Служба преподобному Варсонофию Оптинскому
Месяца апреля в 1-й день
Преподобного Варсонофия Оптинскаго
На малой вечерни
На Господи, воззвaх: стихиры преподобному, глaс 2.
Подобен: Егда от Древа:
Егда найде на тя Божественное рачение,/ преподобне отче Варсонофие,/ и глас великаго аввы на высокая тя повлече,/ тогда оставил еси воинство царя земнаго,/ ополчение же монашеское тя, воина крепкаго, прият,/ и поборствуя мрачная бесовская полчища,/ не отступил еси пред врагом древним,/ темже и украсился еси венцем нетленным,/ стратилате Оптинский.
В божественное ополчение/ достойно вчинился еси, отче славный,/ не яко наемник, но яко поборник непобедимый,/ иноков воинство влечеши до ныне к высотам победным,/ мглу разгоняя греховную,/ долу влекущия страсти попаляя молитвы огнем./ Воеводо избранный Царя Христа, Варсонофие,/ моли Господа Сил непрестанно,/ о воспевающих память твою.
Яко солнце, возсиял еси в пустыни Оптинстей,/ молитвенными стоянии прогоняя полчища демонская,/ лучами разсуждения разсеявая прелесть врага,/ непобедимь явился еси о Имени Господни,/ и ангелов привлекл еси соратовати иноком,/ Варсонофие, игумене добрый./ Темже Господа Сил моли о нас,/ да соблюдется обитель сия,/ яко веры светильник.
Слава, глaс 5:
Благодати старчества наследниче,/ преподобне Варсонофие, отче наш, Амвросиево благословение,/ Анатолиево воспитание,/ Иосифов сотрудниче,/ Нектариев сотаинниче,/ Никону наставниче любомудрый,/ преподобных отец соревнителю,/ Христа друже искренний,/ Того моли даровати чтущим тя велию милость.
И ныне, Богородичен.
На стиховне стихиры преподобному, глас 8:
Показал еси рачение ангельское,/ и любовь истинную явил еси Владыце,/ в послушании и пощении, в словеси и молитве,/ равен быв по всему отцем твоим,/ и чудес лучами просиял еси:/ темже стратилат непобедимый,/ отче наш Варсонофие,/ предстательствуй за обитель и люди,/ чтущия память твою.
Стих: Честна пред Господем/ смерть преподобных Его.
Ревнуя поревновал еси,/ отче богомудре Варсонофие,/ отеческим преданием,/ и уставом спасительным,/ не яко трость, колеблема ветром века сего,/ но щитом вооружився послушания,/ верно последуя твоим наставником,/ молитвою возметал еси, яко прах,/ ополчения бесовская,/ и во обителех отцев твоих ныне водворяяся,/ не забуди обитель твою,/ тя величающую.
Стих: Блажен муж, бояйся Господа,/ в заповедех Его восхощет зело.
Питаемь от корней благих,/ возраставый под сению отцев мудрых,/ явил еси старчества плод совершенный, отче дивный Варсонофие,/ и Никона славнаго, добропобедную леторасль,/ напоследок лет нам даровал еси,/ с нимже ныне в раи водворяяся,/ назирай обитель твою, приснопамятне,/ возращая ея монашеския крины,/ одождением молитв твоих.
Слава, глaс 6:
Воинскую славу мирскую оставив,/ и вся яже тленная на земли,/ к горнему ратоборству востекл еси,/ силою Христовою свыше одеян,/ и умною молитвою вооруженный,/ неодолимь явился еси, Варсонофие,/ побеждая духов во брани невидимей,/ и почести вышняго звания достигл еси./ Ныне же с вышними соединивыйся воинствы,/ охраняй отеческим благословением чад твоих,/ во еже спастися душам нашим.
И ныне, Богородичен,
Тропарь зри на велицей вечерни.
На велицей вечерни.
На Господи, воззвaх: преподобному стихиры, глас 4.
Подобен: Званный свыше:
Свыше зван быв,/ а не от человек,/ егда болезнь неисцельная/ связа телесныя уды,/ неплодныя смоковницы посечение в разум приводя,/ тогда небесный свет облиста/ мысленнеи очи,/ духовное зрение отверзая./ Темже воин быв царя земнаго, Варсонофие,/ служитель Христа, Света Истиннаго, соделался еси,/ Егоже моли спасти и просветити души наша.
Егда в пустыню Оптину,/ яко во град ограждения, вшел еси,/ тогда седины твоя и разум/ в послушание отцем преклонив,/ оружием смирения на исконнаго врага ополчился еси,/ терпением скорбей искусство стяжав,/ искусством же упование,/ о немже не посрамился еси, преподобне,/ познав любовь Божию Духом Святым.
Избранный свыше от младенства твоего,/ во еже от ада исхищати души человек,/ сокровище духовное от отеческого предания собрав,/ небесным хлебом препитал еси приходящих к тебе,/ покаянием очищая и ко Христу приводя,/ Егоже моли спасти и просветити души наша.
Преподобным отцем последуя,/ разсуждения превышший дар/ пользы ради людей приял еси,/ преподобне отче Варсонофие,/ духовне востязуя вся,/ от плотских никакоже востязуешися,/ ум бо имаши Христов,/ темже моли спасти и просветити души наша.
Свыше званнаго наставника иноком,/ земли Русския печальника/ и всем христианом молитвенника,/ ублажаем тя, Варсонофие отче наш,/ аще бо и пророческий твой язык умолче,/ обаче веруем, яко любы твоя николиже престает,/ и ныне молиши Христа Бога/ спасти и просветити души наша.
Слава, глaс 6:
Огнем Божественнаго Духа/ разжжен быв, преподобне,/ древнее житие монашеское восприял еси,/ поборниче уставов иноческих/ и отцев твоих наследниче,/ пустынь Оптинскую яко благоцветущий рай показав,/ друже Предтечев и пустынных обучителю,/ Варсонофие, отче священнейший,/ моли избавитися будущих треволнений,/ верно совершающым память твою.
И ныне, Богородичен: Кто Тебе не ублажит, Пресвятая Дево:
Вход. Прокимен дне. И чтения преподобническая.
Аще ли пост, по входе прокимен Триоди, чтения дне и преподобнаго.
На литии стихира храма.
И преподобному стихиры, глас 6:
Любовию последуя во Иерусалим восходу,/ душу предал еси Распеншемуся за тя,/ и венцем поругания увенчался еси,/ и люте уязвился еси копием скорбей, преподобне Варсонофие,/ темже зовем ти:/ благословен еси, отче,/ грядый прияти почесть вышняго звания,/ и Престолу Царя предстати,/ идеже помяни тебе последующих,/ и будущаго осуждения избави/ любовию хвалящих тя.
Слава, глaс 3:
Велия молитв твоих сила,/ преподобне старче Варсонофие,/ духи бо лукавыя отгоняеши,/ и вражия коварства разрушаеши,/ покаянием души исцеляеши,/ скорби и болезни утоляеши,/ да вси прославим Христа Бога,/ Дивнаго во святых Своих.
И ныне, Богородичен, глас тойже:
Велия чудес Твоих, Благодатная!/ Избавляеши бо от бед и спасаеши от смерти,/ и восхищаеши от напастей нечаянных,/ и скорби разрешаеши,/ и согрешения человеков отъемлеши.
Аще пост, на стиховне стихиры Триоди. Слава, преподобнаго, глас 8: Что тя, отче Варсонофие, наречем: И ныне, Богородичен воскресен, глас тойже.
На стиховне стихиры преподобнаго, глас 1:
Преподобне отче Варсонофие, кто изочтет подвиги и труды твоя?/ Бдение же и пощение,/ в молитве терпеливое пребывание,/ церкве украшение и келлий строение,/ о иночестем чине и о всякой души попечение:/ уста бо твоя ко утешению отверзошася,/ сердце же распространися любовию,/ и не тесно вместил еси приходящих к тебе,/ да вся приобрящеши и Христу приведеши,/ Егоже моли о душах наших.
Стих: Честна пред Господем/ смерть преподобных Его.
Яже в горний Иерусалим восхождения/ степени прошел еси, Варсонофие отче наш:/ укорение, клевету и поругание,/ возлюбленнаго скита разлучение,/ крест настоятельства в старости и болезни,/ обаче послушлив быв даже до смерти,/ во Христе Иисусе мудрование стяжал еси./ Моли спастися душам нашим.
Стих: Что воздам Господеви о всех,/ яже воздаде ми.
Яже в мире красная, преподобный остави,/ горния красоты возжелев,/ и от гласа мирскаго слух отвратив,/ пению небесному поучашеся,/ сердцем и усты непрестанно пояше:/ Господи, Иисусе Христе, помилуй мя грешнаго.
Слава, глaс 8:
Что тя, отче Варсонофие, наречем?/ Провидца ли, яко тайная душ обличаеши?/ Врача ли, яко недужныя и бесныя целиши?/ Пророка ли, грядущая бо яве сказуеши?/ Вожда ли духовна, спасения бо путь указуеши?/ Многая от Бога приял еси/ и преумножил еси дарования:/ моли спастися душам нашим.
И ныне, Богородичен воскресен, глас тойже:
Тропарь (Василия иеромонаха), глaс 4:
Воине доблественный и изрядный,/ светом откровения, яко Павел озаренный,/ вся во уметы, Христа ради, вменил еси,/ иноческим подвигом подвизался еси,/ течение скончав и веру соблюд,/ темже зовем ти:/ спасай нас молитвами твоими,/ преподобне Варсонофие, отче наш.
Ин тропарь, глас 3:
Красото Церкве Русския,/ утверждение старчества Оптинскаго,/ иноческих заветов блюстителю,/ оруженосче Господень верный,/ преподобне отче Варсонофие,/ мечем молитвы змия победивый,/ вышния почести о Христе достигл еси,/ темже молися Тому:/ отечеству на враги победу даровати/ и спасти души наша.
На утрени
По 1-м стихословии седален преподобному, глас 2:
Книгу жизни, в нейже промыслом Божиим письмена устрояются, уразумевати поучал еси чада твоя, Варсонофие отче наш, духовне бо испытуеши вся бываемая, от суетнаго сего к вечному животу возводя человеки: молися убо, отче, о нас, да благодатию Божию просветимся.
Слава, и ныне праздника, или Богородичен:
Милосердия сущи источник, милости сподоби нас, Богородице, призри на люди согрешившия, яви яко присно силу Твою: на Тя бо уповающе, радуйся вопием Ти, якоже иногда Гавриил, Безплотных архистратиг.
По 2-м стихословии седален преподобному, глас 6:
Возвеселил мя еси, Господи, в творении Твоем, тако взывал еси, преподобне, дольния красоты благолепие, яко сень и образ небеснаго зря и от художества внешняго ко внутреннему обращая, сего ради любовию ти взываем: радуйся, благодати псалтирю доброгласный, преподобне Варсонофие, отче наш.
Слава, и ныне, Богородичен:
Краснейшаго добротою паче сынов человеческих, во объятиих Своих несказанно носившая, Того красоты взыскати привлецы мою душу, Тому во клети сердца всегда собеседовати, да Тебе благодарно песнь воспою: радуйся Мати Света благословенная.
По полиелеи седален, глас 6:
Днесь радуются собори верных, в молебней памяти преподобнаго Варсонофия, старца Оптинскаго, иже тесным путем в мире шествова, тяготы ближняго трудолюбно нося и, на конец жития своего скорби и разлучение от обители претерпев, мощьми своими ко братии своей возвратися, и ныне, душею на небеси со ангелы радуяся, молит прилежно о нас, любовию совершающих светлое его торжество.
Слава, и ныне, Богородичен:
Безпомощным крепость Ты воистину, Пресвятая Дево Мати, отсюду, смиреннии, Тобою возвышаемся и к Тебе присно прибегаем: всем Ты еси Покров и к Богу Ходатаица.
Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.
По 50-м псалме стихира, глас 6:
Столпе огненный благочестия,/ предводяй иноческия полки,/ жезлом молитвы сланое море страстей разсек,/ в землю безстрастия обетованаго достигл еси,/ демонская искушения посекая смиренномудрия мечем,/ соблюдая скит возлюбленный яко рай,/ и ныне гониши от стада твоего полки чуждих,/ Варсонофие, старче Оптинский,/ моли о душах наших.
Канона святаго два.
Канон преподобнаго, глас 4, егоже краегранесие: Стратилата Оптинскаго венцем увязем.
Песнь 1
Смиренномудрия венцем да украсится воин Христов, приснославный Варсонофий, Божественным смирением уязвивый прегордых бесов, и мрачная собрания их разгнавый бичем молитвенным: тому победное ныне воспоим пение.
Тристаты крепкия страстей, отче доблемудре Варсонофие, потопил еси водами слезными, и разжженныя стрелы врага угасил еси, во умерщвлении телесе своего противляяся сопротивнаго приражениям.
Радостно во след Царя Христа потек, ангельскому воинству поревновал еси, и доспехи воина земнаго, яко вся мирская, с себе совлек, и в безстрастие восхотев облещися, Варсонофие, иноческому полку сочетался еси.
Богородичен: Ангельское воинство Тебе служит, и Херувим и Серафим Тя славят множества, чистоте Твоей дивятся Престоли, Силы же и Власти проповедуют Твою державу, Владычице, яко родила еси всех Владыку и Спаса.
Ин канон преподобнаго, глас 2, егоже краегранесие: Оптинскую хвалу, Варсонофия ублажаем.
Песнь 1
Ирмос: Моисейскую песнь восприимши, возопий, душе:/ Помощник и Покровитель бысть мне во спасение,/Сей мой Бог, и прославлю Его.
Оптины пустыни красу и хваление, преподобнаго старца Варсонофия ныне блажаще, Дивнаго во святых Своих Бога прославим.
Тишину скита возлюбив, преподобне, ангелу пустыни Предтечи последуя, устен безмолвием и молением непрестанным, помыслов откровением и вседушным послушанием, утешения благодатнаго был еси чадо, Подателя всяческих благ прославляя.
Богородичен: Иноком Тя помощницу теплую ведый, пред иконою Казанскою прилежно моляся, угодник Твой Варсонофий милость улучи, темже Тя в радости, Чистая Дево, прослави.
Песнь 3
Ирмос: Утвердися сердце мое в Господе,/ дающем молитву молящемуся,/ яко лук сильных изнеможе,/ и немощствующии препоясашася силою.
Треволнения мира избег, скит Оптинский избрал еси, Варсонофие, яко пристань безмолвную, старцем Амвросием призванный, и старцу Анатолию быв чадо послушания, темже и утвердися сердце твое во Господе.
Исполины страстей и бесов полцы изнемогоша, молитвою бо препоясався и именем Господним вооружився, тех поборал еси, Варсонофие воине доблий, Господа на помощь призывая.
Лукавствие врага изобличил еси, святоотеческий имея светильник разсуждения, в сердце же мир Христов: темже вся стрелы лукаваго невредны тебе сотворишася, богомудре, и лук того сокрушися.
Богородичен: Аще и во гресех есмь, и уста имам скверная, но не премолчу, Пречистая, благодеяния Твоя безмерная пети, Тобою бо утверждается сердце мое во Господе.
Ин.
Ирмос: Неплодствовавший мой ум,/ плодоносен, Боже, покажи ми,/ Делателю добрых, Насадителю благих,/ благоутробием Твоим.
Неплодныя смоковницы посечения убоявся, преподобне Варсонофие, отче наш, данный ти талант трудолюбно возделал еси: дивно бо бяше зрети мужа в летех совершенна, яко отроча послушливо, старцем внимающа, скорби от неразумных братий терпяща, благоутробнаго Бога о всем прославляюща.
Старца Анатолия глаголом внимая, не ризами токмо черными, бдением и посты хвалитися, но истиннаго монашества взыскати потщался еси, еже есть сокровенный сердца человек, Животворящим Духом внутрь созидаемый.
Книжное назидание с деланием сочетавати, от старца Нектария, преподобне, навыкл еси, служа тому, в затворе пребывающу, и безмолвно внимати себе поучался еси.
Богородичен: Утоление страстей, молитвы Подательнице, неплодие ума моего разреши, Всещедраго Бога благоутробная Мати.
Ин кондак, глас 4.
Божественный ратоборец показался еси,/ отче наш Варсонофие,/ крестом низлагая силу вражию,/ и силою Богоданною чудеса сотворяя,/ темже Оптина пустынь венчася славою твоих духовных побед,/ полководче монашествующих преславный:/ и ныне молися Царю Христу,/ победы над страстьми даровати,/ верою и любовию совершающим память твою.
Ин икос:
О воине доблий! О старче преподобнейший! Твою доброту монашескую пети дерзнух устнама нечистыма и умом слепотствующим, но посли ми в помощь светлую лучу молитвы твоея, да тою просвещаемь, тебе зову: Радуйся, монашествующих полководче непобедимый; радуйся, победы венценосче нарочитый. Радуйся, демоны в лица уязвивый; радуйся, смирением своим ангелы удививый. Радуйся, Оптинскаго старчества крепкое забрало; радуйся, молитвы умныя предивное светило. Радуйся, страждущим людем утешителю; радуйся, гражданине Царствия Небеснаго. Радуйся, предстояй Престолу Царя Христа, Егоже моли, победы над страстьми даровати, верою и любовию совершающим память твою.
Седален, глас 5:
Зарею бдений твоих просветил еси нощи, якоже дни, и свято совершив житие твое, со святыми ныне живеши, освящение посылая тя блажащим, преподобне отче Варсонофие.
Слава, и ныне, Богородичен:
Дево Пречистая, Покров буди на Тя уповающим, от различных напастей, обстояний и бед лютых свобождающи и молящи Сына Твоего спастися душам нашим.
Песнь 4
Терпением, яко скала, пребыл еси, юже буря не поколеба бесовская, утвердив бо себе самаго на камени веры, выну ко Христу взывал еси, отче Варсонофие: слава силе Твоей, Господи.
Анатолия старца учениче, преподобне Варсонофие, Оптинских отец благодатный преемниче, искус сугуб прошед и в меру тех достиг, старцем по духу наследовал еси, взывая: слава силе Твоей, Господи.
Оптина пустынь и скит, и вся чада твоя, тя видевше, яко сораспялся еси Христу, послушание понесый до смерти, да соделаешися совершен пред кончиною, вкупе взываху с тобою, преподобне: слава силе Твоей, Господи.
Богородичен: Пречистая и всекрасная Дево Марие, Солнце Праведное нам возсиявшая, Иже свет подает и радость миру, достойно Тя славим, Богорадованная.
Ин.
Юношески в старости твоей подвизаяся, послушание от Церкве, яко от руки Господни, приял еси: на брань в восточныя страны посылаешися, яко пастырь и утешитель воином русским.
Христова тя служителя зряще во врачебнице сущии воини: ови ранами тяжко уязвлени, ови же смерти приближающеся, души своя исповеданием очищаху и Святыя Тайны от руки твоея приимаху, во оставление грехов и в напутие жизни вечныя.
Воина Христова, Варсонофие, добропобедна, послушанием молитвы мечь изощривша, рождшая тя обитель паки прият, яко начальника иноком, и во бранех духовных вожда преизящна.
Богородичен: Ангельски воспеваю Ти: Благодатная, радуйся, радости вся исполнившая Твоим Рождеством, Божия снизхождения Лествице, и человеком степень восхождения.
Песнь 5
Ирмос: Ревность приимет люди ненаказанныя,/ законопреступныя евреи,/ и огнь пояст супостаты Твоя,/ яко Тя распятаго,/ лестца именоваша.
Твоим добродетелем дивишася ангели, людие же ненаказаннии тя льстивым именоваху, обаче ты, преподобне Варсонофие, не люди, но грехи ненавидевый, токмо любити и добро творити призывал еси.
Истинный послушник быв, Варсонофие, и пастырь доблий явился еси, молитвы подвиг от старца твоего унаследовал еси, да люди Божия воистину наставиши, и от огня заступиши, льстивым врагом разжженнаго.
Назнаменуй нас крестом честным, той бо, яко жезл, восприял еси на поприщи земнем, Христа и древних преподобных в молитвах призывая, и не посрамлен был еси, имже и поприще твое духовное освятися.
Богородичен: Священную память воина Твоего, иноческое ополчение ко брани подвизает, Владычице: темже, радуйся, Взбранная Воеводо наша, Тебе зовем, Дево Марие, Богоблаженная.
Ин.
Ирмос: Света Подателю, и веков Творче, Господи,/ во свете Твоих повелений настави нас:/ разве бо Тебе иного Бога не знаем.
Лепоты храма Божия усердный рачителю, книгоположницы, келлий и вертограда скитскаго попечителю, паче же души братий хранити потщался еси, любовию, разсуждением и молитвою сети вражия расторгая премудро.
Унынием одержими, помыслы тяжко стужаеми, притекаху к тебе иноцы, яко авве своему, ты же коегождо яко чадо возлюбленно приимаше, оваго убо тихостию утешаше, оваго же прещением вразумляше, ко свету наставляя повелений Господних.
Верою к тебе прибегающим от мира, исцеления многоразличная подавал еси, отче, страсти греховныя исторгая, и светом Христовым к правым стезям наставляя.
Богородичен: Адамово воззвание, и Евино обновление, Мати Света, Пречистая, тьму души моея озари, ко свету повелений Господних мя наставляющи.
Песнь 6
Ирмос: В ките, Христе, тридневновав Иона,/ прописа Тя Безсмертнаго,/ яко мертва волею,/ в сердце земнем тридневновавша.
Красоту и благолепие во всем возлюбивый, паче же возлюбил еси красоту духовную, и подвигом крестным душу твою преобразил еси, яко сокровенный сердца человек в тебе явися, лепотою Духа Святаго украшенный.
Аще и не млад пришел еси подвизатися, обаче младенчески искал еси заступления, Варсонофие, и обрел еси старцев опытных, скрыв себе от мира в скиту, безмолвием наслаждаяся, да обновлен изыдеши к новому житию.
Горняя мудрствуя присно, истинный мудрец явился еси, возлюбивый Христа, Премудрость Истинную: темже мнози человецы, Бога ищущии, прелестная мудрования тобою оставиша и волю Божию творити научишася.
Богородичен: Оптинский град соблюди, Пречистая, иже созидашеся старцы богомудрыми, и утверди священныя храмы Твоя, Богоблагодатная, да проповедуется миру Слава Божия.
Ин.
Ирмос: Во глубине греховней содержимь есмь, Спасе,/ и в пучине житейстей обуреваем:/ но якоже Иону от зверя,/ и мене от страстей возведи, и спаси мя.
Разсуждения и прозрения дар от Бога прием, души бо, яко книги отверстыя, зриши, тайная и недоведомая тамо чтеши, и мрежею Духа человеки ловя, из глубины греховныя тех изымаеши.
Старчества и ученичества образ истинный явиша Варсонофий и Никон, отцы преподобнии: ов убо верою и послушанием ко авве взираше, ов же молитвою и любовию чадо свое обымаше. Молите о нас, избранная двоице, от страстей возвести и спасти ны.
Отче Варсонофие богомудре! Иноческое житие азбуце уподобил еси, глаголя: буква аз есть себе самаго познание; буки, на Бога несумненное упование; веди, духовнаго ведения начало; глагол, от избытка сердца устен глаголы; тако бо восходяще от силы в силу, благодатию Христовою назидаемся и спасаемся.
Богородичен: Неизреченно, Чистая Дево, заченшая, и Спаса миру родившая, Того моли и мене от страстей возвести, и спасти мя.
Кондак, глас 4:
Подобен: Явился еси:
Явился еси старчества благочестиваго столп огненный,/ любве Евангельския сияние,/ пророчествуя, назидая и утешая,/ подая человеком от грехов врачевание,/ преподобне Варсонофие, отче наш.
Икос:
Возвестите нам Ангели Божии, тишину молитв скита Оптинскаго хранящии: киих воздыханий старческих слышатели бысте; колико исцелений и благодарных слез страждущих видесте; жития бо и подвига преподобных отец бысте свидетели, от нихже единаго ныне с вами ублажающе, сице рцем: радуйся, любве Евангельския сияние, преподобне Варсонофие, отче наш.
Песнь 7
В восточныя страны течение совершил еси Варсонофие, и светоносных словес твоих тамо возсияша лучи, воини же, Тайнам Христовым причастнии, благодарне взываху: Боже отец наших, благословен еси.
Еже иноческия уставы древних отцев соблюдая, монашескаго жития взыскующым наставник был еси, обаче и архиереи к тебе притекаху, богомудре, и тобою наставляеми, взываху: Боже отец наших, благословен еси.
Не на силу свою уповал еси, отче, аще и искусен воин быв, обаче ведый коварство вражие, яко отроцы во огни к Богу взывал еси: ныне помози нам, Спасе, разори халдейское нечестие, Боже отец наших, благословен еси.
Богородичен: Цевнице Давидова, с нами воспой Богоневестную дщерь Израильскую, и языки пригласи воспети Той: Еммануилева Мати, благословенна еси, яко откры Господь Правду Свою.
Ин.
Ирмос: Херувимы подражающе отроцы,/ пещи ликовствоваху вопиюще:/ благословен еси, Боже,/ яко истиною и судом навел еси сия вся, грех ради наших,/ препетый и препрославленный во вся веки.
Отеческим путем молитвы шествовати хотящих, укреплял еси, преподобне, ко скорбем и напастем душу свою уготовати, во искушениих же верою взывати: благословен еси, Боже, яко истиною и судом навел еси сия вся, грех ради наших, препетый и препрославленный во вся веки.
Фарисейское велеречие отринув, мытарски по вся дни взывал еси, отче: Боже, очисти мя, Иисусе, помилуй мя, препетый и препрославленный во вся веки.
Истину учения Церкве исповедуя, адския муки во откровении чувством сердца постигл еси, но, отчаяние препобеждая, взываше: благословен еси, Боже, препетый и препрославленный во вся веки.
Богородичен: Яко росоносная пещь халдейская, огнь Божества неопально во чреве приимшая, Богородице Дево, пламень страстей моих ороси, да Тя пою во вся веки.
Песнь 8
Ирмос: Руце распростер Даниил,/ львов зияния в рове затче:/ огненную же силу угасиша,/ добродетелию препоясавшеся,/ благочестия рачители отроцы взывающе:/ благословите, вся дела Господня Господа.
Евангельски душу твою за овцы положити хотя, на крест послушания возшел еси, доблемудре Варсонофие, образ яве в себе предначертав, пастыря и агнца, Христу Пастыреначальнику подобяся.
Мира великое смятение предрекл еси, о гонении Церкве Божия яве предуказав, и предания иноческая призывал еси хранити, вражию бо силу победит сила Божия, темже наставлял еси, Варсонофие: благословите, вся дела Господня Господа.
Утверждая на стезях спасительных верныя, иже притекаху к тебе, Варсонофие отче, скорби претерпел еси от лжебратии, обаче добродетелию препоясався, смиренно взывал еси: благословите, вся дела Господня Господа.
Богородичен: Высока, Богородице, тайна, яко из утробы Твоея Солнце явися в мир незаходимое, и лучи девства непостижимаго осияша человеческое естество, темже, благочестия рачители, благословите, Деву и Матерь Господа.
Ин.
Ирмос: Неизреченною мудростию/ составльшаго всяческая Бога Слова,/ и от не сущих во еже быти Приведшаго,/ благословите, дела, яко Господа,/ и превозносите во вся веки.
Утреннюющу ти к Богу на всяку нощь, источник сладости и утешения во службе церковней тебе отверзеся, от негоже почерпая, Варсонофие, отче наш, наставляеши чада твоя, Господа пети и превозносити Его во вся веки.
Благодатных исцелений и прозрений дар смиренномудренно сокрывая, в таинствах Церкве путь врачевания указуеши, и ко источнику преподобнаго Тихона недужныя посылаеши, яко да приемшии по вере своей врачевство, единаго Господа поют и превозносят во вся веки.
Любезных ти старцев Оптинских возлюбленный сомолитвенниче, и благодатнаго пастыря Кронштадтскаго духовный сотаинниче, купно с ними исцеления подаеши притекающим с верою, да вси дивнаго во святых своих Бога поют и превозносят во вся веки.
Богородичен: Ад упразднися и рай паки отверзеся, Твоим Рождеством, Дево, темже Тя, яко Матерь Избавителя, поем и превозносим во вся веки.
Песнь 9
Ирмос: Бог Господь и явися нам,/ составите праздник/ и веселящеся,/ приидите возвеличим Христа,/ с вайами и ветвьми, песньми зовуще:/ Благословен грядый во имя Господа Спаса нашего.
Яко злато искушено во огни скорбей, чист явился еси Владыце твоему, Варсонофие, и яко камень многоценный, огранен рукою искусною, в диадиме Оптинстей укреплен, ныне сияеши в пренебесней сокровищнице Господа Спаса нашего.
Звезда еси, отче, Оптинская, путеводящая в горний Иерусалим: аще и тьма накрыет нас в стране далече, но на тебе взирающе, паки поспешим ко Отцу, да во время свое веселящеся внидем в дом Господа Спаса нашего.
Еже от Христа приял еси дарование, преподобне, знамения творити и чудеса, яко глухому и немому отроку слух и уста отверзл еси: темже и души наша исцели, к целомудрию приводя память твою чтущих и величающих Господа Спаса нашего.
Богородичен: Младенца Божественнаго рождши, во объятиях Того носила еси, и от сосцу питала еси, Богородице, со ангелы у яслей воспевающи: слава в вышних Богу, возвеличившему Деву, яко Матерь Господа Спаса нашего.
Ин.
Ирмос: От Бога Бога Слова,/ неизреченною мудростию пришедшаго обновити Адама,/ ядию в тление падшаго люте:/ от Святыя Девы неизреченно воплотившагося нас ради,/ вернии, единомудренно песньми величаем.
Жестоковыйныя, яко козлища, от овец Христовых отделил еси, пастырю добрый, обитель Оптину от духа мира сего молитвенно ограждая.
Аще и клеветы и гонения сыны века сего воздвигоша на тя, и от обители Оптины отлучиша, обаче духом не разлучился еси возлюбленных братий, по преставлении к сим телом возвратився, тии же тя, яко жива, со слезами сретоша, единомудренно Бога величающе.
Единаго Агнца и Пастыря кроткий служителю, яко агнец безгласен, скорби терпя, иноком Голутвинским пастырь добрый явился еси, в попечении о душах даже до смерти труждаяся, темже тя любовию, старче Варсонофие, ублажаем.
Богородичен: Мати Слова, Сосуде чистоты, безсловесных страстей мя избави, яко да Воплощеннаго от Тебе разумно величаю.
Светилен:
Подобен: Небо звездами:
Небо звездами украсивый, яко Бог, и землю нашу любовию старцев Оптинских озаривый, Содетелю всех, поющия Тя спасай.
Слава:
Победоносно светоносяй светильник разсуждения, озарил еси иноком путь спасительный, настави и нас грешных, отче Варсонофие, да чада света наречемся.
И ныне, Богородичен:
Сладосте ангелов, скорбящих радосте, христиан предстательнице, Дево, Мати Господня, заступи нас, и избави вечных мук.
На хвалитех стихиры преподобнаго, глас 4.
Подобен: Дал еси знамение:
Дал еси украшение/ Церкви Русской, Господи,/ преподобнаго Варсонофия,/ Твоего угодника,/ в соборе старцев Оптинских светло сияюща,/ и путь спасения верным озаряюща,/ того молитвами грехов наших тьму отжени,/ Иисусе всесильне,/ Спасе душ наших.
Дал еси знамение/ отечеству нашему, Господи,/ пророческая словеса Варсонофия Оптинскаго,/ яко паки возстанут гонители на Церковь Твою,/ и паки кровь христианская пролиется,/ обаче претерпевшия до конца спасени будут./ Сих же сбытие видевше, славим премудрость Твою,/ Иисусе всесильне,/ Спасе душ наших.
Дал еси хваление/ Оптиной обители, Господи,/ честныя и цельбоносныя мощи/ преподобнаго Варсонофия, Твоего угодника,/ ихже ныне радостно лобызаем,/ исцеления различная приемлюще,/ темже Твое неизреченное милосердие славим,/ Иисусе всесильне,/ Спасе душ наших.
Слава, глас 6:
Все отложив житейское томление,/ и сладость мирскую презрев,/ крест взем, яко иго Божественное,/ и Христу последуя в житии иночестем,/ к небесному покою чудно вселился еси./ О, друже Христов, сосуде Духа Святаго честный,/ преподобне старче Варсонофие,/ прииди и стани посреде нас невидимо,/ сподобляя даров невещественных/ твой праздник совершающих святолепно.
И ныне, Богородичен, глас тойже:
Бога из Тебе воплотившагося разумехом,/ Богородице Дево:/ Того моли о спасении душ наших.
На Литургии
Блаженны от канона преподобнаго, песнь 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя его. Евангелие от Матфеа, зачало 10. Причастен: В память вечную будет праведник, от слуха зла не убоится.
Молитва
О, преподобне и богоносне отче Варсонофие, старче Оптинский, вседетельныя любве Бога Отца Безначальнаго честное зерцало! Крестныя любве Сына Божия смиренный подражателю, дародательныя любве Бога Духа Святаго сосуде избранный! Моли убо, отче, о нас, под кров молитв твоих прибегающих, да огнем любве Божия к покаянию просветимся, и дух теплохладности, малодушия и лицемерия от душ наших извергше, на делание заповедей Его до вечера жизни нашея устремимся: плоды же покаяния поне на старость принесше, да внидем в радость Господа нашего, идеже ты в незаходимей сияеши славе, прославляя Содетеля и Совершителя всяческих Бога, в Троице покланяемаго во веки веков. Аминь.
Дни памяти: 1 апреля, 11 октября (Оптин.) 
Преподобный Варсонофий (Плиханков), старец Оптиной пустыни
Преподобный Варсонофий, в миру Павел Иванович Плиханков, родился 5 июля 1845 года. Его путь в монастырь был долог и нелегок, в миру прошло 46 лет — большая часть его жизни. Кадетский корпус, военная служба, блестящая карьера. Прямая возможность к стяжанию всех мирских благ. И… отказ от всего. Сослуживцы и знакомые никак не могли понять: что же за «изъян» в стройном, красивом полковнике, весь облик которого так дышал каким-то удивительным внутренним благородством? Жениться не женится, балов и званых обедов, равно как и прочих светских развлечений, избегает. В театр, бывало, ходил, да и тот бросил. За спиной у Павла Ивановича даже поговаривали порой: «С ума сошел, а какой был человек!..»
А между тем то были лишь вехи на пути Павла Ивановича к оставлению дольнего и восхождению горняя. Как-то ноги сами собой привели его в небольшой бедный монастырь, посвященный святому Иоанну Предтече. Там полюбилось ему молиться у мощей святителя Варсонофия Казанского, долгие часы простаивал он в монастырском храме у раки святого. Мысль о монашестве поначалу страшила, уход в монастырь казался делом невозможным, постепенно созревала решимость оставить мир. Оставалось лишь сделать выбор: в какой обители положить начало иноческому подвигу? В период этих раздумий попался в руки Павлу Ивановичу один духовный журнал, а в нем — статья об Оптиной пустыни и преподобном старце Амвросии.
…Когда он только подходил к Оптинскому скиту, находившаяся в «хибарке» старца Амвросия одна блаженная неожиданно с радостью произнесла: — Павел Иванович приехали.
— Вот и слава Богу, — спокойно отозвался преподобный Амвросий…
Здесь же, в «хибарке», и услышал Павел Иванович поразившие его слова преподобного: «Через два года приезжайте, я вас приму». По прошествии двух лет полковник Плиханков подал прошение об отставке. В Оптину он прибыл в последний день отпущенного ему преподобным срока, но старца в живых уже не застал.
10 февраля 1892 года Павел Иванович был зачислен в число братства Иоанно-Предтеченского скита и одет в подрясник. Каждый вечер в течение трех лет ходил он для бесед к старцам: сначала к преподобному Анатолию, а затем к преподобному Иосифу.
Через год, 26 марта 1893 года, Великим постом послушник Павел был пострижен в рясофор, в декабре 1900 года по болезни пострижен в мантию с именем Варсонофий, 29 декабря 1902 года рукоположен в иеродиакона, а 1 января 1903 года был рукоположен в сан иеромонаха…
В 1903 году преподобный Варсонофий был назначен помощником старца и одновременно духовником Шамординской женской пустыни и оставался им до начала войны с Японией.
Вскоре начинается Русско-японская война, и преподобный Варсонофий за послушание отправляется на фронт: исповедует, соборует и причащает раненых и умирающих, сам неоднократно подвергается смертельной опасности. После окончания войны преподобный Варсонофий возвращается к духовничеству. В 1907 году он возводится в сан игумена и назначается скитоначальником.
К этому времени слава о нем разносится уже по всей России. Ушли в вечные обители святой праведный отец Иоанн Кронштадтский, преподобный старец Варнава Гефсиманский. Страна приближалась к страшной войне и неизмеримо более страшной революции, житейское море, волнуемое вихрями безумных идей, уже «воздвизалось напастей бурею», люди утопали в его волнах…
Как в спасительную гавань, стремились они в благословенный Оптинский скит к преподобному Варсонофию за исцелением не только телес, но и истерзанных, истомленных грехом душ, стремились за ответом на вопрос: как жить, чтобы спастись? Он видел человеческую душу, и по молитвам ему открывалось в человеке самое сокровенное, а это давало ему возможность воздвигать падших, направлять с ложного пути на истинный, исцелять болезни, душевные и телесные, изгонять бесов. Его дар прозорливости особенно проявлялся при совершении им Таинства исповеди. С.М. Лопухина рассказывала, как, приехав 16-летней девушкой в Оптину, она попала в «хибарку», в которой принимал старец. Преподобный Варсонофий увидел ее и позвал в исповедальню и там пересказал всю жизнь, год за годом, проступок за проступком, не только указывая точно даты, когда они были совершены, но также называя и имена людей, с которыми они были связаны. А завершив этот страшный пересказ, велел: «Завтра ты придешь ко мне и повторишь мне все, что я тебе сказал. Я хотел тебя научить, как надо исповедоваться»…
Оптину за все время своей монашеской жизни преподобный Варсонофий покидал лишь несколько раз — только по послушанию. В 1910 году, также «за послушание», ездил на станцию Астапово для напутствия умиравшего Л.Н. Толстого. Впоследствии он с глубокой грустью вспоминал: «Не допустили меня к Толстому… Молил врачей, родных, ничего не помогло… Хотя он и Лев был, но не смог разорвать кольцо той цепи, которою сковал его сатана».
В 1912 году преподобного Варсонофия назначают настоятелем Старо-Голутвина Богоявленского монастыря. Несмотря на великие духовные дарования старца, нашлись недовольные его деятельностью: путем жалоб и доносов он был удален из Оптиной. Смиренно просил он оставить его в скиту для жительства на покое, просил позволить ему остаться хотя бы и в качестве простого послушника.
Мужественно перенося скорбь от разлуки с любимой Оптиной, старец принимается за благоустройство вверенной ему обители, крайне расстроенной и запущенной. И как прежде, стекается к преподобному Варсонофию народ за помощью и утешением. И как прежде, он, сам уже изнемогавший от многочисленных мучительных недугов, принимает всех без отказа, врачует телесные и душевные недуги, наставляет, направляет на тесный и скорбный, но единственно спасительный путь. Здесь, в Старо-Голутвине, совершается по его молитвам чудо исцеления глухонемого юноши. «Страшная болезнь — следствие тяжкого греха, совершенного юношей в детстве», — поясняет старец его несчастной матери и что-то тихо шепчет на ухо глухонемому. «Батюшка, он же вас не слышит, — растерянно восклицает мать, — он же глухой…» — «Это он тебя не слышит, — отвечает старец — а меня слышит», — и снова произносит что-то шепотом на самое ухо молодому человеку. Глаза того расширяются от ужаса и он покорно кивает головой… После исповеди преподобный Варсонофий причащает его, и болезнь оставляет страдальца.
Меньше года управлял старец обителью. Страдания его во время предсмертной болезни были поистине мученическими. Отказавшийся от помощи врача и какой бы то ни было пищи, он лишь повторял: «Оставьте меня, я уже на кресте…» Причащался старец ежедневно.
1/14 апреля 1913 года предал он свою чистую душу Господу. Похоронен был преподобный Варсонофий в Оптиной, рядом со своим духовным отцом и учителем преподобным Анатолием «Старшим».