии.
Радуйтеся, страдальческим подвигом вашим людей российских в вере укрепившии;
радуйтеся, заступницы наши усерднии.
Радуйтеся, страстотерпцы Христовы, диавола победившии;
радуйтеся, от злобы его и коварства верных избавляющии.
Радуйтеся, светильницы, души наша благодатию озаряющии;
радуйтеся, яко вами вся земля наша духовно возрадовася.
Радуйтеся, нетления цвети благоуханнии;
радуйтеся, чудес источницы неистощимии.
Радуйтеся, святии царственнии страстотерпцы, за землю Русскую пред Богом молитвенницы и преславнии чудотворцы.

Кондак 13

О предивнии в страданиих святии царственнии страстотерпцы, царю Николае и царице Александро с царственными чады вашими, скории помощницы всем с верою к вам прибегающим, приимите малое сие моление наше и приносимыя вам хвалы, и сохраните страну нашу Российскую, народ ея и вся грады и страны христианския от глада, губительства, труса, потопа, огня, меча, от нашествия иноплеменных и междоусобныя брани и от всякаго зла. Умолите Господа об оставлении нам грехов вольных и невольных, да избавльшеся от вечныя смерти молитвами вашими, радостно воспоем Богу: Аллилуиа.

Этот кондак читается трижды, затем 1-й икос: «Ангелов Творец…» и 1-й кондак: «Избраннии и всехвальнии…»

МОЛИТВА

О святый страстотерпче, царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко иова многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев и, яко истинный раб Христов, мученическую кончину прием, Небеснаго Царства достигл еси, идеже наслаждаешися вышния славы у Престола всех Царя, купно со святою супружницею твоею, царицею Александрою, и царственными чады Алексием, ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех богоотступничества народа нашего, и подаст грехов прощение, и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно, и во веки веков. Аминь.

СВЯТЫМ ЦАРСТВЕННЫМ СТРАСТОТЕРПЦАМ

Тропарь, глас 4:

Днесь благовернии людие, светло почтим / седмерицу честную царственных страстотерпец, / Христову едину домашнюю церковь: / Николая и Александру, / Алексия, ольгу, Татиану, Марию и Анастасию. / Тии бо, уз и страданий многоразличных не убоявшеся, / от богоборных смерть и поругание телес прияша / и дерзновение ко Господу в молитве улучиша. / Сего ради к ним с любовию возопиим: / о святии страстотерпцы, / гласу покаяния и стенанию народа нашего вонмите, / землю Российскую в любви к Православию утвердите, / от междоусобныя брани сохраните, / мир мирови у Бога испросите // и душам нашим велию милость.

Кондак, глас 8:

Избраннии Царем царствующих и Господем господствующих / от рода царей Российских, / благовернии мученицы, / муки душевныя и смерть телесную за Христа приимшии / и венцы небесными увенчавшиися, / к вам, яко покровителем нашим милостивым, / с любовию благодарне вопием: / радуйтеся, царственнии страстотерпцы, // за Русь Святую пред Богом усерднии молитвенницы.

ЖИТИЕ СВЯТЫХ ЦАРСТВЕННЫХ СТРАСТОТЕРПЦЕВ ЦАРЯ НИКОЛАЯ И ЕГО СЕМЬИ

Память: Память в воскресный день 25 января / 7 февраля, либо в ближайший воскресный день, предшествующий или последующий 25 января (Новомученики и исповедники Российские), Третья неделя по Пятидесятнице (Собор Петербургских святых), 4 / 17 июля

Семья Царственных Страстотерпцев: император Николай, императрица Александра, царевны Мария, Ольга, Татьяна и Анастасия и царевич Алексей – удивительная и благочестивая семья, которая смогла достойно и мужественно пронести свой «ипатьевский» крест. Им молятся о семейном благополучии, любви между супругами, о правильном воспитании детей, о сохранении целомудрия и чистоты, о доброй невесте или женихе. Царственную семью просят о молитвенной помощи в болезнях, скорбях, гонениях, заточении.

Царственные Страстотерпцы: император Николай, императрица Александра, царевны Мария, Ольга, Татьяна и Анастасия и царевич Алексей. Икона

Тропарь первый Царственным Страстотерпцам, глас 4

Днесь, благовернии людие, светло почтим седмерицу честную царственных страстотерпец, Христову едину домашнюю Церковь: Николая и Александру, Алексия, Ольгу, Татиану, Марию и Анастасию. Тии бо, уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: о святии страстотерпцы, гласу покаяния и стенанию народа нашего вонмите, землю Российскую в любви к Православию утвердите, от междоусобныя брани сохраните, мир мирови у Бога испросите и душам нашим велию милость.

Кондак первый Царственным Страстотерпцам, глас 8

Избраннии Царем царствующих и Господем господствующих от рода царей Российских, благовернии мученицы, муки душевныя и смерть телесную за Христа приимшии и венцы Небесными увенчавшиися, к вам, яко покровителем нашим милостивым, с любовию благодарне вопием: радуйтеся, царственнии страстотерпцы, за Русь Святую пред Богом усерднии молитвенницы.

Тропарь второй Царственным Страстотерпцам, глас 5

Царства земнаго лишение, узы и страдания многоразличныя кротко претерпел еси, свидетельствовав о Христе даже до смерти от богоборцев, страстотерпче великий Боговенчанный царю Николае, сего ради мученическим венцем на небесех, венча тя с царицею и чады и слуги твоими Христос Бог, Егоже моли помиловати страну Российскую и спасти души наша.

Кондак второй Царственным Страстотерпцам, глас 6

Надежда царя мученика с царицею и чады и слуги укрепи, и к Твоей любви окрыли, будущий им покой предвозвестивши, тех молитвами, Господи, помилуй нас.

Величание Царственных страстотерпцев

Величаем вас, святии царственнии страстотерпцы, и чтим честная страдания ваша, яже за Христа претерпели есте.

Молитва первая Царственным Страстотерпцам

О, святая седмерице, царственнии страстотерпцы, Николае, Александро, Алексие, Марие, Ольго, Татиано и Анастасие!

Вы, союзом любве Христовы связуеми, дом ваш, яко малую церковь, благочестно устроили есте и смирением себе посреде земнаго величия украсили есте. В годину же братоубийственныя брани и гонений безбожных во отечестве нашем, все упование на Бога возложивше, образ терпения и страдания всей земли Российстей явили есте и, молящеся о мучителех, клевету, узы и изгнание, глумление, насмеяние и оболгание, убиение и телес поругание мужественне претерпели есте. Сего ради от земнаго царствия к Небесному прешли есте и теплии ходатаи о нас явилися есте.

О, святии угодницы Божии! Молитеся о нас Богу, да Церковь в единомыслии и твердей вере соблюдет, страну нашу миром и благоденствием оградит и от междоусобныя брани и разделения избавит, власть предержащую умудрит, воинство мужеством украсит, народ от разорения сохранит, супруги христианския в верности и любви укрепит, чада в благочестии и послушании возрастит, и вся ны купно с вами сподобит воспевати Пречестное и Великолепое имя Живоначальныя Троицы Отца и Сына и Святаго Духа ныне и присно и во веки веков. Аминь.

Кондак страстотерпцу царю Николаю, глас 3

Мирликийскому предстателю подражатель, благоверный Царю Николае Вторый чудотворец показался еси. Христово бо Евангелие исполнив, положил еси душу твою за люди твоя и спасл еси неповинныя, паче же повинныя от смерти. Сих ради мученическою кровию освятился еси, яко великомученик Церкви Христовы.

Молитва первая страстотерпцу царю Николаю

О, святый страстотерпче царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев, и, яко истинный раб Христов, мученическую кончину приемь, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею царицею Александрою и царственными чады Алексием, Ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.

Молитва вторая страстотерпцу царю Николаю

О святый великий Российский Царю и страстотерпче Николае! Вонми гласу моления нашего и вознеси ко Престолу всевидящаго Господа стенания и воздыхания народа Русскаго, некогда богоизбраннаго и благословеннаго, ныне же падшаго и от Бога отступившаго. Разреши клятвопреступление, доселе тяготеющее над народом Русским. Тяжко бо согрешихом, отступивше от Царя Небеснаго, оставльше веру православную на попрание нечестивых, преступльше клятву соборную и не возбранивше убиению твоему, Семьи твоея и верных слуг твоих.

Не бо послушахом повеления Господня: «Не прикасайтеся помазанным Моим» паки же Давиду глаголющу: «Иже прострет руку на Помазанника Господня, не Господь ли поразит его?» И се ныне достойная по делом нашим приемлем, тяготеет бо даже до дне сего на нас грех царския крови пролития.

Доныне оскверняются святыни наши. Блуд и беззаконие не оскудевают от нас. Чада наши преданы на поругание. Вопиет к небу кровь невинная, на всякий час в земле нашей проливаемая.

Но виждь слезы и сокрушение сердец наших, каемся бо, якоже киевляне некогда пред князем Игорем, ими умученным; якоже владимирцы пред князем Андреем Боголюбским, ими убиенным, и просим: умоли Господа, да не отвратится от нас до конца, да не лишит народ Русский великаго избранничества Своего, но да подаст нам разум спасения, во еже восстати нам из глубины падения сего.

Имаши бо, Царю Николае, дерзновение велие, ты бо кровь свою пролиял еси за народ свой, и душу положил еси не токмо за други, но и за враги своя. Сего ради предстоиши ныне в Невечернем Свете Царю Славы, яко верный слуга Его. Буди нам ходатай и заступник, и охранитель. Не отвратися от нас, и не остави нас на попрание нечестивых. Даруй нам силы на покаяние, и правосудие Божие приклони на милосердие, да не погубит нас до конца Господь, но да вся простит и милостивно помилует, и спасет землю Русскую и народ ея. Да избавит же Отечество наше от постигших бед и напастей, возродит веру и благочестие, восставит же престол Царей православных, еже сбытися пророчествам угодников Божиих. И да прославят люди Русские по всей вселенней всехвальное имя Господне и верно послужат Ему до скончания века, воспевая славу Отцу и Сыну и Святому Духу ныне и присно и во веки веков. Аминь.

Величание страстотерпцу царю Николаю

Величаем тя, страстотерпче святый Царю Николае, и чтим честная страдания твоя, яже за Христа претерпел еси.

Акафист Царственным Страстотерпцам:

• Акафист Царственным Страстотерпцам
• Акафист страстотерпцу царю Николаю

Канон Царственным Страстотерпцам:

• Канон Царственным Страстотерпцам
• Канон страстотерпцу царю Николаю

Житийная и научно-историческая литература о страстотерпцах императоре Николае, императрице Александре, царевиче Алексие, царевнах Марии, Ольге, Татьяне и Анастасии:

• Благоверный царь Николай Александрович и его семья — Московские епархиальные ведомости
• Мифы о святом Царе-Страстотерпце Николае II — Юлия Комлева
• Императрица Александра Федоровна: ее любовь найдет еще отклик — Андрей Мановцев
• Кто убил Государя? — диакон Владимир Василик
• Чтобы правильно понимать царя Николая II, надо быть православным. Ответы православного англичанина на недоуменные вопросы о святом императоре Николае II — протоиерей Андрей Филипс
• Религиозно-мистический смысл убиения царской семьи — архиепископ Аверкий Таушев

Сегодня, в день 102-ой годовщины прибытия государя и членов его семьи в Екатеринбург, постараемся в своём молитвенном делании уделить особое внимание чтению Акафиста святым Царственным страстотерпцам. Об этом песнопении рассказал старший помощник проректора по воспитательной работе, преподаватель кафедры церковно-практических дисциплин Екатеринбургской духовной семинарии иеромонах Клавдиан (Меньшиков) в рамках духовно-просветительского проекта «Читаем акафист», призваного раскрыть красоту акафистного пения и познакомить с наиболее чтомыми акафистами.

— Ни один святой не вызвал такой активизации богослужебного почитания, как семья последнего российского императора, — рассказал иеромонах Клавдиан (Меньшиков). — Так, по подсчетам исследователей, в 2010 году было известно в общей сложности пять акафистов в честь всех семи святых Царственных страстотерпцев, девять акафистов (один из которых печатается в двух существенно различных редакциях) святому царю Николаю II, по два акафиста святой царице Александре, святой Ольге и святой Татиане и по одному акафисту святому Алексию, Марии и Анастасии — всего 23 акафиста! Однако, следует отметить, что к общецерковному использованию Священным Синодом одобрен только один из вышеперечисленных акафистов (рефрен: «Радуйтеся, царственнии страстотерпцы, земли Российския хранитилие и молитвенницы»).

Как известно, святой император Николай II был канонизирован сначала в 1981 году в Русской Православной Церкви Заграницей, а затем в 2000 году на Юбилейном Архиерейском Соборе в Москве. Примерно через год после канонизации святых царственным страстотерпцев был утвержден текст службы им, а в 2009 году — текст акафиста, который по мнению Т.И.Кошелевой «представляет собой современное гимнографическое произведение, стройное в композиционном отношении, с хорошим слогом, написанное грамотным церковнославянским языком».

Данный акафист раскрывает перед нами последовательность исторических событий: от избрания первого царя из династии Романовых на престол до прославления мученического подвига семьи последнего царя, при этом хронологическая точность в изложении периодически уступает место требованиям гимнографии. Особое внимание уделяется отношению святого императора к Церкви и благочестию, что является для нас глубоко назидательным.

Ссылка на акафист святым Царственным страстотерпцам: https://azbyka.ru/days/caa/539

Акафист святым царственным страстотерпцам

Текст утвержден Священным Синодом
Русской Православной Церкви
10 октября 2009 года (журнал № 95)

Конда́к 1

Избра́ннии ца́рственнии страстоте́рпцы,/ еди́на дома́шняя це́рковь Христо́ва,/ Нико́лае, Алекса́ндро, Алекси́е,/ О́льго, Татиа́но, Мари́е и Анастаси́е,/ вы, сою́зом любве́ связу́еми,/ я́ко а́гнцы, Христу́ Бо́гу ве́рою после́довали есте́/ и, в страда́ниих смерть претерпе́вше,/ Ца́рствия Небе́снаго насле́дницы яви́лися есте́./ Ны́не же, дерзнове́ние ко Го́споду иму́ще,/ моли́теся о земне́м оте́честве ва́шем, да прославля́ем вас си́це:

Ра́дуйтеся, ца́рственнии страстоте́рпцы,/ земли́ Росси́йския храни́телие и моли́твенницы.

И́кос 1

А́нгельскими си́лами укрепля́еми во и́стиннем пути́, седмочи́сленнии страстоте́рпцы, о житии́ пра́веднем и богоуго́днем ревнова́ли есте́, да я́вите наро́ду ру́сскому о́браз благочести́вых царе́й. Сего́ ра́ди прославля́ем вас си́це:

Ра́дуйтеся, страх Бо́жий в се́рдце, я́ко основа́ние, положи́вшии;

ра́дуйтеся, прему́дрость Бо́жию и́стинне возлюби́вшии.

Ра́дуйтеся, все упова́ние на Бо́га возложи́вшии;

ра́дуйтеся, оте́честву ва́шему ве́рно послужи́вшии.

Ра́дуйтеся, христиа́нскаго благоче́стия тве́рдое пра́вило;

ра́дуйтеся, ца́рственнаго ро́да Росси́йскаго похвало́.

Ра́дуйтеся, Правосла́вныя ве́ры кре́пкое испове́дание;

ра́дуйтеся, стра́ждущаго наро́да на́шего утеше́ние.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 2

Ви́дя Госпо́дь покая́ние наро́да на́шего, егда́ сму́тная времена́ наста́ша, умилосе́рдися и яви́ ми́лость Свою́ во избра́нии Михаи́ла царя́, его́же ико́ною Пречи́стыя Богоро́дицы, Фео́доровская имену́емою, чрез роди́тельницу благослови́, да бу́дет ико́на сия́ покро́в и защище́ние ему́ и всему́ новоизбра́нному ца́рскому ро́ду и во утвержде́ние держа́вы Росси́йския. Сего́ ра́ди благода́рне вопие́м Бо́гу: Аллилу́ия.

И́кос 2

Разуме́ша лю́дие Росси́йстии, я́ко избра́нием на ца́рство но́ваго ро́да благочести́ваго, утиши́ Госпо́дь нестрое́ния и сму́ты в Земли́ на́шей, принесо́ша обе́т ве́рнаго служе́ния ро́ду сему́. Мы же, любви́ и ре́вности тех подража́юще, к вам, ца́рственнии страстоте́рпцы, я́ко насле́дником сего́ избра́ния со умиле́нием вопие́м:

Ра́дуйтеся, вене́ц и похвало́ ро́да ца́рскаго и свяще́ннаго;

ра́дуйтеся, ко́рене благочести́ваго пресла́вныя о́трасли.

Ра́дуйтеся, Патриа́рха Росси́йскаго Филаре́та свято́е прозябе́ние;

ра́дуйтеся, попече́нию его́ о Це́ркви и оте́честве подража́вшии.

Ра́дуйтеся, вели́кия ста́рицы и́нокини Ма́рфы благослове́нное насле́дие;

ра́дуйтеся, поко́рность во́ли Бо́жией от нея́ восприи́мшии.

Ра́дуйтеся, пред ико́ною Бо́жия Ма́тере Фео́доровския моли́твы при́сно возноси́вшии;

ра́дуйтеся, все упова́ние на по́мощь Богоро́дицы с ве́рою возлага́вшии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 3

Сила Бо́жия и промышле́ние Всевы́шняго яви́ся в рожде́нии твое́м, ца́рственный страстоте́рпче Нико́лае, вели́каго бо святи́теля и́мя восприе́м, засту́пник Росси́йския Земли́ показа́лся еси́. Мно́гия же ско́рби и боле́зни, подо́бне И́ову пра́ведному, в житии́ претерпе́в, ны́не с ли́ки страстоте́рпцев наслажда́ешися ра́йскаго блаже́нства, воспева́я Бо́гу: Аллилу́ия.

И́кос 3

Име́я сугу́быя засту́пники и покрови́тели в рожде́нии твое́м И́ова многострада́льнаго и Никола́я чудотво́рца, держа́вный страстоте́рпче, доброде́телем тех после́довал еси́. Мы же, дивя́щеся промышле́нию Творца́, во святы́х сих о́браз благоче́стия указа́вшаго ти, благогове́йне воспева́ем си́це:

Ра́дуйся, в моли́твах святи́теля Мир Лики́йских при́сно призыва́яй;

ра́дуйся, по́мощию того́ Росси́йскую Держа́ву пра́ведно окормля́яй.

Ра́дуйся, о́бразом кро́тости тому́ уподо́бивыйся;

ра́дуйся, милосе́рдие мно́гое, я́коже о́ный, яви́вый.

Ра́дуйся, терпе́ние И́овле в се́рдце твое́м име́вый.

ра́дуйся, ве́рность Бо́гу в житии́ твое́м до конца́ сохрани́вый.

Ра́дуйся, в тя́жких беда́х, я́коже о́ный, благодаре́ние Бо́гу приноси́вый;

ра́дуйся, вся находя́щая на тя со смире́нием прие́мый.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 4

Бу́рю смуще́ния, воздвиза́емую от челове́к безбо́жных в стране́ на́шей, ви́дя, страстоте́рпче Нико́лае, не смути́лся еси́ в се́рдце твое́м и, все упова́ние на Бо́га возложи́в, не возропта́л еси́, егда́ отверго́ша тя лю́ди твоя́; оба́че с ве́рою воспе́л еси́ Бо́гу: Аллилу́ия.

И́кос 4

Слы́ша о мяте́жех, боле́знех и междоусо́бных бра́нех, наше́дших на зе́млю Ру́сскую, во у́зах сый, страстоте́рпче царю́ Нико́лае, моле́ние о лю́дех ея́ непреста́нне приноси́л еси́, милосе́рдие Бо́жие к ним призыва́я. Сего́ ра́ди мы воспева́ем тебе́ та́ко:

Ра́дуйся, от ю́ности оте́чество и наро́д твой возлюби́вый;

ра́дуйся, я́ко и во отверже́нии любо́вь сию́ сохрани́вый.

Ра́дуйся, пома́зание на ца́рство с благогове́нием прие́мый;

ра́дуйся, о́браз благочести́ваго царя́ ми́ру яви́вый.

Ра́дуйся, ца́рский вене́ц со смире́нием на ся возложи́вый;

ра́дуйся, венца́ страда́ний от Го́спода удосто́енный.

Ра́дуйся, ца́рское служе́ние, я́ко послуша́ние Бо́гу, разуме́вый;

ра́дуйся, поноше́ния, я́ко крест, взе́мый и с терпе́нием понесы́й.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 5

Богосве́тлый свети́льник во мра́це скорбе́й благове́рней супру́жнице твое́й яви́лся еси́, ца́рственный страстоте́рпче Нико́лае, указу́я и возглавля́я путь ея́, я́коже повеле́ Госпо́дь. Мы же, прославля́юще ваш благослове́нный сою́з во Христе́, хвалу́ Бо́гу воздае́м, пою́ще: Аллилу́ия.

И́кос 5

Ви́дя ца́рственный страстоте́рпец ю́ницу Алекса́ндру, я́ко голуби́цу чи́сту, избра́ ю себе́ в благове́рную супру́жницу, Правосла́вную цари́цу и ма́терь наро́да Росси́йскаго. Мы же, ве́дуще усе́рдное служе́ние ея́, воспева́ем си́це:

Ра́дуйся, имени́таго ро́да благочести́вое прозябе́ние;

ра́дуйся, от лю́терския ве́ры к Правосла́вию о́бразе спаси́тельнаго прехожде́ния.

Ра́дуйся, всем се́рдцем моли́тву возлюби́вшая;

ра́дуйся, о слу́жбе Бо́жией серде́чно ревнова́вшая.

Ра́дуйся, сло́вом Бо́жиим и писа́нием святы́х оте́ц себе́ назда́вшая;

ра́дуйся, уста́вы церко́вныя благогове́йно соблюда́вшая.

Ра́дуйся, ру́сское благоче́стие досто́йне восприе́мшая;

ра́дуйся, и́стинныя жи́зни во Христе́ приобщи́вшаяся.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 6

Пропове́дует житие́ ва́ше бра́ка свята́го чистоту́, благове́рнии Нико́лае и Алекса́ндро. Вы бо, благода́ть сего́ вели́каго та́инства досто́йно восприе́мше, да́же до му́ченическия кончи́ны ве́рность Христу́ и любо́вь друг ко дру́гу сохрани́ли есте́, при́сно воспева́юще Бо́гу: Аллилу́ия.

И́кос 6

Возсия́ в стране́ Росси́йстей, я́ко прекра́сная свети́ла, благове́рная ца́рственная чета́ Никола́й и Алекса́ндра, супру́зи, сою́зом любве́ Христо́вы связу́емии. Мы же, прославля́юще о́браз их целому́дреннаго и добронра́внаго жития́ в ми́ре сем, со благогове́нием воспева́ем си́це:

Ра́дуйтеся, всем се́рдцем Бо́га взыска́вшии;

ра́дуйтеся, в путе́х Госпо́дних непоро́чно ходи́вшии.

Ра́дуйтеся, дво́ице честна́я, свы́ше избра́нная;

ра́дуйтеся, дво́ице свята́я, сла́вою и че́стию от Бо́га венча́нная.

Ра́дуйтеся, целому́дрие супру́жеское многоча́дием просла́вившии;

ра́дуйтеся, ча́да ва́ша, я́ко новосажде́ния ма́сличная, о́крест трапе́зы Небе́сныя собра́вшии.

Ра́дуйтеся, супру́ги во благоче́стии и любви́ жи́ти науча́ющии;

ра́дуйтеся, мир Христо́в о́ным ми́лостивно низпосыла́ющии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 7

Хотя́ще ваш дом благоче́стно устро́ити, любо́вь, я́ко основа́ние, положили есте́ и брак че́стен до́бре соблюли́ есте́, благове́рнии супру́зи Нико́лае и Алекса́ндро. Те́мже, и дще́ри ва́ша, я́ко му́дрыя ева́нгельския де́вы, воспита́вше, в неве́сты Христу́ угото́вали есте́. С ни́миже ны́не вку́пе воспева́ете Бо́гу: Аллилу́ия.

И́кос 7

Но́вую ми́лость дарова́ Госпо́дь наро́ду ру́сскому, целому́дренныя дще́ри ца́рственныя четы́ О́льгу, Татиа́ну, Мари́ю и Анастаси́ю. Ты́я бо, жена́м мироно́сицам подража́ющыя, еле́ем милосе́рдия боля́щим и стра́ждущим послужи́ша и, сме́рть за Христа́ прие́мшя, ны́не Престо́лу Бо́жию предстоя́т. Сего́ ра́ди прославля́ем их си́це:

Ра́дуйтеся, дще́ри царе́вы, обетова́ний Бо́жиих сподо́бльшыяся;

ра́дуйтеся, за́поведь Бо́жию о почита́нии роди́телей соблю́дшыя.

Ра́дуйтеся, досто́инство ца́рственное свя́то сохра́ньшыя;

ра́дуйтеся, стихи́ями ми́ра сего не порабоще́нныя.

Ра́дуйтеся, лю́дем, су́щым в беда́х и ско́рбех, я́ко Христу́, послужи́вшыя;

ра́дуйтеся, за враго́в свои́х усе́рдно моли́вшыяся.

Ра́дуйтеся, а́гницы непоро́чныя, в же́ртву Бо́гу себе́ прине́сшыя;

ра́дуйтеся, неве́сты Христо́вы, в черто́зех Жениха́ Небе́снаго пребыва́ющыя.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 8

Стра́нно и чу́дно бысть рожде́ние твое́, святы́й царе́вичу Алекси́е. Плод бо благосла́вен моли́тв Саро́вскаго чудотво́рца и ча́емый насле́дник ца́рственных роди́телей быв, сла́ва, наде́жда и упова́ние яви́лся еси́ всем конце́м Земли́ на́шея. Сего́ ра́ди лю́дие Росси́йстии с ра́достию благода́рственно воспе́ша Бо́гу:Аллилу́ия.

И́кос 8

К вы́шним душе́ю чи́стою устремля́яся, святы́й царе́вичу Алекси́е, измла́да боле́знь, я́ко крест от Го́спода да́нный, безро́потно поне́сл еси́, последи́ же, я́ко а́гнец незло́бивый, рука́ми злочести́вых убие́н, моли́твенник пред Бо́гом яви́лся еси́. Сего́ ра́ди воспева́ем ти си́це:

Ра́дуйся, отроча́, от утро́бы ма́тере Бо́гом предызбра́нное;

ра́дуйся, ча́до, моли́твами Саро́вскаго чудотво́рца Росси́и дарова́нное.

Ра́дуйся, страда́льче, измла́да ско́рби и неду́ги безро́потно понесы́й;

ра́дуйся, царе́вичу, в боле́знех сострада́ние к лю́дем обреты́й.

Ра́дуйся, насле́дниче, лише́ние ца́рства земна́го со смире́нием прие́мый;

ра́дуйся, страстоте́рпче, Ца́рствия Небе́снаго от Бо́га удосто́енный.

Ра́дуйся, а́гнче незло́биве, от безбо́жных закла́нный;

ра́дуйся, ца́рственный о́троче, венце́м нетле́нным от Царя́ ца́рствующих увенча́нный.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 9

Всяк ум челове́ческий смути́ся, егда́ в земли́ на́шей беззако́ние умно́жися, и́стина помрачи́ся и ме́рзость запусте́ния на ме́сте святе́м ста. Ты же, царю́ Нико́лае, изгна́ние, поруга́ние и темни́чное заточе́ние му́жественне претерпе́в, сын ве́рный Святы́я Це́ркве и страстоте́рпец Христо́в яви́лся еси́. Сего́ ра́ди Це́рковь Ру́сская, прославля́ющи тя, Бо́гу вопие́т: Аллилу́ия.

И́кос 9

Вети́и злому́дреннии тща́шася оболга́ти тя клевето́ю, пома́занниче Бо́жий Нико́лае, ты же, ева́нгельски вся терпя́, о благоче́стии наро́да Правосла́внаго попече́ние сугу́бое прилага́л еси́. Сего́ ра́ди, па́мять твою́ све́тло пра́зднующе, воспева́ем ти си́це:

Ра́дуйся, прославле́ния уго́дников Бо́жиих до́брый рачи́телю;

ра́дуйся, па́стыря Кроншта́дтскаго благогове́йный почита́телю.

Ра́дуйся, Саро́вских торже́ств держа́вный возглави́телю;

ра́дуйся, и́ноческих оби́телей благочести́вый покрови́телю.

Ра́дуйся, духо́вных вертогра́дов усе́рдный попечи́телю;

ра́дуйся, Правосла́вных хра́мов боголюби́вый зда́телю.

Ра́дуйся, Святы́я Земли́ и Афо́нския Горы́ ще́дрый благотвори́телю;

ра́дуйся, устрое́ния Це́ркве Ру́сския му́дрый ревни́телю.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 10

Спасти́ хотя́ лю́ди Росси́йския от ро́зни братоуби́йственныя, царю́ Нико́лае, престо́л земны́й оста́вил еси́, оба́че, на ми́лость Бо́жию упова́я, непоколеби́м в ве́ре и благоче́стии пребы́л еси́, воспева́я: Аллилу́ия.

И́кос 10

Стена́ и огражде́ние бысть Госпо́дь тебе́, царю́ Нико́лае, Ему́ же те́пле моли́лся еси́, да сохрани́т держа́ву Росси́йскую от наше́ствия иноплеме́нник и братоуби́йственныя бра́ни, наипа́че же лю́ди Правосла́вныя во благоче́стии да укрепи́т. Сего́ ра́ди благода́рне воспева́ем ти си́це:

Ра́дуйся, полко́в Росси́йских му́дрый предводи́телю;

ра́дуйся, ра́тных люде́й христолюби́вый попечи́телю.

Ра́дуйся, оте́чества на́шего держа́вный храни́телю;

ра́дуйся, слове́нских наро́дов ре́вностный защи́тителю.

Ра́дуйся, мечи́ на ора́ла прекова́ти наро́ды призва́вый;

ра́дуйся, мир име́ти со все́ми язы́ки преи́скренне жела́вый.

Ра́дуйся, благове́рным князе́м в благоче́стии подража́вый;

ра́дуйся, о́браз царя́ Правосла́внаго во смире́нии ми́ру яви́вый.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 11

Пе́ния вся́каго досто́йна па́мять ва́ша, святи́и ца́рственнии страстоте́рпцы. Вы бо, о́браз испове́дничества и ре́вности по Бо́зе ве́рным лю́дем показа́вше, запове́дасте не мсти́ти злоде́ющим, па́че же проща́ти гоня́щим и моли́тву твори́ти за них, пою́ще Бо́гу: Аллилу́ия.

И́кос 11

Светоно́сный свети́льник седмочи́сленный ве́мы вас, святи́и ца́рственнии страстоте́рпцы, ца́рским бо путе́м ше́ствующе, угото́васте себе́ за Христа́ пострада́ти. Те́мже, просвети́те омраче́нная сердца́ на́ша и ева́нгельским путе́м ше́ствовати научи́те нас, прославля́ющих вас си́це:

Ра́дуйтеся, а́гнцы незло́бивии, А́гнцу Бо́жию в кро́тости подража́вшии;

ра́дуйтеся, о́браз терпе́ния в злострада́ниих ве́рным показа́вшии.

Ра́дуйтеся, во всем житии́ со́весть чи́сту храни́вшии;

ра́дуйтеся, убие́ние беззако́нное смире́нно восприе́мшии.

Ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии;

ра́дуйтеся, кро́вию му́ченическою зе́млю на́шу обагри́вшии.

Ра́дуйтеся, лик благове́рных царе́й и князе́й воспо́лнившии;

ра́дуйтеся, собо́р святы́х земли́ Росси́йския украси́вшии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 12

Благода́ть изря́дну Бог дарова́ Це́ркви Росси́йстей, просла́вив вас на Небеси́, ца́рственнии страстоте́рпцы, храни́телие и покрови́телие страны́ на́шея. Сего́ ра́ди и мы на земли́ почита́ем вас, Бо́гу вопию́ще: Аллилу́ия.

И́кос 12

Воспева́юще по́двиги ва́ша, ца́рственнии страстоте́рпцы, прославля́ем Триеди́наго Бо́га. Вы бо соизволе́нием Отца́ Безнача́льнаго, соверше́нием Сы́на Единоро́днаго и соде́йствием Свята́го Ду́ха Бо́жия прича́стницы Ца́рствия Небе́снаго соде́ластеся и засту́пницы оте́чества на́шего яви́стеся. Сего́ ра́ди дерза́ем взыва́ти вам си́це:

Ра́дуйтеся, я́ко прославле́нию ва́шему Це́рковь ра́дуется;

ра́дуйтеся, я́ко чудесы́ ва́шими ве́ра укрепля́ется.

Ра́дуйтеся, я́ко о́бразы ва́ши мироточе́нием прославля́ются;

ра́дуйтеся, я́ко в честь ва́шу хра́мы созида́ются.

Ра́дуйтеся, я́ко житие́м ва́шим лю́ди благоче́стию науча́ются.

ра́дуйтеся, я́ко терпе́нием ва́шим во страда́ниих ве́рнии назида́ются;

Ра́дуйтеся, я́ко ева́нгельския заве́ты исполня́ти нас наставля́ете;

ра́дуйтеся, я́ко бе́ды и ско́рби му́жественне нести́ нам помога́ете.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 13

О, святи́и ца́рственнии страстоте́рпцы! Приими́те от нас похва́льное сие́ пе́ние и ми́лостивым ва́шим хода́тайством умоли́те Царя́ Сла́вы мир стране́ на́шей дарова́ти, Це́рковь в Правосла́вии и еди́нстве сохрани́ти, нас же во благоче́стии утверди́ти, да вопие́м Бо́гу: Аллилу́ия.

Сей конда́к глаго́лется три́жды.

И па́ки чте́тся 1-й и́кос и 1-й конда́к.

Моли́тва

О, свята́я седмери́це, ца́рственнии страстоте́рпцы, Нико́лае, Алекса́ндро, Алекси́е, Мари́е, О́льго, Татиа́но и Анастаси́е!

Вы, сою́зом любве́ Христо́вы связу́еми, дом ваш, я́ко ма́лую Це́рковь, благоче́стно устро́или есте́ и смире́нием себе́ посреде́ земна́го вели́чия украси́ли есте́. В годи́ну же братоуби́йственныя бра́ни и гоне́ний безбо́жных во оте́честве на́шем, все упова́ние на Бо́га возложи́вше, о́браз терпе́ния и страда́ния всей земли́ Росси́йстей яви́ли есте́ и, моля́щеся о мучи́телех, клевету́, у́зы и изгна́ние, глумле́ние, насмея́ние и оболга́ние, убие́ние и теле́с поруга́ние му́жественне претерпе́ли есте́. Сего́ ра́ди от земна́го ца́рствия к Небе́сному прешли́ есте́ и те́плии хода́таи о нас яви́лися есте́.

О, святи́и уго́дницы Бо́жии! Моли́теся о нас Бо́гу, да Це́рковь в единомы́слии и тве́рдей ве́ре соблюде́т, страну́ на́шу ми́ром и благоде́нствием огради́т и от междоусо́бныя бра́ни и разделе́ния изба́вит, власть предержа́щую умудри́т, во́инство му́жеством украси́т, супру́ги в ве́рности и любви́ укрепи́т, ча́да в благоче́стии и послуша́нии возрасти́т, и вся ны ку́пно с ва́ми сподо́бит воспева́ти Пречестно́е и Великоле́пое и́мя Живонача́льныя Тро́ицы Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

И́на моли́тва, страстоте́рпцу царю́ Никола́ю

О, святы́й страстоте́рпче, царю́ му́чениче Нико́лае! Госпо́дь тя избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя, я́ко И́ова Многострада́льнаго, попусти́ тебе́ поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся сия́ ра́ди бла́га Росси́и, я́ко ве́рный сын ея́, претерпе́в, и, я́ко и́стинный раб Христо́в, му́ченическую кончи́ну прие́м, Небе́снаго Ца́рства дости́гл еси́, иде́же наслажда́ешися Вы́шния сла́вы у Престо́ла всех Царя́, ку́пно со свято́ю супру́жницею твое́ю цари́цею Алекса́ндрою и ца́рственными ча́ды Алекси́ем, О́льгою, Татиа́ною, Мари́ею и Анастаси́ею. Ны́не, име́я дерзнове́ние ве́лие у Христа́ Царя́, моли, да пода́ст нам Госпо́дь грехо́в проще́ние и на вся́кую доброде́тель наста́вит нас, да стяжи́м смире́ние, кро́тость и любо́вь, и сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.