Содержание
- Акафист Божественным архангелам Михаилу и Гавриилу
- Икос 1
- Кондак 2
- Икос 2
- Кондак 3
- Икос 3
- Кондак 4
- Икос 4
- Кондак 5
- Икос 5
- ***
- Кондак 6
- Икос 6
- Кондак 7
- Икос 7
- Кондак 8
- Икос 8
- Кондак 9
- Икос 9
- Кондак 10
- Икос 10
- Кондак 11
- Икос 11
- Кондак 12
- Икос 12
- Кондак 13
- Молитва Архистратигу Михаилу
- Молитва Архангелу Гавриилу
- Тропарь Архистратигу Михаилу, глас 4
- Кондак Архистратигу Михаилу, глас 2
- Кондак Архангелу Гавриилу, глас 8
- Кондак Архангелу Гавриилу, глас 2:
Акафист Божественным архангелам Михаилу и Гавриилу
Подобен: Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
Архангелов Троицы восхвалим, Михаила и Гавриила вси празднолюбцы, осеняемии кровом крилу их. И от всяких напастей избавляемии, Единому взывая:
Радуйся, закона служителю.
Другому же глаголя: Радуйся, благодати вестниче.
Икос 1
Ангел, чиноначальник невещественных ангелов, создан еси от Бога всевиновнаго в умном молчании, Михаиле, света перваго света сый вторый. Темже ти радуяся, пения возглашаю сия:
Радуйся, ума мирозиждительнаго создание.
Радуйся, света первосветнаго сияние.
Радуйся, Божеству предстоятелю огненный.
Радуйся, Троицы служителю неутомимый.
Радуйся, душе Богоподобный, невещественный, огнепламенный.
Радуйся, существо безсмертное, Бога песнословящее.
Радуйся, огненнаго небесе первостоятелю.
Радуйся, мира умнаго начальниче.
Радуйся, светило Чинов благодарных.
Радуйся, попалителю духа неблагодарнаго.
Радуйся, имже естество Ангелов устоя.
Радуйся, имже сатана низложен бысть.
Радуйся, закона служителю.
Кондак 2
Видяй неблагодарныя возставшия ангелы и падающия с небесе огненнаго, Божественный Михаиле, яко благодарный раб, став, возопил еси: станем добре и вонмем, поя Троице песнь: Аллилуиа.
Икос 2
Ведений сокровенных и советов Всевышняго явился еси, Гаврииле, тайноприимник, грядущих предведение показуяй и радостны благовестия земнородным возвещаяй. Сего ради любовию поощряюся воспевати тебе сице:
Радуйся, света неуразуменнаго зерцало.
Радуйся, тайн Бога вестниче.
Радуйся, сокровенных советов узрение.
Радуйся, неизреченных Бога провещание.
Радуйся, возсияваяй в уме ведение сокровенное.
Радуйся, сицевое людям светло озаряяй.
Радуйся, служителю Божественных Евангелий.
Радуйся, просвещателю событий радостотворных.
Радуйся, многих неуясненных уяснение.
Радуйся, нередких грядущих предведение.
Радуйся, имже радость вселися.
Радуйся, имже печаль изгнася.
Радуйся, благодати вестниче.
Кондак 3
Даниилу Пророку, паче всех пророк, показал еси странное таинство страшнаго пришествия Христова и смотрения, Гаврииле величайший, и того вразумил еси Богу во благодушии пети: Аллилуиа.
Икос 3
Имеяй, Михаиле Божественный уме, тезоименитство силы Божия, выну показался еси силен во бранех и Иакова в борьбе укрепил еси, побеждая языки иноплеменныя. Сего ради силу твою величаю:
Радуйся, паче огня действеннейший.
Радуйся, пламене сый быстрейший.
Радуйся, потопивый воинства Египтян.
Радуйся, расторгий союзы Хананеев.
Радуйся, яко укрепил еси Моисея и Аарона.
Радуйся, яко ободрил еси Иисуса сына Навиина.
Радуйся, Ассириев воинство посецый.
Радуйся, Сиона Амморейска поправый.
Радуйся, Ога Васанска погубление.
Радуйся, мертва Моисея свобождение.
Радуйся, имже нечестивии потребляются.
Радуйся, имже благочествии возвышаются.
Радуйся, закона служителю.
Кондак 4
Михаиле Ангелоначальниче, умоли Бога твоими мольбами жити нам добродетельно, с любовию совершающим честный твой собор, и сподоби начавших лучшее житие с тобою Богу песнь воспевати: Аллилуиа.
Икос 4
Пришел еси от Вышняго, Гаврииле Божественный уме, радостны благовестия носяй ко Иоакиму и Анне и сих безчадное неплодие разрешаяй. Сего ради веселяся, с верою вопием ти:
Радуйся, благих вестниче.
Радуйся, нераждающих радосте чадоносная.
Радуйся, безплодных Богодарованное всеплодие.
Радуйся, безчадных Богоугодное очадие.
Радуйся, яко Богопраотцу принесл еси рождие честное.
Радуйся, Богопраматери даровал еси плод чрева.
Радуйся, бесчадия узы разрешаяй.
Радуйся, раждаемых благодать предвозвещаяй.
Радуйся, отцев многих похвало.
Радуйся, матерей добрый утешение.
Радуйся, имже умножается род человеческий.
Радуйся, имже предвозвещается наследие.
Радуйся, благодати вестниче.
Кондак 5
К Богородице Марии, мира Владычице, всельшейся во храме Господнем, послан был еси Гаврииле, носяй скоро хлеб небесный и возбуждаяй ю всегда Богу взывати тако: Аллилуиа.
Икос 5
Слуги бывшыя Богу, чиноначальниче, праотцы древния избавил еси от многих зол, Михаиле, и Иудейскому народу был еси всегда предходяй. Сего ради взываю к тебе:
Радуйся, Исаака от заколения избавивый.
Радуйся, Авраама радостию исполнивый.
Радуйся, жаждущаго Исмаила утоление.
Радуйся, Агари плачущия странное утешение.
Радуйся, столпе огнезрачный, предводяй Исраиля.
Радуйся, облако златотканное, покрывающее его в пути.
Радуйся, спасый первороднаго у Евреев.
Радуйся, избивый первенца у Египтян.
Радуйся, светлая Иудеев похвало.
Радуйся, крепкое закона ограждение.
Радуйся, народ из Египта изведый.
Радуйся, в землю благую его приведый.
Радуйся, закона служителю.
***
Кондак 6
Снизшед на гору Синайску Бог великий и хотяй закон дати евреем, служением и посредством твоим, Михаиле высочайший, изглаголал еси его Моисею и научил пети тако: Аллилуиа.
Икос 6
Избавления и спасения народу чающему некогда священнику Захарии во храме Божием, Гаврииле, предвозвестил еси Божественнаго Предтечи рождение. Сего ради твоему дивяся благовестию, взываю:
Радуйся, в рожденных женами большаго предвозвестивый.
Радуйся, ангела отцу показавый.
Радуйся, Захарии вожделеннейшее проглаголание.
Радуйся, Еслисаветы сладчайшее услышание.
Радуйся, яко благовестил еси о Крестителе Христовом.
Радуйся, яко предрекл еси втораго Илию.
Радуйся, проповедника покаяния проповедниче.
Радуйся, света светильника всеуслышная трубо.
Радуйся, начала благодати провозглашение.
Радуйся, разсвета дне предвозвещение.
Радуйся, начинание спасения земнородных.
Радуйся, основание нам Царствия Небеснаго.
Радуйся, благодати вестниче.
Кондак 7
Хотяй Бог Слово нас ради воплотитися, тебе единому, Гаврииле, ввери сие таинство, и тя, служителя онаго, предразсуди, в себе помышляюща о чюдеси и поюща тако: Аллилуиа.
Икос 7
Три юноши древле из пламене пещи избавил еси, Михаиле Чиноначальниче, внегда явился еси в ней благолепен, зраком светел и Богоподобен, во еже тирану ужаснутися чюдеси. Сего ради вопию ти:
Радуйся, огня неутолимаго погашение.
Радуйся, пламени присноживущаго прекращение.
Радуйся, девственных отроков свобождение.
Радуйся, непорочных телес сохранение.
Радуйся, яко ты ужаснул еси тирана своим зраком.
Радуйся, яко ты укрепил еси отрока Даниила.
Радуйся, пророка Аввакума восхитивый.
Радуйся, в Вавилон его скоро принесый.
Радуйся, крепкая Гедеона победо.
Радуйся, славное Мадиама поражение.
Радуйся, имже царие укрепляются.
Радуйся, имже тираны низвергаются.
Радуйся, закона служителю.
Кондак 8
Странное чудо видевше, Валаам прорицатель и послежде Давид пророк, тя, Божественный Михаиле, скоро падше, ти поклонишася, един страхом связуемый, других же Богу взывая сице: Аллилуиа.
Икос 8
Весь молниеносен, весь блистаяй и весь радостен пришел еси ко Благодатней, Гаврииле, радостны благовестия носяй. Убо твоим увеселяяся приветствием, тя приветствую:
Радуйся, радости непрестающия проповедниче.
Радуйся, клятвы древния секиро.
Радуйся, падшаго Адама воззвание.
Радуйся, неблагодушия Еввина ободрение.
Радуйся, Слова воплощения громогласный истолкователю.
Радуйся, Божия снисхождения славный тайноводителю.
Радуйся, с радостию, «Радуйся», обрадованней проглаголавый.
Радуйся, печаль всякую чрез «Радуйся, …» разрешивый.
Радуйся, звездо, предвозвестившая Солнце.
Радуйся, светило, Свет показавшее неприступный.
Радуйся, имже мир просветися.
Радуйся, имже мрак разгнася.
Радуйся, благодати вестниче.
Кондак 9
Пастырям на поле рождение Спаса возвестил еси, Гаврииле, радуяся, и волхвы, яко светлая звезда, руководил еси Ему на поклонение и всех вразумил еси Ражденному взывати тако: Аллилуиа.
Икос 9
Сильный предстатель Новаго Завета показался еси, Михаиле светоносно, и всех верных христиан великий поборник познаваешися выну, от многих напастей избавляя их и возбуждая вопити тебе:
Радуйся, народа новаго стено.
Радуйся, племен христоименитых ограждение.
Радуйся, Апостолов многажды укрепивый.
Радуйся, страстотерпцам крепость давый.
Радуйся, яко Петра спасл еси от уз и темницы.
Радуйся, яко умертвил еси Ирода внезапу.
Радуйся, страже церкви непреоборимый.
Радуйся, еретичествующи обоюдоострая секиро.
Радуйся, твердое преподобных укрепление.
Радуйся, славное Иерархов утверждение.
Радуйся, имже вера распространяется.
Радуйся, имже заблуждение умаляется.
Радуйся, закона служителю.
Кондак 10
Скончанию мира наставшу, Михаиле, вострубиши последнею трубою, от нея же мертвии возставше из земли, с трепетом станут пред судищем неумытным, возглашая с тобою песнь: Аллилуиа.
Икос 10
Чина твоего высоту имя твое показует ясно, Гаврииле светоносне: являяй бо в названии своем Бога и человека, право явился еси достойный служитель Богочеловека слова. Темже тя и величаю песнми:
Радуйся, имже обручен бысть обручник.
Радуйся, имже восприята Дева.
Радуйся, наименовавши имя Иисуса.
Радуйся, возвестивый миру спасительная.
Радуйся, яко послужил еси обручнику Иосифу.
Радуйся, яко сопутствовал еси Иисусу во Египет.
Радуйся, из Египта Христа воззвавый.
Радуйся, град Назарет в обитание указавый.
Радуйся, верныя волхвы тайноводивый.
Радуйся, их от Ирода избавивый.
Радуйся, имже сохранен Иисус.
Радуйся, имже осмеян Ирод.
Радуйся, благодати вестниче.
Кондак 11
На Божественном камени живоприемнаго Гроба седяй, Гаврииле, в белых ризах, и блистаяй, яко молния, Христово Воскресение благовестил еси женам: не плачите, вопия им и поя песнь: Аллилуиа.
Икос 11
Свет мира еси, Михаиле военачальниче, озаряяй верных помышления, и к ведению возводяй Божественному, и ко спасению просвещаяй всех от злобы убийцы избавляя вопиющих:
Радуйся, предстателю всех верных.
Радуйся, источниче различных чудес.
Радуйся, болящих безмездное врачевание.
Радуйся, плененных скорое возвращение.
Радуйся, яко предстательствовал еси о Дохиарской обители.
Радуйся, яко спасл еси ю от Сарацинскаго устремления.
Радуйся, юноши потопленнаго избавление.
Радуйся, злата сокровеннаго открытие.
Радуйся, струи воды живыя источивый.
Радуйся, совершаяй чудеса водою.
Радуйся, храма Дохиарскаго украсителю.
Радуйся, обители сея заступниче.
Радуйся, закона служителю.
Кондак 12
Благодать Божественную даруй, Михаиле, с любовию совершающим собор твой и в исход жизни тя призывающим: помощник явися, и изрядно храни в сей обители твоей вопиющих: Аллилуиа.
Икос 12
Пети всесогласно воплощению Бога сладкия славословия научившеся у тебе, Божественный Гаврииле, тебе благодарственная с любовию воспеваем и тя, яко благовестителя величающе, тако взываем:
Радуйся, радосте печалующих.
Радуйся, страже обидимых.
Радуйся, нищих богатство некрадомое.
Радуйся, плавающих пристанище спасительное.
Радуйся, победоносное оружие царей благочестивых.
Радуйся, славная похвало иереев благоговейных.
Радуйся, Дохиарския обители предстателю.
Радуйся, чудный кораблеца ея кормчий.
Радуйся, чтущих тя поборниче.
Радуйся, невестоводителю душ изряднейший.
Радуйся, верных от Бога благословение.
Радуйся, доброе монашествующих вождение.
Радуйся, благодати вестниче.
Кондак 13
О Архангели Божественнии, Михаиле и Гаврииле, престолу Божию предстоящии, сия пения наша, якоже лепты вдовицы, приимше, избавите ны от всякия муки да с вами поем: Аллиуиа.
Этот Кондак читается трижды, затем Икос 1 и Кондак 1
Молитва Архистратигу Михаилу
Святый и великий Архангеле Божий Михаиле, Неисповедимыя и Пресущественныя Троицы первый во Ангелех предстоятелю, рода же человеческаго приставниче и хранителю, сокрушивый с воинствы своими главу прегордаго денницы на небеси и посрамляяй выну злобу и коварства его на земли! К тебе с верою прибегаем и тебе с любовию молимся: буди щит несокрушим и забрало твердо Святей Церкви и Православному Отечествию нашему, ограждая их молниеносным мечем твоим от всех враг, видимых и невидимых. Буди вождь и соратай непобедим христолюбивому воинству нашему, венчая его славою и победами над сопостаты, да познают вси противляющиеся нам, яко с нами Бог и святии Ангели Его. Не остави же, о Архангеле Божий, помощию и заступлением твоим и нас, прославляющих днесь святое имя твое: се бо, аще и многогрешни есмы, обаче не хощем в беззакониих наших погибнути, но еже обратитися ко Господу и оживленным быти от Него на дела благая. Озари убо ум наш светом Божиим, иже выну сияет на молниевиднем челе твоем, да возможем разумети, что есть воля Божия о нас благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да утвердившеся в законе Господни, престанем прочее влаятися земными помыслы и похотьми плоти, увлекающеся, по подобию несмысленных детей, скорогибнущими красотами мира сего, яко ради тленнаго и земнаго вечная и небесная безумне забывати. Над всеми же сими испроси нам свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дней временнаго жития нашего иждивем, не во угождении чувств и работе страстем нашим, но во изглаждении зол, содеянных нами, слезами веры и сокрушения сердечнаго, подвигами чистоты и святыми делами милосердия. Егда же приблизится час скончания нашего и свобождения от уз бреннаго сего телесе, не остави нас, Архангеле Божий, беззащитных противу духов злобы поднебесных, обыкших преграждати души человечестей восход в горняя; да охраняеми тобою, безпреткновенне достигнем оных преславных селений райских, идеже несть печаль, ни воздыхание, но жизнь безконечная, и сподобимся узрети пресветлое Лице Всеблагаго Господа и Владыки нашего и Тому воздати славу, со Отцем и Святым Духом, во веки веков. Аминь.
Молитва Архангелу Гавриилу
О, пречудный Архангеле Божий Гаврииле, усерднейший молитвенниче о душах наших, смиренно молим тя, заступника нашего: испроси святыми твоими всемощными молитвами пред Престолом Божиим всегда возносимыми, святый храм сей до конца мира сего сохранити, веру Христову утвердити, укрепити и расширити, православным христианом святоотеческую православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити, и сподобитися мирныя христианския кончины и добраго ответа на Страшнем Суде Божием. Умоли нам Царствие Небесное наследовати и вкупе с тобою прославити Пречестное и Великолепое имя Пресвятыя Троицы, Отца и Сына и Святаго Духа, ныне и присно и во веки веков. Аминь.
Тропарь Архистратигу Михаилу, глас 4
Небесных воинств Архистратиже, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя нас, припадающих прилежно и вопиющих: от бед избави нас, яко чиноначальник Вышних Сил.
Кондак Архистратигу Михаилу, глас 2
Архистратиже Божий, служителю Божественныя славы, ангелов начальниче и человеков наставниче, полезное нам проси и велию милость, яко безплотных Архистратиг.
Кондак Архангелу Гавриилу, глас 8
Пресветлыя, и Честныя, и Вседетельныя, Пренеисчетныя и Страшныя Троицы, ты еси, Архистратиже, славный служителю и молитвенниче, ныне непрестанно моли избавитися нам от всяких бед и мук, да зовем ти: радуйся, покрове рабом твоим.
Кондак Архангелу Гавриилу, глас 2:
На Небесех зря Божию славу и на земли с высоты подая благодать, начальниче Ангелов, мудре Гаврииле, Божия славы служителю и мира божественный поборниче, спасаяй, соблюдай вопиющия ти: сам буди помощник, и никтоже на ны.
Тропарь, глас 6
Ангеле Божий, храни́телю мой святы́й, живо́т мой соблюди́ во стра́се Христа́ Бо́га, ум мой утверди́ во и́стиннем пути́, и к любви́ го́рней уязви́ ду́шу мою́, да тобо́ю направля́емь, получу́ от Христа́ Бо́га ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен
Свя́тая Влады́чице, Христ́а Бо́га на́шего Ма́ти, я́ко всех Творца́ недоуме́нно ро́ждшая, моли́ бла́гость Его́ всегда́, со храни́телем мои́м а́нгелом, спасти́ ду́шу мою́, страстьми́ одержи́мую, и оставле́ние грехо́в дарова́ти ми.
Канон, глас 8
Песнь 1
Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.
Иисусу: Го́споди Иису́се Христе́ Бо́же мой, поми́луй мя.
Песнь воспе́ти и восхвали́ти, Спа́се, Твоего́ раба́ досто́йно сподо́би, безпло́тному а́нгелу, наста́внику и храни́телю моему́.
Припев: Святы́й а́нгеле Бо́жий, храни́телю мой, моли́ Бо́га о мне.
Еди́н аз в неразу́мии и в ле́ности ны́не лежу́, наста́вниче мой и храни́телю, не оста́ви мене́ погиба́юща.
Сла́ва Отцу́ и Сы́ну и Свято́му Ду́ху.
Ум мой твое́ю моли́твою напра́ви, твори́ти ми Бо́жия повеле́ния, да получу́ от Бо́га отда́ние грехо́в, и ненави́дети ми злых наста́ви мя, молю́ся ти.
И ны́не и при́сно и во ве́ки веко́в. Ами́нь.
Моли́ся, Деви́це, о мне, рабе́ Твое́м, ко Благода́телю, со храни́телем мои́м а́нгелом, и наста́ви мя твори́ти за́поведи Сы́на Твоего́ и Творца́ моего́.
Песнь 3
Ирмо́с: Ты еси́ утвержде́ние притека́ющих к Тебе́, Го́споди, Ты еси́ свет омраче́нных, и пое́т Тя дух мой.
Святы́й а́нгеле Бо́жий, храни́телю мой, моли́ Бо́га о мне.
Все помышле́ние мое́ и ду́шу мою́ к тебе́ возложи́х, храни́телю мой; ты от вся́кия мя напа́сти вра́жия изба́ви.
Святы́й а́нгеле Бо́жий, храни́телю мой, моли́ Бо́га о мне.
Враг попира́ет мя, и озлобл́яет, и поуча́ет всегда́ твори́ти своя́ хоте́ния; но ты, наста́вниче мой, не оста́ви мене́ погиба́юща.
Сла́ва Отцу́ и Сы́ну и Свято́му Ду́ху.
Пе́ти песнь со благодаре́нием и усе́рдием Творцу́ и Бо́гу даждь ми, и тебе́, благо́му а́нгелу храни́телю моему́: изба́вителю мой, изми́ мя от враг озлобля́ющих мя.
И ны́не и при́сно и во ве́ки веко́в. Ами́нь.
Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бо́рются со мно́ю.
Седален, глас 2
От любве́ душе́вныя вопию́ ти, храни́телю моея́ души́, всесвяты́й мой а́нгеле: покры́й мя и соблюди́ от лука́ваго ловле́ния всегда́, и к жи́зни наста́ви небе́сней, вразумля́я и просвеща́я и укрепля́я мя.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен
Богоро́дице безневе́стная Пречи́стая, Яже без се́мене ро́ждши всех Влады́ку, Того́ со а́нгелом храни́телем мои́м моли́, изба́вити ми ся вся́каго недоуме́ния, и да́ти умиле́ние и свет души́ мое́й и согреше́нием очище́ние, Яже еди́на вско́ре заступа́ющи.
Песнь 4
Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.
Святы́й а́нгеле Бо́жий, храни́телю мой, моли́ Бо́га о мне.
Моли́ Человеколю́бца Бо́га ты, храни́телю мой, и не оста́ви мене́, но при́сно в ми́ре житие́ мое́ соблюди́ и пода́ждь ми спасе́ние необори́мое.
Святы́й а́нгеле Бо́жий, храни́телю мой, моли́ Бо́га о мне.
Яко засту́пника и храни́теля животу́ моему́ прие́м тя от Бо́га, а́нгеле, молю́ тя, святы́й, от вся́ких мя бед свободи́.
Сла́ва Отцу́ и Сы́ну и Свято́му Ду́ху.
Мою́ скве́рность твое́ю святы́нею очи́сти, храни́телю мой, и от ча́сти шу́ия да отлуче́н бу́ду моли́твами твои́ми и прича́стник сла́вы явлю́ся.
И ны́не и при́сно и во ве́ки веко́в. Ами́нь.
Недоуме́ние предлежи́т ми от обыше́дших мя зол, Пречи́стая, но изба́ви мя от них ско́ро: к Тебе́ бо еди́ней прибего́х.
Песнь 5
Ирмо́с: Утренююще вопие́м Ти: Го́споди, спаси́ ны; Ты бо еси́ Бог наш, ра́зве Тебе́ ино́го не ве́мы.
Святый а́нгеле Бо́жий, храни́телю мой, моли́ Бо́га о мне.
Яко име́я дерзнове́ние к Бо́гу, храни́телю мой святы́й, Сего́ умоли́ от оскорбля́ющих мя зол изба́вити.
Святы́й а́нгеле Бо́жий, храни́телю мой, моли́ Бо́га о мне.
Све́те све́тлый, све́тло просвети́ ду́шу мою́, наста́вниче мой и храни́телю, от Бо́га да́нный ми а́нгеле.
Сла́ва Отцу́ и Сы́ну и Свято́му Ду́ху.
Спя́ща мя зле тягото́ю грехо́вною, я́ко бдя́ща сохрани́, а́нгеле Бо́жий, и возста́ви мя на славосло́вие моле́нием твои́м.
И ны́не и при́сно и во ве́ки веко́в. Ами́нь.
Мари́е, Госпоже́ Богоро́дице Безневе́стная, наде́ждо ве́рных, вра́жия возноше́ния низложи́, пою́щия же Тя возвесели́.
Песнь 6
Ирмо́с: Ри́зу ми пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.
Святы́й а́нгеле Бо́жий, храни́телю мой, моли́ Бо́га о мне.
Вся́ких мя напа́стей свободи́, и от печа́лей спаси́, молю́ся ти, святы́й а́нгеле, да́нный ми от Бо́га, храни́телю мой до́брый.
Святы́й а́нгеле Бо́жий, храни́телю мой, моли́ Бо́га о мне.
Освети́ ум мой, бла́же, и просвети́ мя, молю́ся ти, святы́й а́нгеле, и мы́слити ми поле́зная всегда́ наста́ви мя.
Сла́ва Отцу́ и Сы́ну и Свято́му Ду́ху.
Уста́ви се́рдце мое́ от настоя́щаго мяте́жа, и бде́ти укрепи́ мя во благи́х, храни́телю мой, и наста́ви мя чу́дно к тишине́ живо́тней.
И ны́не и при́сно и во ве́ки веко́в. Ами́нь.
Слово Божие в Тя вселися, Богородице, и человеком Тя показа небесную лествицу; Тобою бо к нам Вышний сошел есть.
Кондак, глас 4
Яви́ся мне милосе́рд, святы́й а́нгеле Госпо́день, храни́телю мой, и не отлуча́йся от мене́, скве́рнаго, но просвети́ мя све́том неприкоснове́нным и сотвори́ мя досто́йна Ца́рствия Небе́снаго.
Икос
Уничиже́нную ду́шу мою́ мно́гими собла́зны, ты, святы́й предста́телю, неизрече́нныя сла́вы небе́сныя сподо́би, и певе́ц с ли́ки безпло́тных сил Бо́жиих, поми́луй мя и сохрани́, и по́мыслы до́брыми ду́шу мою́ просвети́, да твое́ю сла́вою, а́нгеле мой, обогащу́ся, и низложи́ зломы́слящия мне враги́, и сотвори́ мя досто́йна Ца́рствия Небе́снаго.
Песнь 7
Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Святы́й а́нгеле Бо́жий, храни́телю мой, моли́ Бо́га о мне.
Ми́лостив бу́ди ми, и умоли́ Бо́га, Госпо́день а́нгеле, име́ю бо тя засту́пника во всем животе́ мое́м, наста́вника же и храни́теля, от Бо́га дарова́ннаго ми во ве́ки.
Святы́й а́нгеле Бо́жий, храни́телю мой, моли́ Бо́га о мне.
Не оста́ви в путь ше́ствующия души́ моея́ окая́нныя уби́ти разбо́йником, святы́й а́нгеле, я́же ти от Бо́га предана́ бысть непоро́чне; но наста́ви ю́ на путь покая́ния.
Сла́ва Отцу́ и Сы́ну и Свято́му Ду́ху.
Всю посра́млену ду́шу мою́ привожду́ от лука́вых ми по́мысл и дел: но предвари́, наста́вниче мой, и исцеле́ние ми пода́ждь благи́х по́мысл, уклоня́ти ми ся всегда́ на пра́выя стези́.
И ны́не и при́сно и во ве́ки веко́в. Ами́нь.
Прему́дрости испо́лни всех и кре́пости Боже́ственныя, Ипоста́сная Прему́дросте Вы́шняго, Богоро́дицы ра́ди, ве́рою вопию́щих: отец на́ших Бо́же, благослове́н еси́.
Песнь 8
Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.
Святы́й а́нгеле Бо́жий, храни́телю мой, моли́ Бо́га о мне.
От Бо́га по́сланный, утверди́ живо́т мой, раба́ твоего́, преблаги́й а́нгеле, и не оста́ви мене́ во ве́ки.
Святы́й а́нгеле Бо́жий, храни́телю мой, моли́ Бо́га о мне.
Ангела тя су́ща бла́га, души́ моея́ наста́вника и храни́теля, преблаже́нне, воспева́ю во ве́ки.
Сла́ва Отцу́ и Сы́ну и Свято́му Ду́ху.
Бу́ди ми покро́в и забра́ло в день испыта́ния всех челове́к, во́ньже огне́м искуша́ются дела́ блага́я же и зла́я.
И ны́не и при́сно и во ве́ки веко́в. Ами́нь.
Бу́ди ми помо́щница и тишина́, Богоро́дице Присноде́во, рабу́ Твоему́, и не оста́ви мене́ лише́на бы́ти Твоего́ влады́чества.
Песнь 9
Ирмо́с: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.
Иисусу: Го́споди Иису́се Христе́ Бо́же мой, поми́луй мя.
Поми́луй мя, еди́не Спа́се мой, я́ко ми́лостив еси́ и милосе́рд, и пра́ведных лико́в сотвори́ мя прича́стника.
Святы́й а́нгеле Бо́жий, храни́телю мой, моли́ Бо́га о мне.
Мы́слити ми при́сно и твори́ти, Госпо́день а́нгеле, блага́я и поле́зная да́руй, я́ко си́льна яви́ в не́мощи и непоро́чна.
Сла́ва Отцу́ и Сы́ну и Свято́му Ду́ху.
Яко име́я дерзнове́ние к Царю́ Небе́сному, Того́ моли́, с про́чими безпло́тными, поми́ловати мя окая́ннаго.
И ны́не и при́сно и во ве́ки веко́в. Ами́нь.
Мно́го дерзнове́ние иму́щи, Де́во, к Вопло́щшемуся из Тебе́, преложи́ мя от уз и разреше́ние ми пода́ждь и спасе́ние, моли́твами Твои́ми.
Молитва к ангелу хранителю
Святы́й а́нгеле Бо́жий, храни́телю мой, моли́ Бо́га о мне.
Ангеле Христо́в святы́й, к тебе́ припа́дая молю́ся, храни́телю мой святы́й, прида́нный мне на соблюде́ние души́ и те́лу моему́ гре́шному от свята́го креще́ния, аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя, или́ приступи́ти ко мне, а́ки псу смердя́щему? Кото́рыма очи́ма, а́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким и злым мои́м и лука́вым дея́нием, в ня́же впада́ю по вся дни и но́щи и на всяк час? Но молю́ся ти припа́дая, храни́телю мой святы́й, умилосе́рдися на мя гре́шнаго и недосто́йнаго раба́ твоего́ (имя), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со все́ми святы́ми, всегда́, и ны́не и при́сно и во ве́ки веко́в. Ами́нь.
Кондак 1
Избра́нный от Го́спода Бо́га на хране́ние ду́ши моея́ и телесе́, святы́й А́нгеле, похва́льная ти воспева́ти дерза́ю, недосто́йный раб твой; ты же, я́ко име́яй дерзнове́ние к Царю́ Небе́сному, от вся́ких мя бед и скорбе́й, от враг ви́димых же и неви́димых защити́, зову́ща:
Ра́дуйся, А́нгеле Госпо́день, неусыпа́емый храни́телю мой.
А́нгеле святы́й, по́сланный с Небесе́, во е́же храни́ти мя и руководи́ти во всей жи́зни мое́й, припа́дая молю́ ти ся: сам наста́ви и вразуми́ мя, начина́юща от серде́чныя любве́ и усе́рдия возглаша́ти пе́сненныя ти хвалы́:
Ра́дуйся, А́нгеле Бо́жий, предста́телю мой у Пресвяты́я Тро́ицы; ра́дуйся, Царя́ ца́рствующих безпло́тный во́ине.
Ра́дуйся, Го́спода госпо́дствующих небе́сный слуго́; ра́дуйся, у́мных и невеще́ственных слуг Его́ сожи́телю.
Ра́дуйся, творя́й при́сно во́лю Влады́ки своего́; ра́дуйся, прие́мый от Бо́га повеле́ние и власть храни́ти ду́шу мою́.
Ра́дуйся, никогда́же отлуча́яйся мене́, гре́шнаго; ра́дуйся, вы́ну спребыва́яй ми, недосто́йному.
Ра́дуйся, соблюда́яй мя на всех путе́х мои́х; ра́дуйся, сохраня́яй мя от вся́каго зла.
Ра́дуйся, от Бо́га да́нный ми руководи́телю на путе́х жития́ моего́; ра́дуйся, благи́й мой наста́вниче.
Ра́дуйся, А́нгеле Госпо́день, неусыпа́емый храни́телю мой.
Ви́дев человеколюби́вый Госпо́дь, я́ко, по прегреше́нии пра́отца на́шего Ада́ма, вси челове́цы удо́бь прекло́нни суть ко греху́, по Свое́й неизрече́нней ми́лости посла́л есть во всю зе́млю святы́х А́нгелов и коему́ждо от челове́к приста́ви храни́теля. Исполня́юще у́бо повеле́ние Влады́ки своего́, святи́и А́нгели всегда́ гото́ви суть помога́ти нам, богоуго́дно пою́щим: Аллилу́иа.
Ра́зуму моему́ просвеще́ние свы́ше исхода́тайствуй, святы́й А́нгеле, да возмогу́ позна́ти, что есть во́ля Бо́жия, блага́я и уго́дная и соверше́нная, и се́рдце мое́ напра́ви, е́же со усе́рдием твори́ти ю; тебе́ же, храни́теля моего́, да не преста́ну восхваля́ти сицевы́ми гла́сы:
Ра́дуйся, воспламеня́яй се́рдце мое́ любо́вию к Бо́гу, Созда́телю моему́; ра́дуйся, возбужда́яй мя на всяк день же и час приноси́ти Ему́ моли́твы, проше́ния и благодаре́ния.
Ра́дуйся, я́коже стра́жем ве́рным, стра́хом Госпо́дним душе́вный мой дом огражда́яй; ра́дуйся, вся помышле́ния моя́ к распя́тому за грехи́ ми́ра Спаси́телю устремля́яй.
Ра́дуйся, страда́ния Его́ и кре́стную смерть в па́мять мою́ вперя́яй; ра́дуйся, воспомина́нием Страсте́й Госпо́дних блюсти́ся от грехо́в мя поуча́яй.
Ра́дуйся, благода́тнаго Свы́ше осене́ния Свята́го Ду́ха проси́ти мя наставля́яй; ра́дуйся, я́ко на кро́ткия то́чию и смире́нныя се́рдцем ми́лостивне призирати Ему́, Уте́шителю, уверя́я мя.
Ра́дуйся, мы́слию о вездесу́щии Бо́жии всю́ду окружа́яй мя; ра́дуйся, всеве́дение Его́ у́мным очесе́м мои́м представля́яй.
Ра́дуйся, милосе́рдием Его́ к ка́ющимся гре́шником се́рдце мое́ утеша́яй; ра́дуйся, правосу́дием Его́ к ожесточе́нным и нераска́янным ду́шу мою́ устраша́яй.
Ра́дуйся, А́нгеле Госпо́день, неусыпа́емый храни́телю мой.
Си́лу Боже́ственныя благода́ти испроси́ ми, храни́телю мой А́нгеле, во е́же неукло́нно и непреткнове́нно ходи́ти ми спаси́тельным путе́м Христо́вых за́поведей, се́рдцем же и усты́ непреста́нно сла́вити всесвято́е и́мя Бо́га на́шего и пе́ти Ему́: Аллилу́иа.
И́мам тя, Богоизбра́нный покрови́телю мой, я́коже све́тлую зарю́, просвеща́ющую души́ моея́ темноту́ и разгоня́ющую мрак серде́чнаго неве́дения моего́; сего́ ра́ди, со умиле́нием припа́дая, молю́ ти ся, да и вся моя́ чу́вствия, потемне́нная страстьми́, очи́стятся, во е́же не блужда́ти ми во тьме грехо́вней. Пречу́дную же све́тлость твою́ воспева́ю си́це:
Ра́дуйся, звездо́ Невече́рняго Све́та, от трисия́ннаго Божества́ возсия́вшая и мене́ вы́ну озаря́ющая; ра́дуйся, пресве́тлая луче́, помраче́нная грехми́ серде́чная ми очеса́ осиява́ющая.
Ра́дуйся, я́ко тщи́шася напра́вити мя на и́стинный путь во тьме беззако́ний заблужда́ющаго; ра́дуйся, я́ко предлага́еши ми за́поведи Госпо́дни, а́ки зерца́ло для всея́ жи́зни моея́.
Ра́дуйся, я́ко поставля́еши ми зако́н Бо́жий, а́ки свети́льник нога́ма мои́ма и свет стезя́м мои́м; ра́дуйся, я́ко слове́с Ева́нгелиа Христо́ва в сла́дость послу́шати поуча́еши мя.
Ра́дуйся, я́ко уче́нию Боже́ственнаго Учи́теля моего́ и Го́спода несумне́нно ве́ровати побужда́еши мя; ра́дуйся, я́ко в повинове́нии уста́вом святы́я Це́ркве укрепля́еши мя.
Ра́дуйся, я́ко пра́вилом и преда́нием святы́х Апо́стол и оте́ц покаря́тися наставля́еши мя; ра́дуйся, я́ко во испове́дании святы́я и правосла́вныя ве́ры утвержда́еши мя.
Ра́дуйся, я́ко за сие́ испове́дание и на смерть гото́ва мя бы́ти убежда́еши; ра́дуйся, я́ко еретико́м и отсту́пником и́стинныя Це́ркве сообща́тися возбраня́еши ми.
Ра́дуйся, А́нгеле Госпо́день, неусыпа́емый храни́телю мой.
Бу́ря жите́йскаго мо́ря сокруша́ет духо́вный мой кора́бль волна́ми мирски́х попече́ний, и мир убо́гия души́ моея́ мяте́тся, и где обря́щу ти́хое приста́нище спасе́ния? То́кмо на тя по Бо́зе возлага́ю наде́жду, храни́телю мой А́нгеле, я́ко прему́драго тя ко́рмчаго в мы́сленных бу́рях, смуща́ющих мя, стяжа́х: благода́рственне у́бо пою́ Бо́гу моему́: Аллилу́иа.
Слы́шаще и зря́ще тя, Боже́ственный А́нгеле, кре́пкаго моего́ блюсти́теля, зло́бнии ду́си поднебе́снии не сме́ют прибли́житися ко твое́й пречи́стей све́тлости и душегуби́тельные ми па́кости де́яти. Сего́ ра́ди смире́нно молю́ тя, не отступи́ от мене́ за невоздержа́ние мое́, но при́сно от лука́ваго тех лови́тельства и ко́зней соблюда́й мя, со умиле́нием глаго́люща:
Ра́дуйся, кре́пким кро́вом крил твои́х осеня́яй мя и покрыва́яй; ра́дуйся, о́крест мене́ с пла́менным мече́м при́сно ополча́яйся.
Ра́дуйся, проти́ву кня́зя тьмы во бра́ни ми посо́бствуяй; ра́дуйся, лука́вых его́ служи́телей побежда́ти ми помога́яй.
Ра́дуйся, отгоня́яй от мене́ душепа́губныя де́моны, а́ки хи́щныя пти́цы; ра́дуйся, вразумля́яй мя бесо́вския ко́зни позна́ти, а́ки лука́выя лиси́цы.
Ра́дуйся, зверообра́зная тех на ум и се́рдце мое́ нападе́ния отрева́яй.
Ра́дуйся, порожде́ния их, го́рдость и не́нависть, из сердца́ моего́ исторга́яй.
Ра́дуйся, за́висть и злопомне́ние от мы́слей мои́х прогоня́яй; ра́дуйся, во отраже́ние злых по́мыслов кре́стным зна́мением себе́ огражда́ти побужда́яй мя.
Ра́дуйся, на а́спида и васили́ска небоя́зненно наступа́ти укрепля́яй мя; ра́дуйся, име́яй непобеди́мое ору́жие проти́ву всех враго́в мои́х.
Ра́дуйся, А́нгеле Госпо́день, неусыпа́емый храни́телю мой.
Боготе́чней и лучеза́рней звезде́, путеводи́вшей дре́вле волхвы́ на поклоне́ние ро́ждшемуся в Вифлее́ме Спаси́телю ми́ра, дерза́ю уподо́бити тя, благи́й мой храни́телю: неотлу́чным бо и светоно́сным твои́м ми спребыва́нием указу́еши ми пра́вый путь, веду́щий в Го́рний Вифлее́м, в Небе́сное Ца́рствие, да та́мо с ли́ки Арха́нгел и А́нгел сподо́блюся воспева́ти Преве́чному Царю́ сла́вы: Аллилу́иа.
Ви́дя Мя но́щию содержи́ма мра́чною и те́мным о́блаком страсте́й покрыва́ема, святы́й храни́телю ду́ши моея́, не огорчи́ся, не оста́ви мене́, но подража́яй долготерпе́нию Спаси́теля моего́, пожди́ еще́, возбужда́я мя к покаянию, до́ндеже очеса́ моя́ излию́т исто́чники слез на омы́тие душе́вныя нечистоты́ моея́. О сем смире́нно молю́ тя и глаго́лю:
Ра́дуйся, я́ко вы́ну прино́сиши Бо́гу о мне гре́шнем моли́твы своя́, я́ко кади́ло пред Ним благово́нное; ра́дуйся, я́ко при́сно хода́тайствуеши пред Созда́телем мои́м о е́же спасти́ся ми.
Ра́дуйся, я́ко пра́ведный гнев Его́, дви́жимый на мя, свои́м предста́тельством отвраща́еши; ра́дуйся, я́ко про́сиши всемилосе́рдаго Го́спода пода́ти проще́ние злых мои́х дея́ний.
Ра́дуйся, я́ко умилостивля́еши Его́ бла́гость, да не погуби́т мя со беззако́ньми мои́ми; ра́дуйся, я́ко непреста́нно мо́лишися Искупи́телю моему́, да да́рует ми вре́мя ко исправле́нию.
Ра́дуйся, я́ко возбужда́еши мя в покая́нии препроводи́ти вся дни живота́ моего́; ра́дуйся, я́ко внуша́еши ми жела́ние, да вы́ну ка́юся пред Го́сподем во всех мои́х прегреше́ниях.
Ра́дуйся, я́ко вразумля́еши мя на вся́кое вре́мя мы́сленно себе́ испы́товати и во гресе́х мои́х испове́датися; ра́дуйся, я́ко влага́еши в се́рдце мое́ сокруше́ние и скорбь, зане́ прогне́вах Преблага́го Бо́га моего́.
Ра́дуйся, я́ко побужда́еши мя опла́кивати окая́нное и скве́рное житие́ мое́; ра́дуйся, светоно́сный и неумолка́ющий хода́таю спасе́ния моего́.
Ра́дуйся, А́нгеле Госпо́день, неусыпа́емый храни́телю мой.
Пропове́дую велегла́сно при́сное твое́, храни́телю мой А́нгеле, о мне, гре́шнем, попече́ние: в ско́рбех бо и напа́стех, я́же в сем многомяте́жнем ми́ре смуща́ет мир души́ моея́, явля́еши ми ся ско́рый уте́шитель, вразумля́я мя, я́ко вся сия́ низпосыла́ются от прему́драго Созда́теля, а́ки врачевство́ проти́ву душе́вных неду́гов мои́х, и поуча́я благоде́ющему си́це Небе́сному Врачу́ воспева́ти: Аллилу́иа.
Возсиява́ет в души́ мое́й, омрача́емой ско́рбию и уны́нием, свет благода́тнаго утеше́ния, и се́рдце мое́ исполня́ется весе́лия и ра́дости, егда́ непреста́нными твои́ми, святы́й А́нгеле, наставле́нии возбужда́ем дерза́ю, я́ко мыта́рь, вопи́ти к ще́дрому Бо́гу, да ми́лостив бу́дет и прости́т ми прегреше́ния моя́. Не премолчи́ у́бо, наста́вниче мой, вразумля́я и укрепля́я мя, зову́ща ти:
Ра́дуйся, помога́яй ми благи́й яре́м спаси́тельнаго терпе́ния с любо́вию носи́ти; ра́дуйся, в беда́х и заключе́ниих упова́нием на Го́спода Бо́га укрепля́яй мя.
Ра́дуйся, ско́рби и боле́зни му́жественне преодолева́ти мя поуча́яй; ра́дуйся, вся́кую печа́ль и уны́ние от се́рдца моего́ отгоня́яй.
Ра́дуйся, проти́ву врага́, в сеть отча́яния улови́ти мя хотя́ща, бра́тися побужда́яй мя; ра́дуйся, словесе́м Апо́стола, я́ко вси хотя́щии благоче́стно жи́ти гони́ми бу́дут, ве́ровати убежда́яй мя.
Ра́дуйся, о́браз терпе́ния и злострада́ния прия́ти ми проро́ки и Апо́столы внуша́яй; ра́дуйся, на лик му́ченик и испове́дник, за Христа́ до излия́ния кро́ве своея́ подвиза́вшихся, во утеше́ние ми показу́яй.
Ра́дуйся, страда́ния Самаго́ Спаси́теля и Го́спода вы́ну у́мным очесе́м мои́м представля́яй; ра́дуйся, наде́ждею бу́дущаго воздая́ния се́рдце мое́ услажда́яй.
Ра́дуйся, всера́достным ожида́нием ве́чных благ ду́шу мою́ оживля́яй; ра́дуйся, благи́й и при́сный мой уте́шитель.
Ра́дуйся, А́нгеле Госпо́день, неусыпа́емый храни́телю мой.
Хотя́й всем челове́ком спасти́ся, премилосе́рдый Созда́тель мой посла́ Тя, А́нгела Своего́, я́ко ве́рна ми стра́жа и пе́стуна до́бра во всем житии́ мое́м, да всю́ду вспомоществу́еши ми святы́ми твои́ми вдохнове́нии, защища́еши проти́ву ко́зней диа́вола и предуготовля́еши мя де́лы благи́ми вни́ти с му́дрыми де́вами в Небе́сный Черто́г, с Богокра́сною пе́снию: Аллилу́иа.
Но́вую показу́ет бла́гость Госпо́дь и Влады́ка мой на мне, непотре́бнем и па́че всех гре́шнейшем рабе́ Свое́м: презира́я бо лю́тая моя́ и тя́жкая, не погуби́л мя есть со беззако́ньми мои́ми да́же до настоя́щаго дне и ча́са, но долготерпя́ на мне, ми́лостивне ожида́ет моего́ обраще́ния и серде́чнаго покая́ния. Ве́рую, благи́й храни́телю мой, я́ко твои́м при́сным пред Бо́гом за мя хода́тайством досе́ле храни́м есмь: те́мже, любо́вию к тебе́ подвиза́емый, взыва́ю:
Ра́дуйся, я́ко обурева́ющася мя в мо́ри жития́ сего́ от коне́чнаго потопле́ния соблюда́еши; ра́дуйся, я́ко из ро́ва беззако́ний мои́х руко́ю твоея́ по́мощи мя исхища́еши.
Ра́дуйся, я́ко грехо́вный сон душевре́дныя моея́ ле́ности отряса́еши; ра́дуйся, я́ко ум мой, омраче́нный небреже́нием, све́тлым твои́м прису́тствием озаря́еши.
Ра́дуйся, я́ко хла́дное и ма́ло не уга́сшее се́рдце мое́ моли́твами воспламеня́ти ми помога́еши; ра́дуйся, я́ко на славосло́вие Бо́жие при́сно мя возставля́еши.
Ра́дуйся, я́ко настроя́еши глас мой к песнопе́ниям, и́миже досто́йно и пра́ведно есть хвали́ти Творца́ вся́ческих; ра́дуйся, я́ко поуча́еши мя прославля́ти Го́спода моего́ не усты́ то́чию, но и се́рдцем.
Ра́дуйся, я́ко ко исполне́нию пресвяты́я во́ли Его́ возбужда́еши мя; ра́дуйся, я́ко самоотверже́нию и отрече́нию моея́ злы́я во́ли приобучи́ти мя тщи́шися.
Ра́дуйся, я́ко голуби́ну простоту́ и а́гнчу кро́тость стяжа́ти ми преи́скренне жела́еши; ра́дуйся, я́ко о е́же младе́нческому незло́бию и ста́рческому доброразсужде́нию дарова́тися ми хода́тайствуеши.
Ра́дуйся, А́нгеле Госпо́день, неусыпа́емый храни́телю мой.
Стра́нен и пришле́ц есмь на земли́ сей: житие́ мое́ су́етно и маловре́менно есть; аз же, окая́нный, сме́рти безве́стное во ум никогда́же прие́млю, ни помышля́ю о Стра́шнем Суди́щи, в не́м же и́мам Пра́ведному Судии́ предста́ти и да́ти отве́т о вся́ком де́ле же и сло́ве. Те́мже молю́ тя, души́ моея́ храни́теля, возбуди́ мя ско́ро от сна грехо́внаго, да не пости́гнет мя час сме́рти неиспра́вленна и да сподо́блюся испроси́ти от Всеми́лостиваго Бо́га беззако́нием мои́м проще́ние и во гла́се ра́дования воспева́ти Ему́: Аллилу́иа.
Всех Госпо́дь и Созда́тель мой, егда́ назна́менует ми преста́витися от жития́ сего́, ты, благи́й храни́телю мой, прови́дяй гро́зныя му́ки, духово́м зло́бы и нераска́янным гре́шником угото́ванныя и мене́ ожида́ющия, покры́й мя твоего́ милосе́рдия крила́ми, я́коже оре́л птенцы́ своя́, и внегда́ исчеза́ти от мене́ ду́ху моему́, да у́зрю тя близ мене́ предстоя́ща и лю́тыя враги́ отгоня́юща. О сем со умиле́нием молю́ ти ся, веща́я си́це:
Ра́дуйся, у́мным очесе́м мои́м го́рький и стра́шный час сме́ртный представля́яй; ра́дуйся, я́ко неизбе́жен, вку́пе же и безве́стен час той при́сно ми напомина́яй.
Ра́дуйся, на ки́йждо день, а́ки уже́ на после́дний жития́ моего́ взира́ти мя поуча́яй; ра́дуйся, на вся́кое вре́мя ко исхо́ду во ин мир мя приуготовля́яй.
Ра́дуйся, душе́вное умиле́ние и серде́чное сокруше́ние во мне рожда́яй; ра́дуйся, вы́ну жела́яй ми, да поне́ при кончи́не дней мои́х пока́юся.
Ра́дуйся, люби́ти мир и я́же в ми́ре ми воспреща́яй; ра́дуйся, пристра́стие к тле́нному бога́тству из се́рдца моего́ искореня́ти помога́яй.
Ра́дуйся, вся бла́га земна́я бы́ти привре́менна и скоропреходя́ща ми показу́яй; ра́дуйся, я́ко вся кра́сная ми́ра сего́ кри́ну се́льному подо́бна суть, вразумля́яй мя.
Ра́дуйся, сла́вы челове́чи, а́ки те́ни преходя́щия, иска́ти возбраня́яй ми.
Ра́дуйся, А́нгеле Госпо́день, неусыпа́емый храни́телю мой.
Всяк грех соде́ях в житии́ сем и весь живо́т мой во мно́зе прите́к суете́, к концу́ прибли́жихся: врази́ же мои́ устремля́ются на мя, а́лчуще поя́ти мя и низри́нути во глубину́ а́дову. Те́мже молю́ ти ся, благи́й мой Храни́телю, бу́ди ми защи́титель, егда́ и́мам преходи́ти лю́тая мыта́рства, и безбе́дно доведи́ мя до врат Небе́снаго Ца́рствия, иде́же ли́цы а́нгельстии ра́достне срета́ют восклица́ющих: Аллилу́иа.
Вити́йствующий язы́к не мо́жет изрещи́, я́же сотвори́л ми еси́, святы́й храни́телю мой, во всем житии́ мое́м: прия́в бо ду́шу мою́ от купе́ли Свята́го Креще́ния, храни́л мя еси́ во младе́нчестве, учи́л и вразумлял еси́ во о́трочестве, соблюда́л мя еси́ от поползнове́ния ко грехо́м в во́зрасте ю́ношестем, наставля́л еси́, прише́дша мя в му́жество, охраня́л еси́ на всех путе́х мои́х да́же до ста́рости, облича́я и утеша́я, всю́ду помога́я и направля́я на путь спасе́ния. Сего́ ра́ди благода́рственно вопию́ ти:
Ра́дуйся, я́ко никогда́же лиша́еши мя твоея́ по́мощи и заступле́ния; ра́дуйся, я́ко от сна востаю́ща мя подвиза́еши ко благодаре́нию Го́спода, укрепля́ющаго си́лы моя́.
Ра́дуйся, я́ко нача́ток коего́ждо дне моли́твою освяща́ти мя поуча́еши; ра́дуйся, я́ко воспреща́еши ми без моли́твы к всеблаго́му Промысли́телю, дерзнове́нно собо́ю что начина́ти.
Ра́дуйся, я́ко самонаде́яние из се́рдца моего́ истреби́ти тщи́шися; ра́дуйся, я́ко сладча́йшее и́мя Го́спода Иису́са Христа́ усты́ непреста́нно произноси́ти и во уме́ держа́ти мя побужда́еши.
Ра́дуйся, я́ко во вся́кое вре́мя нужная то́чию и поле́зная веща́ти язы́ком ми внуша́еши; ра́дуйся, я́ко от праздносло́вия, многоглаго́лания, па́че же и кощу́нства мя удержава́еши.
Ра́дуйся, я́ко яду́щу и пию́щу ми или́ и́но что творя́щу при́сно спребыва́еши; ра́дуйся, я́ко воздержа́нию в пи́щи и питии́ приобучи́ти мя пече́шися.
Ра́дуйся, я́ко спя́ща мя храни́ти и врага́, хотя́ща искуси́ти мя со́нными мечта́нии, отгоня́еши; ра́дуйся, я́ко воспяща́еши мя от любостра́стнаго стремле́ния и во о́чию мое́ю целому́дренный стыд влага́еши.
Ра́дуйся, А́нгеле Госпо́день, неусыпа́емый храни́телю мой.
Спасти́ всех прише́дый Иису́се мой преблаги́й, со умиле́нием молю́ Ти ся, Твои́м милосе́рдием прости́ мои́х злых премно́жество и безме́рие, преклоня́емый на сие́ Боже́ственными мольба́ми Твоего́ невеще́ственнаго служи́теля, его́же ми приста́вил еси́ из младе́нства, я́ко Человеколю́бец, храни́теля: да досто́ин явлю́ся вни́ти в черто́г сла́вы Твоея́ и со ду́хи пра́ведных воспе́ти: Аллилу́иа.
Стена́ тве́рда при́сно явля́еши ми ся, святы́й А́нгеле, проти́ву ухищре́ний зло́бных враго́в мои́х, и́щущих ве́чныя поги́бели моея́ и разслабля́ющих ду́шу мою́ ле́ностию и самозабве́нием. Молю́ у́бо тя, храни́телю мой, да твои́м хода́тайством сподо́блюся, при исхо́де души́ моея́ из телесе́ прича́стник бы́ти Пречи́стаго Те́ла и святе́йшия Кро́ве моего́ Спаси́теля, я́ко да укрепи́вся се́ю нетле́нною пи́щею и животворя́щим питие́м, безтре́петно прейду́ во ин мир, воспева́я тя, моего́ благоде́теля:
Ра́дуйся, я́ко дана́ ти есть власть и си́ла отража́ти де́монская на мя нападе́ния; ра́дуйся, я́ко прия́л еси́ от Бо́га кре́пость на побежде́ние неви́димых враго́в мои́х.
Ра́дуйся, я́ко от вся́каго злоде́йства и ко́зней диа́вольских моги́й изба́вити мя; ра́дуйся, я́ко го́рьких мыта́рств нача́льника, лю́таго мироде́ржца нападе́ния от мене́ отрева́еши.
Ра́дуйся, я́ко, огражда́емый твои́м прису́тствием, и́мам наде́жду в час сме́рти не устраши́тися мра́чных лиц духо́в зло́бы; ра́дуйся, я́ко храни́мый тобо́ю, упова́ю безбе́дно прейти́ возду́шная мыта́рства.
Ра́дуйся, я́ко укрепля́емый твое́ю по́мощию, ча́ю не уде́ржан бы́ти мне врат рая́, ми вожделе́ннаго; ра́дуйся, я́ко твое́ за мя предста́тельство си́льно есть пред Бо́гом, е́же не вве́ржену ми бы́ти во тьму кроме́шную.
Ра́дуйся, я́ко при́сно внуша́еши ми умилостивля́ти Го́спода слеза́ми покая́ния, да изба́влюся гее́нны а́дския; ра́дуйся, я́ко побужда́еши мя день и нощь моли́тися, да не по́слан бу́ду со де́моны му́читися.
Ра́дуйся, неотсту́пный мой руководи́телю и пе́стуне; ра́дуйся, кре́пкий мой засту́пниче и ско́рый помо́щниче.
Ра́дуйся, А́нгеле Госпо́день, неусыпа́емый храни́телю мой.
Пе́ние сие́, а́ще и от усе́рдия моего́ ти приноси́мое, святы́й храни́телю мой, вем, я́ко не дово́льно есть ко изъявле́нию моего́ серде́чнаго благодаре́ния за вся блага́я, я́же ми сотвори́л еси́ и не престае́ши твори́ти да́же до сего́ дне и ча́са; но и о сем молю́ ти ся, общаго ми с тобо́ю Созда́теля уми́лостиви, да на Стра́шнем Суде́ Свое́м шу́ия ча́сти изба́вит мя и сподо́бит со все́ми святы́ми воспева́ти Ему́: Аллилу́иа.
Свети́льник мой угасе́, еле́а же благи́х дел, во е́же возжещи́ и, несть ми; и где обря́щуся аз, окая́нный, сном грехо́вным отягче́нный, егда́ пости́гнет мя внеза́пу полу́нощь, час кончи́ны моея́? Но да не услы́шу и аз, я́коже юро́дивыя де́вы, гро́знаго гла́са Жениха́: не вем тя! Помози́ ми, неусыпа́емый храни́телю мой, напо́лнити сосу́ды души́ моея́ еле́ем благи́х дел, па́че же милосе́рдия и смире́ния. Ны́не же приими́ от мене́ сие́ пе́ние:
Ра́дуйся, Еди́наго Го́спода име́ти в ра́зуме при́сно ми внуша́яй; ра́дуйся, за́поведь о любви́ к Нему́, преблаго́му, в се́рдце мое́м обновля́яй.
Ра́дуйся, люби́ти Его́, Созда́теля, всем умо́м и всем помышле́нием мя побужда́яй; ра́дуйся, и к бли́жним и́скреннюю любо́вь мою́ Богоуго́дну бы́ти непреста́нно ми напомина́яй.
Ра́дуйся, люби́ти их не сло́вом или́ язы́ком, но де́лом и и́стиною мя поуча́яй; ра́дуйся, во всех ну́ждах их помога́ть жела́ние ми влага́яй.
Ра́дуйся, утеша́ти скорбя́щих, заступа́ти оби́димых мя наставля́яй; ра́дуйся, от име́ний свои́х уделя́ти бе́дным и неиму́щим се́рдце мое́ преклоня́яй.
Ра́дуйся, и ду́шу мою́, по за́поведи Спаси́теля, положи́ти за дру́ги своя́ гото́ву ми бы́ти возбужда́яй; ра́дуйся, закрыва́яй очеса́ моя́, е́же не зре́ти ми прегреше́ния бра́та моего́.
Ра́дуйся, не попуща́яй ми осужда́ти поползну́вшагося на грех бли́жняго моего́; ра́дуйся, воспреща́яй ми я́ти ве́ру оглаго́льником клевре́та моего́.
Ра́дуйся, А́нгеле Госпо́день, неусыпа́емый храни́телю мой.
Благода́ть дана́ ти есть от Всемогу́щаго Го́спода, святы́й покрови́телю мой, е́же храни́ти мя на всех путе́х мои́х, да не о ка́мень ко́его собла́зна преткне́тся нога́ моя́, до́ндеже мя предста́виши Христу́ Бо́гу спасе́на, Ему́же немо́лчно вся Си́лы Небе́сныя взыва́ют: Аллилу́иа.
Пою́ Твое́ досточу́дное милосе́рдие и мно́гое снисхожде́ние, быстродви́жный уме́, безпло́тный слуго́ Госпо́день: я́ко не гнуша́ешися грехо́вныя моея́ смра́дности и не престае́ши приноси́ти о мне, непотре́бнем, святы́я моли́твы своя́ ко святе́йшему престо́лу Триипоста́снаго Бо́га, е́же не поги́бнути ми во ве́ки, но Ца́рствие Небе́сное насле́довати. Благоволи́ у́бо прия́ти от душе́вных сокро́вищ мои́х приноси́мое ти песнопе́ние:
Ра́дуйся, я́ко воспомина́нием гряду́щаго гро́знаго Суда́ Бо́жия от грехо́в мя отрева́еши; ра́дуйся, я́ко ду́шу мою́, а́ки неве́сту, ко сре́тению прекра́снаго Жениха́ Христа́ предуготовля́ти возбужда́еши мя.
Ра́дуйся, я́ко при́сно жела́еши досто́йна мя сотвори́ти бра́чнаго черто́га Его́; ра́дуйся, я́ко вы́ну учи́ша мя возжига́ти свети́льник души́ моея́, да с му́дрыми де́вами, ду́шами пра́ведных, вни́ду в онь.
Ра́дуйся, я́ко грехо́вныя оде́жды моея́ совлачи́тися побужда́еши мя; ра́дуйся, я́ко в ри́зу непоро́чности и чистоты́ облещися ми спосо́бствуеши.
Ра́дуйся, я́ко хода́тайствуеши, да на Стра́шнем Суде́ Христо́вом одесну́ю Его́ ста́ти сподо́блюся; ра́дуйся, я́ко умоля́еши благоутро́бие Бо́жие, да ли́ку избра́нных Свои́х сопричте́т мя.
Ра́дуйся, я́ко подвиза́еши на моли́тву ко Го́споду и сожи́телей твои́х небе́сных, да всели́т мя с ни́ми во Ца́рствии Свое́м; ра́дуйся, до́брый и бо́дрый блюсти́телю мой.
Ра́дуйся, те́плый о мне, гре́шнем, моли́твенниче и благи́й предста́телю; ра́дуйся, по Го́споде Бо́зе и Пресвяте́й Богоро́дице кре́пкое мое́ упова́ние.
Ра́дуйся, А́нгеле Госпо́день, неусыпа́емый храни́телю мой.
О пресла́вный и у́мный све́те, А́нгеле Бо́жий! Приими́ благода́рственное сие́ и моле́бное пе́ние, и, егда́ и́мам от земли́ воста́ти на Суд, покажи́ тогда́ милосе́рдие твое́ на мне, гре́шнем: предста́ни близ мене́ тих и ра́достен, наде́ждою спасе́ния отъе́мля страх мой, да в селе́ниих ра́йских сподо́блюся вку́пе с тобо́ю во ве́ки веко́в воспева́ти преве́чному Царю́ сла́вы: Аллилу́иа.
(Этот кондак читается трижды, зате́м икос 1 и кондак 1)
Моли́тва
О, святы́й А́нгеле, храни́телю и покрови́телю мой благи́й! С сокруше́нным се́рдцем и боле́зненною душе́ю предстою́ ти, моля́ся: услы́ши мя, гре́шнаго раба́ своего́ (и́мя), с во́плем кре́пким и пла́чем го́рьким вопию́щаго. Не помяни́ мои́х беззако́ний и непра́вд, и́миже аз окая́нный прогневля́ю тя по вся дни и часы́, и ме́рзостна себе́ творю́ пред Созда́телем на́шим Го́сподем. Яви́ся мне милосе́рд и не отлуча́йся мене́ скве́рнаго да́же до кончи́ны моея́. Возбуди́ мя от сна грехо́внаго и посо́бствуй твои́ми моли́твами про́чее вре́мя живота́ моего́ без поро́ка прейти́ и сотвори́ти плоды́ досто́йны покая́ния, па́че же от сме́ртных паде́ний грехо́вных соблюди́ мя, да не поги́бну во отча́янии и да не пора́дуется враг о поги́бели мое́й. Вем вои́стинну и усты́ испове́дую, я́ко никто́же тако́в друг и предста́тель, защи́титель и побо́рник, я́коже ты, святы́й А́нгеле. Предстоя́ бо Престо́лу Госпо́дню, мо́лишися о мне непотре́бнем и па́че всех гре́шнейшем, да не изы́мет Преблаги́й души́ моея́ в день неча́яния моего́ и в день творе́ния зло́бы. Не престай у́бо умилостивля́я Премилосе́рдаго Го́спода и Бо́га моего́, да отпу́стит согреше́ния моя́, я́же сотвори́х во всем житии́ мое́м, де́лом, сло́вом и все́ми мои́ми чу́вствы, и и́миже весть судьба́ми да спасе́т мя, да нака́жет мя зде по Свое́й неизрече́нной ми́лости, но да не обличи́т и не истя́жет мя она́мо по Своему́ нелицеприя́тному правосу́дию, да сподо́бит мя покая́ние принести́, с покая́нием же Боже́ственное Причаще́ние досто́йне прия́ти, о сем па́че молю́, и такова́го да́ра всеусердно жела́ю. В стра́шный же час сме́рти неотсту́пен бу́ди ми, благи́й Храни́телю мой, прогоня́я мра́чныя де́моны, иму́щия устраши́ти притре́петную ду́шу мою́. Защити́ мя от тех ловле́ния, егда́ и́мам преходи́ти возду́шная мыта́рства, да храни́м тобо́ю, безбе́дно дости́гну рая́ ми вожделе́ннаго, иде́же ли́цы святы́х и го́рних сил непреста́нно восхваля́ют всечестно́е и великоле́пое и́мя в Тро́ице сла́вимаго Бо́га, Отца́ и Сы́на и Свята́го Ду́ха, Ему́же подоба́ет честь и поклоне́ние во ве́ки веко́в. Ами́нь.