Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.

Припев: Священномучениче Киприане и мученице Иустино, молите Бога о нас.

С Премирными чинми ныне водворяяся, о священная и Божественная главо,/ с Небесе призри на благочестно поющия тя/ и твоими молитвами сохраняй.

Во мраце неведения, преподобне, люте одержим/ и душегубными страстьми плоти невоздержанием ты разжигаем,/ преложение преславно обрел еси внезапу, всеблаженне.

Слава: Губителей убо на седалищи прежде, отче, седел еси/ и на седалищи пресвитеров паки Христа прославил еси,/ изменився явленно Владычнею Божественною благодатию.

И ныне: Дева по рождестве пребыла еси:/ Самаго бо рождши Творца всех и Господа,/ необычно и странно нам явльшася телом,/ Богородительнице Мати Приснодево.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Припев: Священномучениче Киприане и мученице Иустино, молите Бога о нас.

Яко Павел, ко Христу/ душевную любовь преложив, Киприане всемудре,/ того ученик был еси.

Обручает ти Христос,/ вместо риз страстных одеяние славы даруя/ и возрождения одежду.

Слава: Поустник постнический прежде бывый терпелив,/ послежде, Киприане всехвальне,/ свидетель Истины был еси.

И ныне: Господьственно и истинно Тя, Богородицу, вернии почитаем,/ Ты бо Бога родила еси,/ плоть бывша, Всенепорочная.

Господи, помилуй, трижды.

Седален, глас 8. Подобен: Премудрости:

Наказан в прелести прилежно,/ яко Павел, зван бысть с Небесе,/ Крестом наставляем к свету знания,/ честныя бо девы любовию разжигаем,/ тоя ради сочетался еси Зиждителю человеков./ Тем обличив немощь вражию,/ с нею сподобился еси лику мучеников,/ Киприане, архиереев удобрение,/ моли Христа Бога грехов оставление подати/ чествующим любовию святую память твою.

Слава, и ныне, Богородичен: В напасти многоплетенныя впад/ от враг видимых и невидимых,/ бурею одержим безчисленных согрешений моих,/ и, яко к теплому заступлению и покрову моему, Чистая,/ ко пристанищу притекаю Твоея благости./ Темже, Пречистая, из Тебе Воплощенному без семене/ молися прилежно о всех рабех Твоих,/ непрестанно молящих Ти ся, Богородице Пречистая,/ молящи Его присно согрешений оставление даровати/ воспевающим достойно славу Твою.

Песнь 4

Припев: Священномучениче Киприане и мученице Иустино, молите Бога о нас.

Возбнув, Богогласе, от неистовства перваго,/ демонскую лесть и душетленную прелесть всю обличил еси и, радуяся, взывал еси:/ слава силе Твоей, Господи.

Доблественно Иустина укрепляема/ и Чистую Деву и Обрадованную зело молящи,/ сетей избеже и козней же вражиих.

Слава: Укрепляема верою твоего Жениха/ и Крестною силою одеяна,/ демоны неятна, вопиющи, пребыла еси:/ слава силе Твоей, Господи.

И ныне: Иже естеством свободен сый,/ образом раба обнища богатством благости, Мати Приснодево,/ из Тебе по Ипостаси все приемь человечество.

Песнь 5

Ирмос: Ты, Господи, мой свет,/ в мир пришел еси./ Свет Святый, обращаяй из мрачна неведения/ верою воспевающих Тя.

Припев: Священномучениче Киприане и мученице Иустино, молите Бога о нас.

Поборницу имущи яве Чистую Богоматерь, обогащшися, Иустино,/ честное девство сохранила еси невредно.

Одушевленный Христов и краснейший образ,/ почтим Иустину,/ сокровенную доброту и некрадомое возложение.

Слава: Невеста Христова присная и нескверная,/ страданием и пощением восприемши,/ праведно сугуб венец носит.

И ныне: Ум Ангельский и человеческий не может сказати/ неизреченнаго и преславнаго чудесе Рождества Твоего,/ Всечистая.

Песнь 6

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости от ребр Твоих/ истекшею Кровию.

Припев: Священномучениче Киприане и мученице Иустино, молите Бога о нас.

Злобы дна преисподняго дошел еси,/ к крайнейшей же паки добродетели, отче,/ возшел еси на высоту,/ преславно изменився Божественным Крещением.

Был еси служитель демонов первее,/ но Христов Богоявленный ученик показался еси,/ присною любовию желание возлюбив последнее.

Слава: Многия ты Владыце привел еси мученики,/ куплей величайшую являя,/ кровию малейшею Царство Небесное, Богомудре, купити.

И ныне: Расторгни моя пленицы согрешений, Богоневесто, греховнаго закона,/ Жизни законом свободу дарующи,/ Владыку закона рождшая.

Господи, помилуй, трижды. Слава, и ныне:

Кондак, глас 1. Подобен: Лик Ангельский:

От художества волшебнаго обратився, Богомудре,/ к познанию Божественному,/ показался еси миру врач мудрейший,/ исцеления даруя чествующим тя, Киприане со Иустиною:/ с неюже молися Человеколюбцу Владыце/ спасти души наша.

Икос:

Целений твоих, святе, дарования мне низпослав,/ и недугующее мое сердце гноем греховным/ молитвами твоими исцели,/ яко да слово пения от скверных устен моих ныне принесу ти/ и воспою болезни твоя, яже показал еси, священномучениче,/ покаянием добрым и блаженным и Богу приближающимся./ Того бо удержан рукою,/ направился еси, яко по лествице, к Небесным,/ непрестанно моляся спасти души наша.

Песнь 7

Ирмос: Спасый во огни Авраамския Твоя отроки/ и, халдеи убив,/ яже правда праведно уловляше,/ препетый Господи,/ Боже отец наших, благословен еси.

Припев: Священномучениче Киприане и мученице Иустино, молите Бога о нас.

На священноначальство вшед,/ священнейший образ священноначальником себе и правило явил еси, взывая:/ препетый Господи, Боже отец наших, благословен еси.

Живоначальныя тебе десницы истинно изменение, отче, нашедшее,/ мудра тя сотвори Боговещателя, поюща:/ препетый Господи, Боже отец наших, благословен еси.

Слава: Оружие непобедимое нам на противнаго, блаженне, ты явился еси,/ того обличая лести, поющим:/ препетый Господи, Боже отец наших, благословен еси.

И ныне: Небеснии лицы и Пренебеснии собори/ песнословят из Тебе, Богородице, Рожденнаго, зовуще:/ препетый Господи, Боже отец наших, благословен еси.

Песнь 8

Ирмос: Веселися, Иерусалиме, торжествуйте, любящии Сиона:/ царствуяй бо во веки, Господь Сил прииде./ Да благоговеет вся земля от Лица Его/ и да вопиет:/ благословите, вся дела Господня, Господа.

Припев: Священномучениче Киприане и мученице Иустино, молите Бога о нас.

Премудро еллинския мудрости небрегл еси, славне,/ апостолов же Божественное вещание, Духом бряцаемо, отче,/ и огненными языки ясно изглашаемо, вопиял еси:/ благословите, вся дела Господня, Господа.

Востекл еси на высокая и премирная светло селения,/ Христу кровию, яко жертвою непорочною, приносим, отче,/ заколение живо, приятно и благоугодно, воспевая:/ благословите, вся дела Господня, Господа.

Слава: Побеждаеми от в тебе всельшияся благодати,/ демонстии полцы отгоняются и отбегают страсти недугующих, Богомудре,/ вернии же Божественнаго света насыщаемся, вопиюще:/ благословите, вся дела Господня, Господа.

И ныне: Ликуют со Ангельскими, Пречистая, силами о Рождестве Твоем, Богомати,/ и Богородицу верою Тя именующии:/ Ты бо Владыку и Избавителя нам родила еси, Емуже поем:/ благословите, вся дела Господня, Господа.

Песнь 9

Ирмос: Ева убо недугом преслушания/ клятву вселила есть,/ Ты же, Дево Богородице,/ Прозябением чревоношения мирови благословение процвела еси,/ тем Тя вси величаем.

Припев: Священномучениче Киприане и мученице Иустино, молите Бога о нас.

Свыше нас, благочестно поющих тя, назираеши Божественною благодатию,/ твоими молитвами, Богоглагольниче, и оружием благоволения венчавая,/ мир и спасение даруй нам,/ яко священноначальник божественнейший.

Течение исцелений обильно персть твоя любящим тя воздает;/ тебе же, Киприане, жены Богоносны яко Божественно сокровище приемлют/ и усердно являют сокровеннаго,/ да вси тебе насладимся.

Слава: Направити наше ко Христу, пребогате, шествие деянием,/ и Богоугодным житием, и чистейшим очищением/ сущо Божию тихость умоли, яко иерарх сострадательнейший.

И ныне: Укрепи нашу душевную немощь, Богомати, силою Твоею,/ разреши тяготу, Пресвятая, налагаемую рабом Твоим,/ миру правды Солнце несказанно возсиявшая.

Светилен. Подобен: Жены, услышите:

В волхвах несосужденна и единаго пребольша,/ пременшаго нрав и попалившаго книги, наставляющия ко прелести,/ и свидетельства венец страннолепно приемшаго,/ Киприана похвалим, страдальцев зерцало.

Слава, и ныне: Древле божества надеждею прельстивый мя злокозненный,/ плотным предложением премудренно паки прельщается от Девы Возсиявшаго;/ и сице осуждение плотное плотию разрешися,/ смерти умертвившейся.

Святой Киприан, в семилетием возрасте отданный нечестивыми родителями на служение языческим богам, глубоко познал все тайны чародейства. Он имел общение с нечистыми духами, видел даже самого бесовского князя. Однажды к Киприану обратился некий юноша, прося его с помощью чародейства сделать его женой одну благочестивую девицу — Иустину, от которой юноша получил отказ. Иустина, обратившись в христианство от языческого заблуждения, была усердной молитвенницей и постницей и сохраняла девство. Киприан насылал на деву полк бесов, но не мог достигнуть своей цели. Силой Крестного знамения, твердой верой и молитвой Иустина сокрушала все козни бесов. Видя, как бесы боятся Креста Господня, Киприан понял все ничтожество падших духов. Он с глубоким покаянием принял Святое Крещение и обратился в христианство. Ограждаясь Крестным знамением и произнося Исусову молитву, он защищался от нападения злых духов. Через год он был рукоположен во священника, а вскоре и возведен в сан епископа. Иустина же приняла иночество и была избрана игуменией в монастыре. В 304 году епископ Киприан и игумения Иустина во время гонений на христиан при императоре Диоклитиане после тяжелых мучений были усечены мечом. Священномученику Киприану и святой мученице Иустине молятся, прося их помощи в борьбе с лукавыми духами, а также против колдовства и чародейства. Церковная память их — 2 октября.

——————————————————————

Общее начало и конец всем канонам →
Порядок чтения по уставу
——————————————————————

Тропарь, глас 4-й

И нравом причастник, и престолом приемник апостолом быв. Деянием обрете богодухновенне, в видениих восхождение. Сего ради слово истины исправляя, и за веру пострадал еси до крове, священномучениче Киприане, моли Христа Бога спастися душам нашим. (Дважды).

Слава, и ныне. Богородичен. Иже от века утаенное и Ангелом несведомое таинство. Тобою Богородице земным явися Бог, в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.

Канон, глас 4-й

Песнь 1. Ирмос

Моря Чермнаго пучину, не мокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.

Запев: Святии священномучениче Киприане и мученице Иустино, молите Бога о нас (поклон).

С премирными чинми ныне водворяяся, о, священная и божественая главо, с Небесе призри на благочестно поющыя тя, и твоими молитвами сохраняй.

Запев. Во мраце неведения преподобне люте одержимь, и душегубными страстьми плоти неудержанием ты разжигаемь, преложение преславно обрете внезапу всеблаженне.

Слава. Губитель убо на седалищи прежде Отче сел еси. И на судищи старец паки Христа прославил еси, изменься явленно Владычнею божественою благодатию.

И ныне. Богородичен. Девою по рожестве пребысть, Самого порождьши Творца всех и Господа, необычно и странно нам явльшися телом, Богородице Мати присно Дево.

Катавасия: Избавите от бед рабы своя, святии священномучениче Киприане и мученице Иустино, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).

Песнь 3. Ирмос

Веселится о Тебе Церкви Твоя Христе зовущи, Ты ми крепость Господи, и прибежище и утвержение.

Запев. Яко Павел ко Христу душевную любовь приложив Киприане премудре, Того ученик был еси.

Запев. Обручает ти Христос, вместо риз страстных, одеяние славы даруя, и порождения одежду.

Слава. Постник постническии прежде бывыи терпелив, послежде Киприане всехвальне, мученик истинен бысть.

И ныне. Богородичен. Воистину истинно, Тя Богородицу вернии почитаем. Ты бо Бога породи плоть бывша, Пренепорочная. Катавасия.

Седален, глас 8-й. Наказан в прелести прилежно яко Павел зван бысть с Небесе, Крестом наставляемь к Свету разумному. Честныя бо девы любовию разжигаемь, тоя ради сочетася Зиждителю человеком. Тем обличив немощь вражию, с нею сподобися лику мученик, Киприане святителем удобрение. Моли Христа Бога, грехов оставление подати чтущым любовию святую память твою.

Слава, и ныне. Богородичен. В напасти многоплетенныя впад, от враг невидимых и видимых, бурею одержуся, безчисленных моих прегрешении. И яко к теплому заступлению, и покрову моему Пречистая пристанищу прибегаю Твоея благости. Тем же Пресвятая из Тебе Рождьшагося без семене, моли о всех рабех Своих, непрестанно поющих Тя Богородице пречистая, молящи Его прилежно, прегрешении оставление даровати, поклоняющимся верно рожеству Твоему. (Поклон).

Песнь 4. Ирмос

Воздвижена Тя видевши Церкви на Кресте Солнца праведнаго, ста в чину своем, достойно взывающи, слава силе Твоей Господи.

Запев. Возбнув богогласе от неистовства перваго, бесовскую лесть, и душетленную прелесть всю обличил еси. И радуяся взываше, слава силе Твоей Господи.

Запев. Доблествено Иустина укрепляема, и чистую Деву обрадованную зело молящи, сетей избеже, и козни же бесовския.

Слава. Укрепляема верою своего Жениха, и Крестною силою одеяна, бесом необъята вопиющи пребысть, слава силе Твоей Господи.

И ныне. Богородичен. Иже естеством свободь сыи, образом раба обнища богатством благости, Мати присно Дево, из Тебе по ипостаси все прием человечество. Катавасия.

Песнь 5. Ирмос

Ты Господи ми Свет в мир пришел еси, в свет святых обращая из мрачна неведения, верою воспевающия Тя.

Запев. Поборницу имущи яве чистую Богоматерь, обогащьшися Иустино, честное девьство сохранила еси невредимо.

Запев. Одушевленыи Христов и красныи образ почтем Иустину, сокровенную доброту, и неокрадомо возложение.

Слава. Невеста Христова присная и нескверная, страданию пост восприемши, праведно сугубь венец приемлет.

И ныне. Богородичен. Ум Ангельскии и человеческии не может сказати, неизреченнаго и преславнаго чудесе рожества Твоего Пречистая. Катавасия.

Песнь 6. Ирмос

Пожру Ти со гласом хваления Господи, Церкви вопиет Ти, от бесовския крове очищьшися, милостию от ребр истекшею Ти кровию.

Запев. Злобы преисподния дошел еси, к крайней же паки добродетели отче взыде на высоту. Преславно изменься божественым крещением.

Запев. Бысть служитель бесом первее. Но Христов богоявленыи ученик бысть, присною любовию желание возлюбив последнее.

Слава. Многия ты Владыце привед мученики, куплям великое являя, кровию малою Царство Небесное снискати.

И ныне. Богородичен. Расторгни ми пленицы согрешении Богоневесто законнаго греха. Жизни законом свобождение дарующи, Владыку закону порождьшая. Катавасия.

Слава, и ныне. Кондак, глас 1-й. От козни чаровныя обращься богомудре к разуму божественому, явися мирови врачь премудр, исцеления даруя чтущим тя Киприане, со Иустиною. С нею же моли Человеколюбца Владыку, спастися душам нашим.

Икос. Целений твоих святе дарования мне низпослав, и недугующее ми сердце гноем греховным, молитвами ти исцели, яко да слово пения от скверных устен моих, ныне принесу ти. И воспою болезни твоя, их же показа священномучениче покаянием добрым и блаженным, и Богу приближающимся. Того бо удержан рукою, направися яко по лествици к небесным. Непрестанно моляся, спастися душам нашим.

Песнь 7. Ирмос

Спасыи во огни авраамския си дети, и халдея убив, яже без правды праведныя уловляше. Препетый Господи Боже отец благословен еси.

Запев. На священие вшед, священными образы, святителем себе правило явил еси. Взывая, препетыи Господи Боже отец наших благословен еси.

Запев. Живоначальная ти десница воистину изменения отча нашедши, премудра тя сотвори боговещателя, поюща, препетыи Господи Боже отец благословен еси.

Слава. Оружие непобедимое нам, на противнаго блаженне ты явися, того обличая лесть. Поющим, препетыи отец наших Боже благословен еси.

И ныне. Богородичен. Небеснии лицы, и пренебеснии собори, хвально славят из Тебе Богородице рожденаго. Зовуще, препетыи Господи Боже отец наших благословен еси. Катавасия.

Песнь 8. Ирмос

Веселися Иеросалиме, торжествуйте любящии Сиона. Царствуяи бо веки, Господь силам прииде. Да говеет вся земля от лица Его. И да поет, благословите вся дела Господня Господа.

Запев. Премудро еллинския мудрости небрегл еси славне. Апостольское же божественое вещание, Духом ударяемо отче, и огнеными языки ясно возглашаемо вопияше, благословите вся дела Господня Господа.

Запев. Востече на высокая и премирная светлая селения. Христови кровию яко жертвою непорочною приносимь отче, и заколение живоприятно и благоугодно. Воспевая, благословите вся дела Господня Господа.

Слава. Побеждаема иже в тебе всельшеюся благодатию, бесовстии полцы отгоняются, и отбегают страсти недугующих богомудре. Вернии же божественаго света насыщаемся, вопиюще, благословите вся дела Господня Господа.

И ныне. Богородичен. Ликуют со Ангельскими Чистая силами о прижитии Твоем, иже Богородицу верою Тя именующии. Ты бо Владыку и Избавителя нам породи. Ему же поем, благословите вся дела Господня Господа. Катавасия.

Песнь 9. Ирмос

Евва убо недугом ослушания, клятву себе приобрела есть. Ты же Дево Богородице прозябением прижития Твоего, мирови благословение процвела еси. Тем Тя вси величаем.

Запев с поклоном. Свыше нас благочестно поющих тя, посещаеши божественою благодатию, твоими молитвами богоглагольниче, и оружием благоволения венчавая, мир и спасение даруй нам, яко священноначальник божественыи.

Запев. Течение исцелении обильно, перьсть твоя любящим тя воздается. Тебе же жены богоносны, яко божествено сокровище приемлют. И усердно являют сокровенная. Да вси тебе насладимся.

Слава. Направити наше ко Христу пребогате шествие деянием, и богоугодным житием, и чистейшим очищениемь, сущую Божию тихость умоли, яко святитель милостивен.

И ныне. Богородичен. Укрепи нам душевную немощь Богомати силою Своею. Разреши тяготу Пресвятая налагаемую рабом Твоим. Мирови праведное Солнце несказанно восиявшая. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, и святых священномученика Киприана и мученицы Иустины, и всех ради святых, помилуй и спаси нас, яко Благ и Человеколюбец. Аминь.

Память священномученика Киприана и мученицы Иустины совершается 2 (15 октября по новому стилю). Им молимся о сохранении от злых чар.

Мученики были родом из Антиохии. Киприан – из славного языческого рода. С семи до тридцати лет обучался в крупных центрах язычества – на горе Олимпе, в Аргосе и Таврополе (Греция), в египетских Мемфисе и в Вавилоне. Был посвящен в жрецы. Имел дар призывания нечистых духов, видел самого князя тьмы, беседовал с ним и получил от него полк бесов в услужение. В Антиохии Киприан был главным жрецом, удивляя людей способностью управлять стихиями, вызывать мертвецов. В том же городе жила девица Иустина. Обратившись ко Христу и приведя к истинной вере отца и мать, она посвятила себя Богу, проводя жизнь в посте и молитве и сохраняя девство. Один юноша, получив отказ от Иустины, обратился к Киприану, чтобы тот при помощи чар склонил девицу к замужеству. Как ни старался Киприан, ничего не мог сделать, ибо всех бесов святая прогоняла от себя молитвой, постом и крестным знамением. Тогда Киприану открылась вся глубина его падения и ничтожество тех, кому он служил. «Если ты боишься даже тени Креста и трепещешь имени Исуса Христа, – сказал Киприан сатане, – то что ты будешь делать, когда Сам Христос придет на тебя?» Бывший жрец тут же испытал на себе спасительную силу Креста и призывания имени Спасителя, оградившись ими от нападений диавола. С глубоким покаянием пришел он к еп. Анфиму и просил крещения. Св. Киприан стал пламенным проповедником христианства. Уже через год его рукоположили во пресвитера, а вскоре он был возведен в сан епископа. В гонение на христиан при имп. Диоклетиане свв. Киприана и Иустину схватили и привезли в Никомидию, где после лютых мучений усекли мечом (304).